អន្តរជាតិ
នាយករដ្ឋមន្ត្រីឡាវ ចេញបទបញ្ជាថ្មីដើម្បីសម្រួលនីតិវិធីសុំធ្វើអាជីវកម្មកាន់លឿន
×![]()
រដ្ឋាភិបាលក្រុងវៀងចន្ទន៍ កំពុងតែបន្តសម្រួលនីតិវិធីសម្រាប់ការធ្វើអាជីវកម្មនៅក្នុងប្រទេសខ្លួនឲ្យកាន់តែងាយស្រួល និងឆាប់រហ័ស ។ ការព្យាយាមកែសម្រួលនេះ គឺជាយុទ្ធសាស្ត្រថ្មីមួយរបស់ក្រុងវៀងចន្ទន៍ដើម្បីទាក់ទាញវិនិយោគបរទេសឲ្យកាន់តែច្រើន ខណៈចំណាត់ថ្នាក់ស្តីពីនីតិវិធីធ្វើអាជីវកម្មក្នុងតំបន់ ឡាវ កន្លងមក ស្ថិតនៅក្នុងលំដាប់មិនសូវល្អផង ។
នៅដើមខែកុម្ភៈកន្លងទៅ លោកនាយករដ្ឋមន្ត្រីឡាវ ថុងលួន ស៊ីសូលីត បានចេញបទបញ្ជាមួយដោយបានកំណត់ឲ្យគ្រប់ក្រសួង និងស្ថាប័នពាក់ព័ន្ធសម្រួលនីតិវិធី និងដោះស្រាយឧបសគ្គដែលធ្វើឲ្យវិនិយោគិនពិបាកក្នុងការធ្វើអាជីវកម្មនៅក្នុងប្រទេស។នេះបើយោងតាមការចុះផ្សាយរបស់សារព័ត៌មានឡាវ Laotian Times នៅថ្ងៃ១៤ ឧសភា ។
តាមប្រភពព័ត៌មានដដែលបន្ថែមថា បច្ចុប្បន្នលោកនាយករដ្ឋមន្ត្រី ស៊ីសូលីត ក៏បានកែសម្រួលច្បាប់ស្តីពីការធ្វើអាជីវកម្ម ដោយតម្រូវអាជ្ញាធរត្រូវតែចេញអាជ្ញាបណ្ណសម្រាប់ការចុះបញ្ជីធ្វើអាជីវកម្មថ្មីក្នុងរយៈពេល១០ថ្ងៃ ក្រោយនៃការដាក់ពាក្យស្នើ។ រដ្ឋាភិបាលក៏បានបង្កើតគណៈកម្មាធិការផ្សព្វផ្សាយ និងគ្រប់គ្រងដើម្បីជួយពន្លឿនការពិចារណា និងសម្រេចលើសំណើរបស់វិនិយោគិន។
តាមរបាយការណ៍ឆ្នាំ២០១៧ របស់ធនាគារពិភពលោកស្តីពីភាពងាយស្រួលក្នុងការធ្វើអាជីវកម្ម ឡាវ ស្ថិតនៅក្នុងលំដាប់ ១៤១ ហើយបើធៀបជាមួយនឹងបណ្តាប្រទេសក្នុងតំបន់ ស្ថានភាពឡាវ ស្ទើរតែនៅបាតតារាង។ ថៃស្ថិតនៅក្នុងចំណាត់ថ្នាក់លេខ ២៦ ខណៈ វៀតណាម ស្ថិតនៅលំដាប់លេខ ៦៨ និងកម្ពុជាស្ថិតនៅលេខ ១៣៥ ។ រីឯមីយ៉ាន់ម៉ា ស្ថិតនៅលំដាប់លេខ ១៧១ ។
បើឡាវពិតជាអាចដោះស្រាយបញ្ហាក្នុងការធ្វើអាជីវកម្មកាន់តែងាយស្រួលក្នុងប្រទេសបានពិតមែននោះ រដ្ឋក្រីក្ររបស់ពិភពលោកមួយនេះ អាចនឹងទទួលបានវិនិយោគច្រើន ដ្បិតបើប្រៀបធៀបកម្លាំងពលកម្ម ពោលគឺ ប្រាក់ឈ្នួលអប្បរមារបស់ឡាវ ក៏នៅទាបជាបណ្តាប្រទេសអាស៊ានផងដែរនោះ ៕
Tag:
ឡាវ
ពាណិជ្ជកម្ម
អាស៊ាន
© រក្សាសិទ្ធិដោយ thmeythmey.com
