អន្តរជាតិ
ក្រសួងការពារជាតិកូរ៉េខាងត្បូង៖ សមយុទ្ធជាមួយអាមេរិកបន្តធ្វើដដែល ទោះជាកូរ៉េខាងជើងតវ៉ា យន្តហោះចម្បាំងអាមេរិកនៅកូរ៉េខាងត្បូង (រូបភាព AFP)
× ក្រសួងការពារជាតិកូរ៉េខាងត្បូង នៅថ្ងៃទី១៦ ខែឧសភា បានប្រកាសថា សមយុទ្ធយោធាដែនអាកាសរបស់ទាហានកូរ៉េខាងត្បូង និងអាមេរិក នឹងបន្តធ្វើឡើងតាមផែនការដដែល ទោះជាកូរ៉េខាងជើងមិនពេញចិត្តក្ដី។ ដោយសារមិនពេញចិត្តនឹងសមយុទ្ធនេះ ក្រុងព្យុងយ៉ាង បានលុបចោលជំនួបថ្នាក់ខ្ពស់ ជាមួយក្រុងសេអ៊ូលយ៉ាងទាន់ហន់បំផុត និងគំរាមពិចារណាជំនួបមេដឹកនាំអាមេរិក-កូរ៉េខាងជើង នៅខែក្រោយទៅទៀត។ សេអ៊ូល នៅតែអះអាងថា សមយុទ្ធនេះ មិនមែនជាការត្រៀមប្រយុទ្ធឡើយ។
កូរ៉េខាងត្បូង មិនបានខ្វល់ខ្វាយខ្លាំងឡើយ ចំពោះការតវ៉ារបស់កូរ៉េខាងជើង ជុំវិញសមយុទ្ធ Max Thunder ជាមួយកងទ័ពអាមេរិក។ នៅប៉ុន្មានម៉ោងក្រោយការតវ៉ារបស់កូរ៉េខាងជើង រហូតដល់មានការផ្អាកការចរចាថ្នាក់ខ្ពស់មួយ នៅតំបន់គ្មានកងទ័ព (DMZ) នោះ ក្រសួងការពារជាតិកូរ៉េខាងត្បូង ក៏បញ្ជាក់ថា សម្ព័ន្ធមិត្តទាំងពីរនឹងនៅតែបន្តធ្វើសមយុទ្ធរួមគ្នានេះទៀត ដោយមិនមានបញ្ហារអាក់រអួលអ្វីទាំងអស់។
កូរ៉េខាងជើងខឹងសម្បារនឹងសមយុទ្ធនេះយ៉ាងខ្លាំង ដោយចាត់ទុកជាការប្រុងប្រៀបឈ្លានពានខ្លួន និងប៉ះពាល់បរិយាកាសល្អប្រសើរ នៅឧបទ្វីបកូរ៉េទៀតផង។ សមយុទ្ធ Max Thunder ដែលចាប់ផ្ដើមនៅថ្ងៃទី១១ ខែឧសភា និងមានរយៈពេលពីរសប្ដាហ៍នោះ មានវត្តមានចូលរួមពីយន្តហោះចម្បាំងប្រមាណ១០០គ្រឿង ដូចជា F-22, F-15K និងF-16 ។ សារព័ត៌មានកូរ៉េខាងជើងផ្សាយថា យន្តហោះទម្លាក់គ្រាប់បែក B-52 ក៏មានចូលរួមសមយុទ្ធនេះដែរ ហើយនេះធ្វើឲ្យកូរ៉េខាងជើងកាន់តែខឹងខ្លាំង។
យោងតាមទីភ្នាក់ងារព័ត៌មាន Yonhap មន្ត្រីក្រសួងការពារជាតិកូរ៉េខាងត្បូង អះអាងនៅថ្ងៃទី១៦ ខែឧសភា ថា លំហាត់រួមគ្នា នឹងបន្តដំណើរការដដែល ហើយកូរ៉េខាងត្បូង និងអាមេរិក មិនមានអ្វីខុសគ្នាទេលើបញ្ហានេះ។ ក្រសួងការពារជាតិកូរ៉េខាងត្បូង ក៏ពន្យល់ដែរថា សមយុទ្ធនេះមានគោលដៅពង្រឹងសមត្ថភាពរបស់អាកាសយានិកប៉ុណ្ណោះ មិនមែនជាការអនុវត្តផែនការធ្វើប្រតិបត្តិការ ឬការត្រៀមប្រយុទ្ធឡើយ។
បន្ទាប់ពីកូរ៉េខាងជើងរិះគន់ខ្លាំងៗ មករដ្ឋមន្ត្រីការពារជាតិកូរ៉េខាងត្បូង Song Yong-moo ក៏បានជជែកបន្ទាន់ ជាមួយឧត្តមសេនីយ៍ Vincent K. Brook មេបញ្ជាការកងទ័ពអាមេរិក នៅកូរ៉េខាងត្បូង លើការលុបចោលជំនួបអន្តរកូរ៉េដោយឥតព្រៀងទុកពីសំណាក់កូរ៉េខាងជើង។ ការតវ៉ារបស់កូរ៉េខាងជើង បង្កជាការបារម្ភ លើការចរចាសន្តិភាពនៅឧបទ្វីបកូរ៉េទៀតផង។
ការប្រកាសតវ៉ាជាសាធារណៈរបស់កូរ៉េខាងជើងពេលនេះ ហាក់ផ្ទុយពីការលើកឡើងរបស់មន្ត្រីកូរ៉េខាងត្បូង ដែលបានទៅជួបលោក គីម ជុងអ៊ុន នៅទីក្រុងព្យុងយ៉ាងកាលពីខែមីនា។ ទីប្រឹក្សាសន្តិសុខកូរ៉េខាងត្បូង Chung Eui-yong បានស្រង់សម្ដីលោក គីម ថា លោកយល់ពីភាពចាំបាច់ នៃការបន្តធ្វើសមយុទ្ធយោធារវាងកូរ៉េខាងត្បូង និងអាមេរិក។ សម្ដីរបស់លោក គីម ពេលនោះធ្វើឲ្យគេជឿថា កូរ៉េខាងជើងទំនងជាមិនប្រឆាំងសមយុទ្ធ នៅឧបទ្វីបកូរ៉េទៀតឡើយ៕
Tag:
កូរ៉េខាងត្បូង
អាមេរិក
កូរ៉េខាងជើង
© រក្សាសិទ្ធិដោយ thmeythmey.com