អន្តរជាតិ
ឌូទើតេ ប្រាប់ឈ្មួញគ្រឿងញៀន៖ បើចង់រស់បានយូរ រកផ្លូវទៅដេកក្នុងគុក ប្រធានាធិបតីហ្វីលីពីន រ៉ូឌ្រីហ្គោ ឌូទើតេ (កណ្ដាល) ឈរអមដោយមន្រ្តីជាន់ខ្ពស់ស៊ីវិល និងយោធានាខួបកំណើតទ័ពជើងទឹក (រូបភាពហ្វេសប៊ុក Presidential Communications)
× នៅថ្ងៃទី២២ ខែឧសភា ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានផ្ញើសារព្រមានខ្លាំងមួយទៀតដល់ជនសង្ស័យពាក់ព័ន្ធការជួញដូរគ្រឿងញៀន។ ដោយចង់សំដៅដល់ឈ្មួញគ្រឿងញៀននៅខេត្តភាគកណ្ដាលហ្វីលីពីន លោក ឌូទើតេ បានប្រាប់ឲ្យពួកគេរកផ្លូវចូលទៅក្នុងពន្ធនាគារដោយខ្លួនឯង បើពួកគេចង់មានជីវិតរស់នៅបានយូរទៅមុខទៀត។ ទោះរងការរិះគន់ខ្លាំងពីអង្គការសិទ្ធិមនុស្សនានាក្ដី លោកក៏អះអាងថា សង្គ្រាមគ្រឿងញៀននៅហ្វីលីពីនទៅមុខរហូត។
នាឱកាសខួបកំណើតកងទ័ពជើងទឹកហ្វីលីពីន លោកប្រធានាធិបតី រ៉ូឌ្រីហ្គោ ឌូទើតេ ប្រាប់ឧក្រិដ្ឋជនពាក់ព័ន្ធគ្រឿងញៀនពីវិធីសាស្ត្ររក្សាជីវិតឲ្យរស់នៅបានយូរ និងមិនអស់ជីវិតក្នុងយុទ្ធនាការបង្ក្រាបគ្រឿងញៀនរបស់លោក។ លោក ឌូទើតេ មិនបានបញ្ចេញឈ្មោះជនសង្ស័យជាក់លាក់ឡើយ តែលោកបានសំដៅដល់ឈ្មួញដែលមានបានដោយសារការរកស៊ីលក់គ្រឿងញៀននៅក្នុងខេត្តសេប៊ូភាគកណ្ដាលហ្វីលីពីន។
ចំពោះមុខយោធាជើងទឹកហ្វីលីពីនជាច្រើននាក់ដែលចូលរួមកម្មវិធីនៅថ្ងៃទី២២ ខែឧសភា លោក ឌូទើតេ និយាយបែបព្រមានជនសង្ស័យទាំងនោះថា៖ «អ្នកដឹងទេ បើខ្ញុំនៅសេប៊ូ ខ្ញុំនឹងស្នាក់នៅក្នុងពន្ធនាគារ។ អ្នកចង់រស់បានយូរ? ដេកក្នុងគុកទៅ»។ យោងតាមសារព័ត៌មាន ABC News ប្រមុខដឹកនាំហ្វីលីពីនរូបនេះក៏ប្រាប់ឲ្យពួកគេទាំងនោះបង្កើតមូលហេតុដើម្បីឲ្យបានចូលក្នុងគុក និងមិនត្រូវចាកចេញចាកចេញពីគុកឡើយ ព្រោះវាមិនមានសុវត្ថិភាពទេ។
មិនត្រឹមតែគំរាមឈ្មួញគ្រឿងញៀនឡើយ លោក ឌូទើតេ ក៏ឆ្លៀតព្រមានប៉ូលិសដែលជាប់ពាក់ព័ន្ធនឹងការជួញដូរគ្រឿងញៀនផង។ ដោយទទួលស្គាល់ថា មានមន្ត្រីប៉ូលិសហ្វីលីពីនជាច្រើនជាប់ទាក់ទិនគ្រឿងញៀននេះ ប្រធានាធិបតីមាត់អត់គម្របរូបនេះបានព្រមានថា ប្រសិនបើពួកគេឃុបឃិតក្នុងសំណុំរឿងគ្រឿងញៀន មន្ត្រីប៉ូលិសទាំងនោះនឹងត្រូវអស់ជីវិតមុនគេ។ លោកក៏បានរំឭកករណីសម្លាប់ប៉ូលិស និងចៅហ្វាយក្រុងខ្លះដែលមានឈ្មោះជាប់ពាក់ព័ន្ធគ្រឿងញៀន។
ស្របពេលមនុស្សជាងបួនពាន់បានស្លាប់ក្នុងសង្គ្រាមគ្រឿងញៀនដែលចាប់ផ្ដើមនៅដើមអាណត្តិមកនោះ លោក ឌូទើតេ បានប្រកាសជាថ្មីថា យុទ្ធការបោសសម្អាតនេះនឹងមិនបកក្រោយឡើយ។ លោកសង្កត់ធ្ងន់ថា វិធីសាស្ត្រដោះស្រាយបញ្ហារបស់លោកមានអ្នកមិនចូលចិត្តដែរ តែមិនមានការត្រឡប់ក្រោយឡើយ ហើយលោកនឹងបន្តដឹកនាំយុទ្ធានាការនេះទៀត។
សង្គ្រាមគ្រឿងញៀន ពិតជាបានរងការរិះគន់យ៉ាងខ្លាំងពីអង្គការការពារសិទ្ធិមនុស្សក្នុងស្រុក និងស្ថាប័នអន្តរជាតិនានាផង ដោយចាត់ទុកជាការរំលោភសិទ្ធិមនុស្សធ្ងន់ធ្ងរ។ ប៉ុន្តែពាក្យរិះគន់ទាំងនោះរងការឆ្លើយតបដោយពាក្យសម្ដីធ្ងន់ៗរបស់លោក ឌូទើតេ ។ អតីតប្រធានាធិបតីអាមេរិក បារ៉ាក់ អូបាម៉ា សហភាពអឺរ៉ុប ប្រមុខស្ថាប័នសិទ្ធិមនុស្សរបស់អង្គការសហប្រជាជាតិ សុទ្ធតែត្រូវបានលោក ឌូទើតេ វាយប្រហារដោយសម្ដីមិនសូវសមរម្យជាបន្តបន្ទាប់៕
Tag:
ហ្វីលីពីន
រ៉ូឌ្រីហ្គោ ឌូទើតេ
គ្រឿងញៀន
© រក្សាសិទ្ធិដោយ thmeythmey.com