អន្តរជាតិ
អឺរ៉ុបនឹងនៅតែបន្តរកស៊ីជាមួយអ៊ីរ៉ង់ ទោះប្រឈមមុខទណ្ឌកម្មអាមេរិក
× នៅថ្ងៃទី១៩ ខែឧសភា ស្នងការសហភាពអឺរ៉ុបទទួលបន្ទុកថាមពល Miguel Arias Canete បានទៅដល់ទីក្រុងតេហេរ៉ង់ដើម្បីបង្ហាញផែនការរកស៊ីជាមួយអ៊ីរ៉ង់ និងការពារក្រុមហ៊ុនអឺរ៉ុបរកស៊ីនៅអ៊ីរ៉ង់ ខណៈប្រឈមមុខទណ្ឌកម្មរបស់អាមេរិកក្ដី។ លោក ដូណាល់ ត្រាំ ដែលបានដកអាមេរិកចេញពីកិច្ចព្រមព្រៀងនុយក្លេអ៊ែរជាមួយអ៊ីរ៉ង់ បានគំរាមដាក់ទណ្ឌកម្មដ៏ធំលើរដ្ឋមជ្ឈិមបូព៌ាមួយនេះ ដែលធ្វើឲ្យអឹរ៉ុបបារម្ភខ្លាំង។
បន្ថែមពីលើការដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ប្រធានាធិបតីអាមេរិក ដូណាល់ ត្រាំ ក៏បានប្រកាសដាក់ទណ្ឌកម្មឡើងវិញលើអ៊ីរ៉ង់ដែរ។ អឺរ៉ុប ដែលមានក្រុមហ៊ុនជាច្រើនកំពុងរកស៊ីនៅអ៊ីរ៉ង់ បានស្វះស្វែងរកដំណោះស្រាយដើម្បីអូសទាញអ៊ីរ៉ង់ឲ្យបន្តអនុវត្តតាមកិច្ចព្រមព្រៀងនេះផង និងរៀបចំផែនការបន្តការធ្វើពាណិជ្ជកម្មជាមួយអ៊ីរ៉ង់ផង ព្រោះអឺរ៉ុបត្រូវការថាមពលមានតម្លៃថោករបស់អ៊ីរ៉ង់យ៉ាងខ្លាំង។
លោក Miguel Arias Canete ស្នងការសហភាពអឺរ៉ុបទទួលបន្ទុកថាមពល បានចាប់ផ្ដើមដំណើរទស្សនកិច្ចពីរថ្ងៃនៅរដ្ឋធានីតេហេរ៉ង់នៅថ្ងៃទី១៩ ដើម្បីបង្ហាញអ៊ីរ៉ង់នូវផែនការបន្តទិញប្រេង និងឧស្ម័ន ក៏ដូចជាវិធានការការពារក្រុមហ៊ុនអឺរ៉ុបកំពុងរកស៊ីនៅអ៊ីរ៉ង់។ លោក Canete ជាមន្ត្រីលោកខាងលិចទីមួយដែលធ្វើដំណើរទៅកាន់អ៊ីរ៉ង់ ក្រោយការដកខ្លួនរបស់អាមេរិក។ លោកបានជួបជាមួយប្រធានទីភ្នាក់ងារថាមពលអាតូមិកអ៊ីរ៉ង់ Ali Akbar Salehi ហើយគ្រោងជួបមន្ត្រីជាន់ខ្ពស់អ៊ីរ៉ង់មួយចំនួនទៀត។
យោងតាមទីភ្នាក់ងារព័ត៌មាន AFP លោក Canete និយាយក្នុងសន្និសីទសារព័ត៌មានថា ការការពារកិច្ចព្រមព្រៀងនុយក្លេអ៊ែរជាមូលដ្ឋានសម្រាប់សន្តិភាពតំបន់ ប៉ុន្តែលោកទទួលស្គាល់ថា វាជាកិច្ចលំបាកមួយ។ ខណៈរដ្ឋបាលក្រុងវ៉ាស៊ីនតោននឹងដាក់ទណ្ឌកម្មលើក្រុងតេហេរ៉ង់ឡើងវិញនោះ លោក Canete បញ្ជាក់ថា អឺរ៉ុបស្នើសុំការលើកលែងពីអាមេរិកក្នុងការអនុវត្តទណ្ឌកម្មលើក្រុមហ៊ុនអឺរ៉ុបដែលបោះទុនរកស៊ីអ៊ីរ៉ង់។
អ៊ីរ៉ង់កំពុងរង់ចាំមើលផែនការស្រោចស្រង់ដែលលើកឡើងដោយអឺរ៉ុប មុននឹងសម្រេចចិត្តថា ត្រូវដើរចេញតាមអាមេរិក។ លោក Selehi បានប្រាប់អ្នកសារព័ត៌មានដែរថា អ៊ីរ៉ង់ទទួលស្គាល់ការប្រឹងប្រែងរបស់អឺរ៉ុបដែលបានសន្យាការពារកិច្ចព្រមព្រៀងឆ្នាំ២០១៥ ។ កន្លងមក អ៊ីរ៉ង់ក៏បានប្រកាសរួចហើយថា បើអឺរ៉ុបអាចផ្ដល់ការធានាឲ្យខ្លួននោះ អ៊ីរ៉ង់នឹងបន្តការប្ដេជ្ញាចិត្តគោរពតាមកិច្ចព្រមព្រៀងនុយក្លេអ៊ែរនេះដូចដើម។
តាមពិតទៅ អ៊ីរ៉ង់ចង់ឲ្យអឺរ៉ុបធានាថា អ៊ីរ៉ង់នៅតែអាចទទួលបានប្រយោជន៍សេដ្ឋកិច្ចដែលបានឯកភាពគ្នាកាលពីអ៊ីរ៉ង់យល់ព្រមបោះបង់កម្មវិធីនុយក្លេអ៊ែរ។ ឯអឺរ៉ុបវិញ ដែលព្យាយាមបញ្ចុះបញ្ចូលអ៊ីរ៉ង់កុំទាន់ដើរចេញនោះ ក៏ព្រោះតែប្រយោជន៍ផ្ទាល់ខ្លួនដែរ។ អឺរ៉ុប និងអ៊ីរ៉ង់មានទំហំពាណិជ្ជកម្មប្រមាណ២០ពាន់លានអឺរ៉ូ។ ទំនិញអឺរ៉ុបទិញពីអ៊ីរ៉ង់មាន៩០ភាគរយជាប្រេង ដែលនាំចូលទៅកាន់អេស្ប៉ាញ ហូឡង់ អាល្លឺម៉ង់ បារាំង អ៊ីតាលី និងក្រិចផង៕
Tag:
អឺរ៉ុប
អ៊ីរ៉ង់
អាមេរិក
នុយក្លេអ៊ែរ
© រក្សាសិទ្ធិដោយ thmeythmey.com