អន្តរជាតិ
ម៉ាឡេស៊ី៖មេអង្គភាពប្រឆាំងពុករលួយចុះពីតំណែង ក្រោយលោក មហាធៀ ចោទថាមិនឯករាជ្យ រូបភាព Malaysian Insight
× ប្រធានអង្គភាពប្រឆាំងអំពើពុករលួយម៉ាឡេស៊ី (MACC) បានសម្រេចចុះចេញពីតំណែងនៅព្រឹកថ្ងៃចន្ទទី ១៤ ខែឧសភា។ ប្រធានស្ថាប័នរូបនេះសម្រេចចាកចេញ ក្រោយរងការចោទប្រកាន់ពីសំណាក់លោក មហាធៀ រឿងមិនចាត់ការអំពើពុករលួយក្នុងរដ្ឋាភិបាល។
លោក Dzulkifli Ahmad ប្រធានគណៈកម្មការប្រឆាំងពុករលួយម៉ាឡេស៊ីបានសម្រេចចុះចេញពីតំណែង។ ការសម្រេចនេះធ្វើឡើង ក្រោយជួបជាមួយលោកនាយករដ្ឋមន្ត្រីទើបជាប់ឆ្នោត មហាធៀ មហាម៉ាត់ និងមន្ត្រីជាន់ខ្ពស់ផ្សេងទៀតនៅ Putrajaya។
សារព័ត៌មានម៉ាឡេស៊ី Malaysiakini បានស្រង់សម្តីប្រភពមួយថា៖« លិខិតលាលែងរបស់លោក Dzulkifli ត្រូវបានដាក់ជូនទៅលោកនាយករដ្ឋមន្ត្រី មហាធៀហើយ។ ប៉ុន្តែគេមិនទាន់ដឹងថា អ្នកណានឹងជំនួសតំណែងលោកឡើយ»។
ប្រភពមួយផ្សេងទៀតបានបញ្ជាក់ប្រាប់សារព័ត៌មានដដែលថា ប្រធានអង្គភាពពុករលួយនេះនឹងត្រូវត្រឡប់ទៅកាន់ស្ថាប័នអយ្យការវិញ ដូចដែលលោកធ្លាប់ធ្វើមុនឡើងធ្វើជាប្រធានអង្គភាព។
តាមពិតទៅ ការសម្រេចចុះចេញពីតំណែងប៉ុន្មានថ្ងៃក្រោយបក្សប្រឆាំងឈ្នះឆ្នោតនេះមិនមែនជារឿងចម្លែកឡើយ។ បន្ទាប់ពីស្បថចូលកាន់តំណែងលោក មហាធៀ បានប្រកាសថា ប្រធានស្ថាប័ន និងអាជ្ញាធរមួយចំនួននឹងអស់តំណែង។
អង្គភាពប្រឆាំងពុករលួយស្ថិតក្នុងបញ្ជីដែរព្រោះជាលោកមហាធៀ ធ្លាប់ចោទថា អង្គភាពរដ្ឋនេះមិនឯករាជ្យ ហើយមិនមានវិធានការចំពោះអំពើពុករលួយស៊ីរូងផ្ទៃក្នុងដែលកំពុងកើតឡើងឡើយ។
«យើងនឹងសិក្សាមើលឲ្យច្បាស់ថា តើអង្គភាពពុករលួយនេះមានយុត្តិធម៌ឬអត់។ បើសិនជាយើងរកឃើញថា ស្ថាប័ននេះលម្អៀងទៅរកភាគីណាក៏ដោយទាំងបក្សកាន់អំណាចឬបក្សប្រឆាំង យើងនឹងផ្លាស់ប្តូរពួកគេ។ ដូចបានសន្យាហើយ រាល់ប្រធានថ្មីនៃទីភ្នាក់ងារធំៗរបស់រដ្ឋាភិបាលនឹងត្រូវត្រួតពិនិត្យវាយតម្លៃយ៉ាងលម្អិតពីសភា»។ នេះជាការបញ្ជាក់របស់នាយករដ្ឋមន្ត្រីម៉ាឡេស៊ីវ័យ ៩២ ឆ្នាំ។
ក្រៅពីមេស្ថាប័នប្រឆាំងពុករលួយ រដ្ឋាភិបាលថ្មីរបស់លោក មហាធៀ នឹងផ្តោតសំខាន់លើការស៊ើបអង្កេតករណីពុករលួយលុយរដ្ឋ 1MDB ដែលពាក់ព័ន្ធអតីតនាយករដ្ឋមន្ត្រីលោក ណាជីប រ៉ាហ្សាក់ផងដែរ។ បច្ចុប្បន្នលោក ណាជីប រ៉ាហ្សាក់ ស្ថិតក្រោមបម្រាមចាកចេញពីប្រទេស ហើយលោកអាចនឹងប្រឈមមុខការចោទប្រកាន់ជាថ្មីផង ថ្វីដ្បិតតែលោកត្រូវបានស្ថាប័នតុលាការបញ្ជាក់ថា ស្អាតស្អំពេលកំពុងមានអំណាចក៏ដោយ។
ចំណែកប្រធានស្ថាប័នរៀបចំការបោះឆ្នោត និងអគ្គព្រះរាជអាជ្ញាម៉ាឡេស៊ីស្ថិតនៅក្នុងបញ្ជីមន្ត្រីដែលត្រូវប្រឈមការដុសក្អែលផងដែរព្រោះស្ថាប័នទាំងនេះមានចំណែកជួយបក្សប្រឆាំងក្នុងការបោះឆ្នោតកន្លងមកផង និងជួយការពារមន្ត្រីពុករលួយផងដែរ៕
Tag:
ម៉ាឡេស៊ី
អង្គភាពប្រឆាំងពុករលួយ
មហាធៀ មហាម៉ាត់
© រក្សាសិទ្ធិដោយ thmeythmey.com