អន្តរជាតិ
មហាសេដ្ឋីម៉ាឡេស៊ី Robert Kuok ប្រាប់លោក មហាធៀ៖ «លោកបានសង្គ្រោះប្រទេសម៉ាឡេស៊ី»
× មហាសេដ្ឋីម៉ាឡេស៊ីលោក Robert Kuok បានជួបជាមួយនាយករដ្ឋមន្ត្រី មហាធៀ មហាម៉ាត់ ជាលើកដំបូងបន្ទាប់ពីសម្ព័ន្ធបក្សប្រឆាំងជាប់ឆ្នោត។ ក្នុងជំនួបនោះលោក Kuok បានគោរព និងថ្លែងអំណរគុណដល់លោក មហាធៀ ដែលបានសង្គ្រោះប្រទេសជាតិកន្លងមកថែមទៀតផង។
ក្រោយត្រូវបានរដ្ឋាភិបាលម៉ាឡេស៊ីថ្មីតែងតាំងជាសមាជិកក្រុមប្រឹក្សាព្រឹទ្ធបុរស (CEP) លោក Robert Kuok ដែលត្រូវគេស្គាល់ថាជា មហាសេដ្ឋីម៉ាឡេស៊ីហើយរស់នៅហុងកុង បានអញ្ជើញមកជួបលោកនាយករដ្ឋមន្ត្រី មហាធៀ មហាម៉ាត់នៅសប្តាហ៍នេះនៅការិយាល័យនាយករដ្ឋមន្ត្រីនៅក្រុង Putrajaya។
នៅក្នុងខ្សែអាត់វីដេអូដែលចុះផ្សាយដោយអង្គការនយោបាយ Kelab Chedet ដែលចុះផ្សាយថ្ងៃពុធទី ២៣ ខែឧសភា លោក Kuok បានគោរព និងថ្លែងអំណរគុណដល់ការប្រឹងប្រែងរបស់លោក មហាធៀ ក្នុងការសង្គ្រោះប្រទេសជាតិផងដែរ។
លោក Kuok ដែលមានវ័យ ៩៤ ឆ្នាំនោះនិយាយទៅកាន់លោក មហាធៀ ដូច្នេះ៖« ខ្ញុំគោរពលោក។ លោកបានសង្គ្រោះប្រទេសម៉ាឡេស៊ី។ ពិតហើយដោយមានការជួយពីអតីតរដ្ឋមន្ត្រីហិរញ្ញវត្ថុលោក Daim Zainuddin»។
ថ្លែងចប់ភ្លាម លោក មហាធៀ បានឆ្លើយតបវិញថា៖« ប៉ុន្តែឥឡូវនេះខ្ញុំត្រូវការឲ្យលោកជួយវិញម្តង»។
លោក Kouk ត្រូវបានគេស្គាល់ថាជាមហាសេដ្ឋីកំពូលរបស់ម៉ាឡេស៊ី ហើយលោកត្រូវបានតែងតាំងជាសមាជិកក្រុមប្រឹក្សាព្រឹទ្ធបុរសបច្ចុប្បន្ន។ បើតាមទស្សនាវដ្តី Forbes លោក Robert Kuok មានទ្រព្យសរុប ២០ ពាន់លានដុល្លារអាមេរិក ដែលនេះធ្វើឲ្យលោកក្លាយជាអ្នកមានជាងគេនៅម៉ាឡេស៊ី និងមហាសេដ្ឋីលំដាប់ទីប្រាំមួយនៅអាស៊ីអាគ្នេយ៍ផង។
តាមពិតទៅ ក្រុមប្រឹក្សាព្រឹទ្ធបុរសដែលមានសមាជិកប្រាំរូបសុទ្ធតែជាមនុស្សល្បីនិងមានបទពិសោធន៍ខ្ពស់នេះ មានតួនាទីសំខាន់ក្នុងការប្រឹក្សាយោបល់ដល់រដ្ឋាភិបាលពាក់ព័ន្ធការអនុវត្តគោលនយោបាយសេដ្ឋកិច្ច និងហិរញ្ញវត្ថុរដ្ឋផងដែរ។
តាមការសន្យាក្នុងពេលឃោសនា លោក មហាធៀ សន្យាធ្វើយ៉ាងណាបោសសម្អាតអំពើពុករលួយដែលកំពុងហ៊ុមព័ទ្ធស្ថាប័នសាធារណៈម៉ាឡេស៊ី និងធានាដណ្តើមយកលុយរដ្ឋដែលបាត់បង់ទៅមកវិញផង។ ក្រៅពីនេះរដ្ឋាភិបាលលោកក៏យកចិត្តទុកដាក់លើការដោះស្រាយបញ្ហាហិរញ្ញវត្ថុសាធារណៈដូចជាការកើនឡើងនូវបំណុលរដ្ឋ និងជួយលើកកម្ពស់ជីវភាពប្រជាជនក្នុងនោះមានការលុបចោលពន្ធលើទំនិញ និងសេវាកម្ម ហើយឈានទៅផ្តល់ការឧបត្ថម្ភធនលើប្រេងផងដែរ។
ម្សិលមិញលោក មហាធៀ បានប្រកាសកាត់លុយសមាជិកគណៈរដ្ឋមន្ត្រី ១០ភាគរយដែលវាជាផ្នែកមួយនៃការអនុវត្តគោលនយោបាយត្បិតត្បៀតដើម្បីដោះស្រាយបញ្ហាហិរញ្ញវត្ថុសាធារណៈផងដែរ៕
Tag:
ម៉ាឡេស៊ី
Robert Kuok
មហាធៀ មហាម៉ាត់
© រក្សាសិទ្ធិដោយ thmeythmey.com