កីឡាជាតិ
ជាតិ
យុវជន សាន គឹមហេង សម្រេចបានពីរគ្រាប់ ដើម្បីជួយឲ្យវិសាខាឈ្នះក្រុមជើងឯករងទ័ព
× ខ្សែបម្រើ សាន គឹមហេង អតីតយុវជនរបស់សាលាបាល់ទាត់ជាតិបាទី បានជួយឲ្យក្រុមវិសាខា យកឈ្នះក្រុមជើងឯករងក្រសួងការពារជាតិ ក្រោយរូបគេសម្រេចបានពីរគ្រាប់ម្នាក់ឯង នាប្រកួតពានរង្វាន់លីគកំពូលកម្ពុជាកាលពីថ្ងៃទី១៩ ឧសភា។ ចំណែកអាស៊ីអឺរ៉ុបនិងអង្គរថាយហ្គឺរទទួលបានម្នាក់១ពិន្ទុ ក្រោយក្រុមពីររក្សាលទ្ធផលស្មើ ២-២។
អតីតយុវជនសាលាបាល់ទាត់ជាតិបាទី សាន គឹមហេង បានបង្ហាញភាពអស្ចារ្យតាមរយៈការសម្រេចបានពីរគ្រាប់ម្នាក់ឯង ដើម្បីជួយឲ្យក្រុមចំណូលថ្មីវិសាខាយកឈ្នះក្រុមជើងឯករងឆ្នាំ២០១៧ ក្រសួងការពារជាតិ ២-០ នាជំនួបសប្តាហ៍ទី៦នៃក្របខណ្ឌកំពូលកម្ពុជា។ ជ័យជម្នះនេះបានជួយឲ្យវិសាខាឡើងទៅឈរលេខរៀងទី៣ជាបណ្តោះអាសន្នដោយមាន១៣ពិន្ទុស្មើក្រុមកំពូលណាហ្គាវើល និងក្រុមលេខ២បឹងកេត។
នាការប្រកួតលើទឹកដីកណ្តាលនាកីឡដ្ឋានវេស្ទើនភ្នំពេញកាលពីថ្ងៃទី១៩ ឧសភា ខ្សែបម្រើមវ័យក្មេង សាន គឹមហេង បានរកគ្រាប់បាល់នាំមុខ ១-០ សម្រាប់វិសាខានៅបន្ថែមនៃតង់ទី១ ក្រោយការលើកយ៉ាងល្អរបស់ Kim Kyong-hun។ នៅនាទីទី៧៥ បម្រើវ័យក្មេងរូបនេះបានសម្រេចគ្រាប់ទី២សម្រាប់វិសាខា ក្រោមការបញ្ជូនរបស់ខ្សែបម្រើកូរ៉េខាងជើង Kim Kyong-hun។ ហើយវាក៏ជាគ្រាប់បាល់ជ័យជម្នះ ២-០ សម្រាប់វិសាខាលើក្រសួងការពារជាតិផងដែរ។
នៅកីឡដ្ឋានអាស៊ីអឺរ៉ុបឯនេះវិញ ក្រុមម្ចាស់ផ្ទះអាស៊ីអឺរ៉ុបបានវាយបកតាមស្មើក្រុមភ្ញៀវអង្គរថាយហ្គឺរក្នុងលទ្ធផល ២-២។ កីឡាករជប៉ុន Kazuteru Okamoto បានរកគ្រាប់បាល់នាំមុខ ១-០ សម្រាប់ភ្ញៀវអង្គរថាយហ្គឺរនៅនាទីទី៣៤ មុន Refolo Mbarga Jean Marie Privat រកគ្រាប់បាល់តាមស្មើសម្រាប់ម្ចាស់ផ្ទះនៅនាទីទី៤១។
នៅនាទីទី៦០កីឡាករ Ryota Hayashi បានរកគ្រាប់បាល់នាំមុខ ២-១ សារជាថ្មីសម្រាប់ក្រុមភ្ញៀវអង្គរថាយហ្គឺរ។ តែពីរនាទីក្រោយមកខ្សែប្រយុទ្ធនីហ្សេរីយ៉ា Okereke Timothy សម្រេចគ្រាប់បាល់តាមស្មើ ២-២ សម្រាប់ម្ចាស់ផ្ទះអាស៊ីអឺរ៉ុប។ ក្រុមទាំងពីរបានរក្សាលទ្ធផលនេះរហូតចប់ការប្រកួត ដើម្បីទទួលបានម្នាក់១ពិន្ទុរៀងៗខ្លួន៕
Tag:
Cambodian League 2018
សាន គឹមហេង
វិសាខា
ទ័ព
© រក្សាសិទ្ធិដោយ thmeythmey.com