អន្តរជាតិ
ម៉ាឌូរ៉ូ បណ្តេញមន្ត្រីទូតអាមេរិកពីរនាក់ដោយចោទថាពួកគេរៀបចំគម្រោងប្រឆាំងរដ្ឋាភិបាល
× បន្ទាប់ពីអាមេរិករឹតបន្តឹងទណ្ឌកម្មប្រឆាំងរបបដឹកនាំវេណេស៊ុយអេឡា លោក នីកូឡាស ម៉ាឌូរ៉ូ បានសម្រេចបណ្តេញមន្ត្រីទូតអាមេរិកពីរនាក់នៅថ្ងៃអង្គារទី ២២ ខែឧសភា។ អាមេរិកបានប្រកាសឆ្លើយតបវិញដែរ ក្រោយមានការបណ្តេញមន្ត្រីទូតរបស់ខ្លួននោះ។
ប្រធានាធិបតីវេណេស៊ុយអេឡាទើបជាប់ឆ្នោតលោក នីកូឡាស ម៉ាឌុយរ៉ូ បានប្រកាសទុកពេល៤៨ ម៉ោងឲ្យមន្ត្រីទូតអាមេរិកពីរនាក់ចាកចេញពីប្រទេសនៅថ្ងៃអង្គារ។ វេណេស៊ុយអេឡាចោទប្រកាន់ថា មន្ត្រីទូតអាមេរិកពាក់ព័ន្ធការរៀបចំចលនាប្រឆាំងរដ្ឋាភិបាលទាំងនយោបាយ យោធា និងសេដ្ឋកិច្ច។
យោងតាមទីភ្នាក់ងារព័ត៌មាន AFP លោក ម៉ាឌូរ៉ូ ប្រកាសចាត់ទុកមន្ត្រីទូតអាមេរិកជាជនមិនគួរទទួលស្វាគមន៍ (personae non gratae)នេះ នៅតាមកញ្ចក់ទូរទស្សន៍ ក្រោយពេលដែលលោកប្រកាសពីជ័យជម្នះជាផ្លូវការក្នុងការបោះឆ្នោតប្រធានាធិបតីកាលពីថ្ងៃអាទិត្យ។
លោក ម៉ាឌូរ៉ូបាននិយាយដូច្នេះ៖«ពួកគេត្រូវចាកចេញពីប្រទេសក្នុងរយៈពេល ៤៨ ម៉ោង ដើម្បីការពារភាពថ្លៃថ្នូររបស់ប្រទេសវេណេស៊ុយអេឡា។ វាគ្រប់គ្រាន់ហើយសម្រាប់សកម្មភាពប៉ុនប៉ងប្រឆាំងរដ្ឋាភិបាលនេះ»។
មន្ត្រីទូតពីរនាក់ដែលត្រូវវេណេស៊ុយអេឡាបណ្តេញចេញនោះមានម្នាក់ជាភារៈធារី និងអនុប្រធានបេសកកម្មការទូតអាមេរិកផងដែរ។ ក្រោយមានការបណ្តេញចេញមន្ត្រីខ្លួន ក្រសួងការបរទេសអាមេរិកបានគំរាមប្រើប្រាស់វិធានការឆ្លើយតបវិញផងដែរ ប៉ុន្តែឥឡូវនេះអាមេរិកមិនទាន់បានទទួលព័ត៌មានការទូតពីខាងវេណេស៊ុយអេឡានៅឡើយទេ។
តាមពិតទៅការសម្រេចបណ្តេញមន្ត្រីទូតអាមេរិកនេះធ្វើឡើងមួយថ្ងៃប៉ុណ្ណោះក្រោយពេលដែលប្រធានាធិបតីអាមេរិកលោក ដូណាល់ ត្រាំ សម្រេចបន្តឹងទណ្ឌកម្មប្រឆាំងរដ្ឋាភិបាលវេណេស៊ុយអេឡា។ ទណ្ឌកម្មនេះធ្វើឲ្យរដ្ឋាភិបាលលោក ម៉ាឌូរ៉ូ ប្រឈមការលំបាកក្នុងការលក់ទ្រព្យសម្បត្តិរដ្ឋ។
ការសម្រេចដាក់ទណ្ឌកម្មបន្ថែមនេះធ្វើឡើងដើម្បីឆ្លើយតបនឹងការបោះឆ្នោតប្រធានាធិបតីដែលគ្មានបក្សប្រឆាំងចូលរួម និងមានអ្នកទៅបោះឆ្នោតត្រឹម ៤៦,១ ភាគរយ។ លោក ម៉ាឌូរ៉ូ ទទួលបានសំឡេងគាំទ្រច្រើនជាងគេ ហើយអាចកាន់កាប់តំណែងប្រធានាធិបតីក្នុងរយៈពេលប្រាំមួយឆ្នាំទៀតខណៈដែលប្រទេសនេះបន្តធ្លាក់ខ្លួនជ្រៅក្នុងវិបត្តិ។
ក្រៅពីសហរដ្ឋអាមេរិកបណ្តាប្រទេសជាច្រើនផ្សេងទៀតមានទាំងសមាជិកក្រុមប្រទេសសេដ្ឋកិច្ចរីកចម្រើន ២០ (G20) និងប្រទេសសមាជិកក្រុមលីម៉ា (Lima Group) ដែលជាយន្តការពហុភាគីបង្កើតឡើងដើម្បីជួយដោះស្រាយវិបត្តិវេណេស៊ុយអេឡានោះ ក៏ពិចារណាដាក់ទណ្ឌកម្មប្រឆាំងរបបដឹកនាំវេណេស៊ុយអេឡាដែរ ក្រោមហេតុផលថា ការបោះឆ្នោតគ្មានភាពស្របច្បាប់ឡើយ។ វេណេស៊ុយអេឡាកាន់តែឯកោលើឆាកអន្តរជាតិ ហើយទណ្ឌកម្មថ្មីនឹងធ្វើឲ្យវេណេស៊ុយអេឡាដែលកំពុងដុនដាបខ្លាំងស្រាប់នោះកាន់តែលំបាកលំបិនថែមទៀត។
ត្រឡប់មកវិញ វ៉ាស៊ីនតោន និងក្រុងការ៉ាកាសមិនមានការផ្លាស់ប្តូរឯកអគ្គរដ្ឋទូតជាមួយគ្នាចាប់តាំងពីឆ្នាំ ២០១០ ម្ល៉េះ ហើយទំនាក់ទំនងនេះល្អក់កករតាំងពីឆ្នាំ ១៩៩៩ ពេលដែលលោក ហ៊ូហ្គោ ឆាវេស (Hugo Chavez) ឡើងកាន់តំណែងផងដែរ៕
Tag:
នីកូឡាស ម៉ាឌូរ៉ូ
អាមេរិក
វេណេស៊ុយអេឡា
© រក្សាសិទ្ធិដោយ thmeythmey.com