អន្តរជាតិ
ប្រមុខការទូតចិនប្រតិកម្ម ក្រោយអាមេរិកលុបចោលការអញ្ជើញឲ្យចូលរួមសមយុទ្ធយោធា រដ្ឋមន្រ្តីការបរទេសចិន វ៉ាង យី ក្នុងសន្និសីទសារព័ត៌មានជាមួយរដ្ឋមន្រ្តីការបរទេសអាមេរិក Mike Pompeo (រូបភាព AFP)
× រដ្ឋមន្ត្រីការបរទេសចិន វ៉ាង យី នៅថ្ងៃទី២៣ ខែឧសភា បានប្រតិកម្មតបទៅនឹងការសម្រេចចិត្តរបស់មន្ទីរបញ្ចកោណអាមេរិកដែលលុបចោលការអញ្ជើញយោធាចិនឲ្យចូលរួមសមយុទ្ធជើងទឹក RIMPAC ឆ្នាំ២០១៨ ។ លោក វ៉ាង យី បានហៅការសម្រេចចិត្តនេះជារឿងមិនមានប្រយោជន៍អ្វីសោះក្នុងទំនាក់ទំនងទ្វេភាគី។ ការលុបចោលការអញ្ជើញនេះ ធ្វើឡើងខណៈដែលអាមេរិក និងចិនកំពុងមិនត្រូវគ្នាលើរឿងពាណិជ្ជកម្មស្រាប់ផង។
ក្រសួងការពារជាតិអាមេរិកបានលុបចោលការអញ្ជើញកងទ័ពជើងទឹកចិនឲ្យចូលរួមសមយុទ្ធ RIMPAC ឆ្នាំ២០១៨ ដែលគ្រោងធ្វើនៅកោះហាវ៉ៃ។ ក្រសួងការពារជាតិអាមេរិកបានយកករណីចិនបង្កើនសកម្មភាពយោធានៅសមុទ្រចិនខាងត្បូងជាមូលហេតុនៃការលុបចោលការអញ្ជើញនេះ។ យោធូបនីយកម្មរបស់ចិននៅក្នុងតំបន់សមុទ្រនេះបានក្លាយជាគូប្រជែងឥទ្ធិពលរបស់អាមេរិកក្នុងតំបន់ដែលមានយូរមកហើយ។
ជុំវិញបញ្ហានេះ អ្នកនាំពាក្យមន្ទីរបញ្ចកោណ Christopher Logan និយាយថា ការលុបចោលការអញ្ជើញនេះ ជាការឆ្លើយតបបឋមរបស់អាមេរិកចំពោះសកម្មភាពយោធាចិននៅសមុទ្រចិនខាងត្បូងដែលបន្តកើតឡើង។ លោកពន្យល់ទៀតថា សកម្មភាពយោធារបស់ចិននៅតំបន់ជម្លោះធ្វើឲ្យតំបន់មានអស្ថិរភាព និងកើនកម្ដៅទៅវិញទេ ហើយវាក៏មិនសមស្របតាមគោលការណ៍របស់សមយុទ្ធ RIMPAC ដែរ។
ឆ្លើយការសម្រេចចិត្តរបស់យោធាអាមេរិក រដ្ឋមន្ត្រីការបរទេសចិន វ៉ាង យី ដែលស្ថិតនៅរដ្ឋធានីវ៉ាស៊ីនតោន ក៏បានស្ដីបន្ទោសតបវិញដែរ។ ក្នុងសន្និសីទសារព័ត៌មានជាមួយសមភាគីអាមេរិក Mike Pompeo នៅថ្ងៃទី២៣ ខែឧសភា លោក វ៉ាង យី និយាយថា ការសម្រេចចិត្តលុបចោលការអញ្ជើញពីសំណាក់មន្ទីរបញ្ចកោណជាជំហានមិនមានប្រយោជន៍ឡើយ និងធ្វើឡើងដោយមិនយកចិត្តទុកដាក់។ លោកបន្តថា វាមិនបានជួយអ្វីដល់ទំនាក់ទំនងអាមេរិក និងចិនឡើយ។
តាមពិតទៅ យោធាចិនបានចូលរួមក្នុងសមយុទ្ធនេះពីរដងរួចមកហើយក្នុងឆ្នាំ២០១៤ ម្ដងនិងក្នុងឆ្នាំ២០១៦ ម្ដងទៀត ឯក្នុងឆ្នាំ២០១៨ វិញយោធាអាមេរិកបានអញ្ជើញយោធាចិនតាំងពីឆ្នាំ២០១៧ ម្ល៉េះ។ ការលុបចោលនេះធ្វើឡើយបន្ទាប់ពីមានរបាយការណ៍ជាច្រើនជុំវិញសកម្មភាពយោធាចិននៅតំបន់ប្រទាញប្រទង់សមុទ្រចិនខាងត្បូង។ កាលពីសប្ដាហ៍មុន យន្តហោះទម្លាក់គ្រាប់បែកចិន H-6K និងងយន្តហោះចម្បាំងមួយចំនួនទៀតបានធ្វើលំហាត់យោធានៅម្ដុំកោះប៉ារ៉ាសែលទៀតផង។
អាមេរិកមិនសប្បាយចិត្តពេលមានគូប្រជែងអានុភាពខ្លួននៅតំបន់ដែលស្ថិតក្រោមឥទ្ធិពលរបស់ខ្លួនរាប់សិបឆ្នាំមកហើយនោះ។ ជានិច្ចកាល ក្រុងវ៉ាស៊ីនតោនតែងរិះគន់ក្រុងប៉េកាំងជុំវិញវត្តមាននាវាចិន ឬយន្តហោះចម្បាំងនៅតំបន់សមុទ្រដែលសម្បូរធនធាន និងជាផ្លូវនាវាចរណ៍ដ៏សំខាន់បំផុតមួយលើពិភពលោក។ ការលុបចោលជំនួបនេះ ក៏ជាសញ្ញាបង្ហាញពីការប្រឈមមុខរវាងមហាអំណាចទាំងពីរ ដែលកំពុងប្រទាំងប្រទើសលើរឿងពាណិជ្ជកម្ម៕
Tag:
អាមេរិក
ចិន
វ៉ាង យី
Mike Pompeo
© រក្សាសិទ្ធិដោយ thmeythmey.com