អន្តរជាតិ
ទីប្រឹក្សាសន្តិសុខអាមេរិក៖ នុយក្លេអ៊ែរកូរ៉េខាងជើងត្រូវដឹកទៅទុកនៅអាមេរិក ជាថ្នូរការព្យួរទណ្ឌកម្ម ទីប្រឹក្សាសន្តិសុខអាមេរិក John Bolton (រូបភាព AFP)
× ទីប្រឹក្សាសន្តិសុខអាមេរិក John Bolton ចង់ឲ្យកូរ៉េខាងជើងជញ្ជូនអាវុធនុយក្លេអ៊ែររបស់ខ្លួនទៅទុកនៅទឹកដីអាមេរិក បើកូរ៉េខាងជើងពិតជាមានឆន្ទៈបោះបង់កម្មវិធីអភិវឌ្ឍនុយក្លេអ៊ែរមែននោះ។ បន្ទាប់ពីរំសាយនុយក្លេអ៊ែររួច អាមេរិកនឹងធ្វើសម្បទានតាមក្រោយដែរ។ ប្រធានាធិបតីអាមេរិក ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន នឹងជួបគ្នានៅខែក្រោយនៅសិង្ហបុរីដើម្បីជជែកពីបញ្ហានុយក្លេអ៊ែរនេះ។
ក្នុងកិច្ចសម្ភាសនៅចុងសប្ដាហ៍មុន លោក John Bolton ទីប្រឹក្សាផ្នែកសន្តិសុខជាតិ លើកឡើងថា នុយក្លេអ៊ែរកូរ៉េខាងជើងត្រូវកម្ទេចទាំងស្រុង រួចបញ្ជូនទៅរក្សាទុកនៅរដ្ឋ Tennessee បើមេដឹកនាំកូរ៉េខាងជើង គីម ជុងអ៊ុន ចង់ឃើញការលើកលែងទណ្ឌកម្មនោះ។ ការរំសាយនុយក្លេអ៊ែរកូរ៉េខាងជើង គឺជារបៀបវារៈធំក្នុងជំនួបប្រវត្តិសាស្ត្ររវាងលោក គីម និងប្រធានាធិបតី ដូណាល់ ត្រាំ នៅថ្ងៃទី១២ ខែមិថុនាខាងមុខ។
ក្នុងកម្មវិធី This Week របស់ទូរទស្សន៍ ABC លោក Bolton បញ្ជាក់ថា ការរំសាយនុយក្លេអ៊ែរនៅកូរ៉េខាងជើងមានន័យស្មើនឹងការបំផ្លាញអាវុធនុយក្លេអ៊ែរទាំងស្រុង និងយកអាវុធទាំងនោះទៅទុកនៅ Oak Ridge ក្នុងរដ្ឋ Tennessee ភាគខាងកើតប្រទេស។ លោកសង្កត់ធ្ងន់ថា ការលុបបំបាត់នេះរាប់បញ្ចូលទាំងការលុបបំបាត់ការចម្រាញ់អ៊ុយរ៉ានីញ៉ូម និងដំណើរការចម្រាញ់សារធាតុភ្លុយតូនីញ៉ូម ព្រមទាំងកម្ទេចមីស៊ីលបាលីស្ទិកផង។
យ៉ាងណាមិញ មន្ត្រីទទួលកិច្ចការសន្តិសុខជាន់ខ្ពស់រូបនេះមិនបានបញ្ជាក់ថា នុយក្លេអ៊ែរកូរ៉េខាងជើងនឹងត្រូវទុកនៅមន្ទីរពិសោធន៍ជាតិ Oak Ridge ឬក៏ទីតាំងសន្តិសុខជាតិ Y-12 ដែលទទួលខុសត្រូវលើការផលិតអាវុធនុយក្លេអ៊ែរឡើយ។ មូលដ្ឋាន Y-12 នេះហើយដែលជាទីតាំងរក្សាទុកសម្ភារ និងឯកសារនៃកម្មវិធីនុយក្លេអ៊ែររបស់លីប៊ី បន្ទាប់ពីអតីតមេដឹកនាំ Muammar Gaddafi សម្រេចចិត្តបោះបង់មហិច្ឆតារបស់ខ្លួនក្នុងឆ្នាំ២០០៣ ។
ទីតាំងផលិតគ្រាប់នុយក្លេអ៊ែរអាមេរិក Y-12 (រូបភាព Reuters)
តាមពិតទៅ កូរ៉េខាងជើងបានបង្ហាញជំហរបោះបង់នុយក្លេអ៊ែររបស់ខ្លួនហើយ ដោយលើកលែងពីភាពចាំបាច់ និងងាកទៅពង្រឹងសេដ្ឋកិច្ចជាតិវិញ។ ការប្រកាសរបស់កូរ៉េខាងជើង ជាសញ្ញាល្អមុនជំនួបមេដឹកនាំអាមេរិក និងកូរ៉េខាងជើង ប៉ុន្តែភាគីហាក់ជំហរខុសគ្នាលើដំណើរការរំសាយអាវុធនេះ។ ព្យុងយ៉ាងចង់ធ្វើតាមដំណាក់កាល និងចាត់វិធានការព្រមគ្នាៗ ឯវ៉ាស៊ីនតោនចង់ឲ្យដំណើរការមួយដែលធ្វើឡើងតែម្ដង មានការត្រួតពិនិត្យរបស់អន្តរជាតិ ជាពិសេសធានាថា មិនអាចត្រឡប់ក្រោយឡើយ។
អ្វីគួរឲ្យចាប់អារម្មណ៍នោះ ក្នុងន័យបង្ហាញឆន្ទៈរបស់ខ្លួន កូរ៉េខាងជើងក៏បានប្រកាសកម្ទេចទីតាំងសាកល្បងនុយក្លេអ៊ែរដ៏ធំរបស់ខ្លួន ហើយថែមទាំងអញ្ជើញអ្នកសារព័ត៌មានអន្តរជាតិធ្វើសាក្សីផង។ នៅក្រោយការចរចានៅខែក្រោយ បើកូរ៉េខាងជើងសម្រេចចិត្តផ្អាកនុយក្លេអ៊ែរមែន អាមេរិកឯណេះបានត្រៀមខ្លួនរួចហើយដើម្បីស្រោចស្រង់សេដ្ឋកិច្ចកូរ៉េខាងជើងឡើងវិញតាមរយៈការជំរុញវិស័យឯកជនឲ្យទៅរកស៊ីនៅរដ្ឋឯកោមួយនេះ៕
Tag:
អាមេរិក
កូរ៉េខាងជើង
John Bolton
នុយក្លេអ៊ែរ
© រក្សាសិទ្ធិដោយ thmeythmey.com