មេប៉ូលិស បញ្ជាឲ្យធានាសុវត្ថិភាព នៅថ្ងៃបោះឆ្នោត

ជាតិ

មេប៉ូលិស បញ្ជាឲ្យធានាសុវត្ថិភាព នៅថ្ងៃបោះឆ្នោត

15, May 2018 , 10:39 pm

រូបភាព

ដោយ:

ភ្នំពេញ៖ នាយឧត្ដមសេនីយ៍ លោក នេត សាវឿន អគ្គស្នងការនគរបាលជាតិ បានប្រាប់ទៅនគរបាល ឲ្យធានាសុវត្ថិភាពនៃដំណើការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ឲ្យប្រព្រឹត្តទៅដោយរលូន។

មុនថ្ងៃទី១៦ ខែឧសភា ឆ្នាំ២០១៨ ដែលជាខួបអនុស្សាវរីយ៍លើកទី៧៣ នៃការបដិសន្ធិកងកម្លាំងនគរបាលជាតិកម្ពុជា ឈានមកដល់ លោក នេត សាវឿន ក៏បានចេញសារជូនពរ ដល់នគរបាលគ្រប់លំដាប់ថ្នាក់។ តាមរយៈសារជូនពរនោះ លោក បានគាំទ្រ និងលើកទឹកចិត្តដល់មន្ដ្រីនគរបាលជាតិទាំងអស់ ក្នុងកិច្ចខិតខំប្រឹងប្រែងបំពេញភារកិច្ច ដើម្បីបុព្វហេតុជាតិ និងការពាររដ្ឋាភិបាលស្របច្បាប់។

ក្រៅពីការជូនពរ អគ្គស្នងការនគរបាលជាតិ ឆ្លៀតដាស់តឿនកម្លាំងនគរបាលឲ្យយកចិត្តទុកដាក់ ចំពោះការបោះឆ្នោតនាពេលខាងមុខ។ លោក សង្កត់ធ្ងន់យ៉ាងដូច្នេះថា៖«ត្រូវធានាឲ្យបាននូវសុវត្ថិភាពនៃដំណើរការរៀបចំការបោះឆ្នោត ឲ្យប្រព្រឹត្តទៅដោយសេរី ត្រឹមត្រូវ យុត្តិធម៌ និងគ្មានការគំរាមកំហែង»។

ជាមួយគ្នានេះ សម្ដេចនាយកដ្ឋមន្ត្រី ហ៊ុន សែន និងសម្ដេច ស ខេង រដ្ឋមន្ត្រីក្រសួងមហាផ្ទៃ ក៏បានចេញសារជូនពរដល់នគរបាលជាតិផងដែរ ដោយបង្កប់នូវការក្រើនរម្លឹកឲ្យនគរបាល ធានាភាពសុខសាន្ត សន្តិសុខ និងបរិយាកាសសុវត្ថិភាពល្អប្រសើរ សម្រាប់ដំណើរការបោះឆ្នោត៕