អន្តរជាតិ
UN៖ គិតត្រឹមឆ្នាំ២០៥០ មនុស្សដែលប្តូរទៅរស់នៅតំបន់ក្រុងកើន៦៨ភាគរយ
× មនុស្ស៦៨ភាគរយទូទាំងពិភពលោក នឹងប្តូរទៅរស់នៅតំបន់ទីក្រុងដោយគិតត្រឹមឆ្នាំ២០៥០ ។ នេះបើតាមរបាយការណ៍របស់អង្គការសហប្រជាជាតិ ពោលគឺកើនពី៥៥ភាគរយនាពេលបច្ចុប្បន្ន។
របាយការណ៍ UN បានព្យាករថា មនុស្សប្រមាណ២.៥ប៊ីលាននាក់បន្ថែមទៀត នឹងរស់នៅតំបន់ទីក្រុងនារយៈពេល៣០ឆ្នាំខាងមុខ ដោយកំណើនទាំងនេះ មានរហូតដល់៩០ភាគរយ សម្រាប់ទ្វីបអាស៊ី និងអាហ្វ្រិក។
កំណើនមនុស្សទៅនៅទីក្រុង មាន៣៥ភាគរយនៅឥណ្ឌា ចិន និងនីហ្សីរីយ៉ា ចន្លោះពីឆ្នាំ២០១៨ ដល់ឆ្នាំ២០៥០ ។ នេះបើតាមការលម្អិតព័ត៌មានរបស់ AFP។ បើទោះបីជាមានការធ្លាក់ចុះនៃអាត្រានគរូបនីយកម្មក៏ដោយ ប៉ុន្តែទ្វីបអាស៊ី មានចំនួន៥៤ភាគរយនៃមនុស្សដែលរស់នៅទីក្រុងជុំវិញពិភពលោក ខណៈអឺរ៉ុប និងអាហ្វ្រិក មាន១៣ភាគរយ។
បច្ចុប្បន្ន តូក្យូជាទីក្រុងដ៏ធំជាងគេនៅលើពិភពលោកដែលមានមនុស្សរស់នៅប្រមាណ៣៧លាននាក់ បន្ទាប់មកមាន ញូវដេលី ២៩លាននាក់ សៀងហៃ ២៦លាននាក់។ ទីក្រុងផ្សេងទៀតរួមមាន Sao Paulo, Mexico City, គែរ ម៉ុមបៃ ប៉េកាំង និងដាកា។
បើតាមការសិក្សារបស់ UN នៅឆ្នាំ២០២៨ ខាងមុខ ក្រុងញូវដេលី របស់ឥណ្ឌា នឹងដណ្តើមតំណែងពីក្រុងតូក្យូរបស់ជប៉ុនក្នុងនាមជាក្រុងដែលមានមនុស្សច្រើនជាងគេលើលោក។ អត្រាមនុស្សនៅតូក្យូនឹងបន្តធ្លាប់ជាលំដាប់៕
Tag:
ទីក្រុង
អង្គការសហប្រជាជាតិ
© រក្សាសិទ្ធិដោយ thmeythmey.com