កីឡាអន្តរជាតិ
អន្តរជាតិ
Liverpool ទិញបាន Fabinho ពី Monaco តម្លៃ ៥៣លានដុល្លារ
× Liverpool ទើបនឹងចុះកិច្ចព្រមព្រៀងនាំយកខ្សែបម្រើ Fabinho ពី AS Monaco ក្នុងតម្លៃផ្ទេរ ៤០លានផោន ជាង៥៣លានដុល្លារអាមេរិក។
បើតាមការផ្សាយរបស់គេហទំព័រផ្លូវការបស់ Liverpool ខ្សែបម្រើការពារសញ្ជាតិប្រេស៊ីលវ័យ ២៤ ឆ្នាំរូបនេះនឹងចូលរួមជាមួយក្រុមជើងឯករងក្របខណ្ឌ Champions League ឆ្នាំ២០១៨ នៅថ្ងៃទី ១ ខែកក្កដា បន្ទាប់ពីបង្ហាញខ្លួន ២២៥ប្រកួត និងស៊ុតបញ្ចូលទី២៩គ្រាប់ឲ្យក្រុមមកពីលីគកំពូលបារាំង។ Fabinho ជាសមាជិកម្នាក់ដែលជួយឲ្យ Monaco ឈ្នះជើងឯក Ligue 1 កាលពីរដូវកាល ២០១៦-២០១៧។
ការមកដល់ទឹកដី Anfield របស់អតីតកីឡាករ Real Madrid និងRio Ave នេះត្រូវបានគេមើលឃើញថានឹងត្រូវជំនួសតំណែង Emre Can ដែលមានបំណងចាកចេញនៅរដូវកាលក្រោយនេះ។
«នេះគឺជាអ្វីដែលខ្ញុំតែងតែចង់បាន។ នេះគឺជាក្រុមដ៏ធំមួយ។ ខ្ញុំពិតជារំភើបណាស់»។ Fabinho និយាយដូច្នេះ។
ចំណែកអ្នកចាត់ការទូទៅហង្សក្រហមលោក Jurgen Klopp ជឿជាក់ថាការមកដល់របស់ Fabinho មិនត្រឹមតែបង្កើនគុណភាពនៅតំបន់ការពារនោះទេ ហើយអាចនាំលេងនៅតំបន់បម្រើឲ្យរឹតតែមុតស្រួចថែមទៀត។
Klopp បានប្រាប់ Liverpoolfc.com ថា៖«យើងបានចុះហត្ថលេខាជាមួយកីឡាករដ៏អស្ចារ្យ។ រូបគេមានសមត្ថភាព និងស្មារតីក្នុងការលេងនៅកម្រិតខ្ពស់បំផុតសម្រាប់មុខតំណែងមួយចំនួន។ គាត់ជាកីឡាករដែលលេងដោយភាពវ័យឆ្លាត ហើយខ្ញុំគិតថាគាត់នឹងធ្វើឲ្យក្រុមរបស់យើងប្រសើរឡើង និងគុណភាពលេងខ្ពស់ជាងមុន»៕
Tag:
បាល់ទាត់
Fabinho
Monaco
Liverpool
© រក្សាសិទ្ធិដោយ thmeythmey.com