អន្តរជាតិ
មន្ត្រី UN៖ អាមេរិក មិនខ្វល់ជីវិតប្រជាជនប៉ាឡេស្ទីនស្លូតត្រង់ដែលត្រូវអ៊ីស្រាអែលសម្លាប់រង្គាលឡើយ
× អតីតមន្ត្រីស្ថាប័នសិទ្ធិមនុស្សអង្គការសហប្រជាជាតិបានទិតៀនអាមេរិកដែលមិនខ្វាយខ្វល់ចំពោះការប្រើហិង្សាសម្លាប់រង្គាលប្រជាជនប៉ាឡេស្ទីនដែលធ្វើបាតុកម្មប្រឆាំងការប្តូរទីតាំងស្ថានទូតអាមេរិកទៅហ្ស៊េរុយសាឡិម។ បាតុករភាគច្រើនគ្មានអាវុធយ៉ាងហោចណាស់ ៥៥ នាក់ស្លាប់ដោយសារការប្រើប្រាស់កម្លាំងហួសហេតុពីសំណាក់អ៊ីស្រាអែល។
សាស្ត្រាចារ្យច្បាប់អន្តរជាតិ និងជាអតីតបេសកជនពិសេសឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកបណ្ឌិត John Dugard បានថ្លែងរិះគន់ រដ្ឋបាលអាមេរិករបស់លោក ដូណាល់ ត្រាំ ចំៗ ដោយលោកអះអាងថា មិនខ្វាយខ្វល់ពីជីវិតប្រជាជនប៉ាឡេស្ទីនឡើយ។
លោកបានថ្លែងប្រាប់សារព័ត៌មានរុស្ស៊ី RT ដូច្នេះថា៖ អ៊ីស្រាអែលប្រើប្រាស់កម្លាំងសម្លាប់ប្រជាជនប៉ាឡេស្ទីនជាបាតុករច្រើនសិបនាក់នៅថ្ងៃចន្ទ។ប៉ុន្តែសេតវិមានអាមេរិកគឺមិនបារម្ភបន្តិចសោះពីជីវិតរបស់ប្រជាជនប៉ាឡេស្ទីន»។
លោកបានបន្ថែមថា រដ្ឋបាលអាមេរិកដឹងច្បាស់ថា វាមានភាគរយច្រើនដែលចលនាបាតុកម្ម ប្រឆាំងនឹងការផ្លាស់ប្តូរទីតាំងស្ថានទូតអាមេរិកពីក្រុង Tel Aviv ទៅកាន់ក្រុងហ្ស៊េរុយសាឡិមកើតមានឡើងនោះ។ ដូច្នេះហើយអាមេរិកត្រូវតែទទួលខុសត្រូវចំពោះរាល់អ្វីដែល កើតឡើងនៅតំបន់ហ្កាស្សា។
អ្នកច្បាប់អន្តរជាតិរូបនេះមិនសង្ឃឹមថា ពិភពលោកនាំគ្នាចេញមុខថ្កោលទោសអំពើព្រៃផ្សៃប្រឆាំងប្រជាជនប៉ាឡេស្ទីនឡើយ ហើយបើទោះជាមានការអំពាវនាវ ឬទាមទារឲ្យមានការបញ្ចប់ឧក្រិដ្ឋកម្មនេះក៏ដោយក៏អ៊ីស្រាអែល និងអាមេរិកមិនខ្វាយខ្វល់ដែរ។
ក្នុងចលនាបាតុកម្មថ្ងៃចន្ទម្សិលមិញ ប្រជាជនប៉ាឡេស្ទីនយ៉ាងហោចណាស់ ៥៥ នាក់បានស្លាប់ ហើយជាងពីរពាន់នាក់ផ្សេងទៀតបានរងរបួសដោយសារការប្រើប្រាស់កម្លាំងហួសហេតុពីសំណាក់កងទ័ពអ៊ីស្រាអែល។
ពាក់ព័ន្ធនឹងការបង្ក្រាបបាតុករនេះដែរ ប្រមុខឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស UNHRC លោក Zeid Ra’ad Al Hussein បានបង្ហោះសារតាមបណ្តាញសង្គម twitter របស់ខ្លួនថា ការសម្លាប់ប្រជាជនច្រើនសិបនាក់ និងបង្កឲ្យរបួសរាប់រយនាក់ពីសំណាក់អ៊ីស្រាអែលដែលប្រើប្រាស់អាវុធនៅហ្កាស្សាត្រូវតែឈប់ឥឡូវនេះ។
សូមបញ្ជាក់ថា ប្រជាជនប៉ាឡេស្ទីនរាប់ពាន់នាក់ប្រមូលផ្តុំគ្នាធ្វើបាតុកម្មប្រឆាំងការប្តូរទីតាំងស្ថានទូតអាមេរិកពីក្រុង Tel Aviv ទៅកាន់ក្រុងហ្ស៊េរុយសាឡិមដែលជាការសម្រេចចិត្តរបស់លោក ដូណាល់ ត្រាំ កាលពីខែធ្នូកន្លងទៅ។
ការប្តរទីតាំងស្ថានទូត វាស្មើនឹងការទទួលស្គាល់ក្រុងហ្ស៊េរុយសាឡិមដែលឋានៈមិនទាន់ត្រូវបានកំណត់ដាច់ស្រេចនោះជារដ្ឋធានីអ៊ីស្រាអែលជាផ្លូវការ។ ទីក្រុងពិសិដ្ឋហ្ស៊េរុយសាឡិម ជាចំណុចចម្រូងចម្រាសបំផុតក្នុងការចរចាដោះស្រាយជម្លោះអ៊ីស្រាអែល ប៉ាឡេស្ទីន។ អ៊ីស្រាអែល បានវាយដណ្តើមកាន់កាប់តំបន់មួយផ្នែកនៅភាគខាងកើតហ្ស៊េរុយសាឡិមនៅក្នុងសង្គ្រាមប្រាំមួយថ្ងៃរវាងអារ៉ាប់-អ៊ីស្រាអែលនៅក្នុងឆ្នាំ ១៩៦៧។ ហើយអាជ្ញាធរអ៊ីស្រាអែលក៏បានភ្ជាប់ទឹកដីនេះនិងដាក់បញ្ចូលក្នុងឧបសម្ព័ន្ធរបស់ខ្លួនដោយបង្រួបបង្រួមហ្ស៊េរុយសាឡិមទាំងមូលជាផ្លូវការក្នុងឆ្នាំ ១៩៨០ ។
ត្រឡប់មកវិញ ពេលលោក ត្រាំ ប្រកាសទទួលស្គាល់ក្រុងហ្ស៊េរុយសាឡិមជារដ្ឋធានីអ៊ីស្រាអែលកាលពីដើមខែធ្នូ ប្រទេសជាច្រើនបាននាំគ្នាថ្កោលទោសអាមេរិក។ គេឃើញសមាជិកអង្គការសហប្រជាជាតិ ១២៨ បានបោះឆ្នោតអនុម័តដំណោះស្រាយមួយដែលថ្កោលទោសការសម្រេចចិត្តរបស់លោក ដូណាល់ ត្រាំផងដែរ៕
Tag:
អាមេរិក
ហ្ស៊េរុយសាឡិម
ដូណាល់ ត្រាំ
UNHRC
© រក្សាសិទ្ធិដោយ thmeythmey.com