សភាមីយ៉ាន់ម៉ាធ្វើវិសោធនកម្មច្បាប់ដើម្បីបើកផ្លូវឲ្យអង្គភាពប្រឆាំងពុករលួយស៊ើបមន្ត្រីដែលមានបានខុសប្រក្រតី

អន្តរជាតិ

សភាមីយ៉ាន់ម៉ាធ្វើវិសោធនកម្មច្បាប់ដើម្បីបើកផ្លូវឲ្យអង្គភាពប្រឆាំងពុករលួយស៊ើបមន្ត្រីដែលមានបានខុសប្រក្រតី

25, May 2018 , 2:40 pm

រូបភាព

ដោយ:

សភាជាន់ខ្ពស់មីយ៉ាន់ម៉ា បានអនុម័តលើសេចក្តីស្នើច្បាប់វិសោធនកម្មពាក់ព័ន្ធនឹងការផ្តល់សិទ្ធិអំណាចបន្ថែម និងកាន់តែមានឥទ្ធិពលសម្រាប់អង្គភាពប្រឆាំងអំពើពុករលួយរ។ ការអនុម័តលើសេចក្តីស្នើច្បាប់នេះ ធ្វើឡើងក្នុងគោលបំណងដើម្បីធានាឲ្យបាននូវភាពស្អាតស្អំរបស់មន្ត្រីរដ្ឋាភិបាល ដែលជាគោលនយោបាយចម្បងមួយរបស់រដ្ឋាភិបាលស៊ីវិលលោកស្រីអ៊ុងសាន ស៊ូជី ។

បើមិនមានការជំទាស់ពីសភាជាន់ទាបមីយ៉ាន់ម៉ានោះទេ សេចក្តីស្នើច្បាប់វិសោធនកម្ម ដែលផ្តល់សិទ្ធិអំណាចកាន់តែធំទៅឲ្យអង្គភាពប្រឆាំងអំពើពុករលួយមីយ៉ាន់ម៉ាក្នុងការបំពេញបេសកកម្មបោសសម្អាតអំពើពុករលួយ និងសូកប៉ាន់ នឹងត្រូវប្រកាសដាក់ឲ្យប្រើប្រាស់ជាធរមាននាពេលឆាប់ៗនេះហើយ ។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy នៅថ្ងៃ២៣ ឧសភា ។

តាមប្រភពព័ត៌មានដដែលនោះ សេចក្តីស្នើច្បាប់ ដែលទើបតែអនុម័តដោយសភាជាន់ខ្ពស់មីយ៉ាន់ម៉ានេះ បានផ្តល់សិទ្ធិអំណាចដល់អង្គភាពប្រឆាំងអំពើពុករលួយ ក្នុងការស៊ើបអង្កេតដោយប្រើប្រាស់យុទ្ធសាស្ត្ររបស់ខ្លួនលើរាល់មន្ត្រីស៊ីវិលទាំងឡាយណា ដែលត្រូវបានមើលឃើញថា មានភាពមានបានឬសម្បូរបែបខុសពីប្រក្រតី ខណៈច្បាប់មុន អង្គភាព អាចធ្វើបានដោយតាមរយៈបណ្តឹងផ្លូវការប៉ុណ្ណោះ ។

ជាមួយគ្នានេះ តាមការអះអាងរបស់សមាជិកសភាជាន់ខ្ពស់មីយ៉ាន់ម៉ាលោក Aung Thein វិសោធនកម្មច្បាប់នេះ មានគោលដៅពង្រឹងប្រសិទ្ធភាពរបស់អង្គភាពប្រឆាំងអំពើពុករលួយក្នុងការកម្ចាត់បញ្ហាអំពើពុករលួយ ដែលមានចាស់ឬសយ៉ាងជ្រៅ ទាំងលើសកម្មភាពលួចកញ្ចប់ថវិការដ្ឋដោយស្ថាប័ន និងដោយមន្ត្រីជាដើម ។

គួរជម្រាបផងដែរថា នាឱកាសបុណ្យទឹក ឬបុណ្យចូលឆ្នាំមីយ៉ាន់ម៉ាកន្លងទៅ ប្រធានាធិបតីថ្មីមីយ៉ាន់ម៉ា ក៏បានប្រកាសព្រមានរួចទៅហើយអំពីចំណាត់ការរបស់លោកក្នុងការបោសសម្អាតអំពើពុករលួយនៅក្នុងអង្គភាពសាធារណៈ។ នាពេលនោះ លោកប្រធានាធិបតី បានលើកឡើងពីការខិតខំរបស់រដ្ឋាភិបាលក្នុងការរិះរកមធ្យោបាយដំឡើងប្រាក់បៀវត្ស ដូច្នេះ មន្ត្រីស៊ីវិល ក៏គួរតែបំពេញការងារខ្លួនឲ្យបានខ្ជាប់ខ្ជួនផងដែរ៕