«ថៅកែចិត្តចោរ» វណ្ណកម្មអក្សរសិល្ប៍ទំនើប ដែលស្តែងថាអយុត្តិធម៌មានតាំងពីមុន

ជាតិ

បទយកការណ៍ / បទសម្ភាសន៍

«ថៅកែចិត្តចោរ» វណ្ណកម្មអក្សរសិល្ប៍ទំនើប ដែលស្តែងថាអយុត្តិធម៌មានតាំងពីមុន

29, May 2018 , 7:19 pm

រូបភាព

ដោយ: ប៉ូ សាគុន

ល្ខោននិយាយ«រឿងថៅកែចិត្តចោរ» ជាវណ្ណកម្មអក្សរសិល្ប៍ទំនើប ដែលជាស្នាដៃនិពន្ធរបស់លោក អ៊ុំ ឈឺន និងលោក ពៅ យូឡេង ក្នុងឆ្នាំ១៩៥៦។ រឿងនេះជាអក្សរសិល្បិ៍ខ្មែរបែបទំនើប ដែលបានបង្ហាញអំពីតថភាពសង្គមខ្មែរនាសម័យនោះ ដែលមានទាំង ភាពអយុត្តិធម៌ក្នុងសង្គម ភាពឆោតល្ងង់របស់កម្មករគ្មានចំណេះដឹង ភាពទាល់ច្រកព្រោះក្រីក្រ និងភាពមិនប្រាកដប្រជារបស់យុវជន ទៅលើភាពអយុត្តិធម៌សង្គម។ តថភាពទាំងនេះ ក៏នៅតែបន្តមាននៅក្នុងសង្គមខ្មែរបច្ចុប្បន្នដែរ។

លោក សិទ្ធ ពិសី ជានិស្សិតមួយរូបដែលបានមើលល្ខោននិយាយរឿង «ថៅកែចិត្តចោរ» បាននិយាយថា រឿងនេះដ្បិតតែឆ្លុះបញ្ចាំងពីតថភាពសង្គមកាលពីសម័យនោះក្ដី តែទិដ្ឋភាពទាំងនោះនៅតែមានមកដល់បច្ចុប្បន្ន។ លោកហ៊ានអះអាងដូច្នេះ ព្រោះគ្រួសាររបស់លោក ក៏ធ្លាប់ទទួលរងភាពអយុត្តិធម៌ លើការកាត់ក្ដីដែរ។ លោក សិទ្ធ ពិសី បញ្ជាក់ថា៖«ជីវភាពរស់នៅប្រចាំថ្ងៃ មានអំពើពុករលួយបែបនេះ។ ជាក់ស្ដែងរឿងនេះ ដូចជារឿងគ្រួសារខ្ញុំអីចឹង។ មានអ្នកស៊ីសំណូក ក្នុងរឿងក្ដីបែបនេះដែរ។ រឿងនេះ មានតាំងពីមុនរហូតដល់ឥឡូវ»។

អ្នកទស្សនាមួយរូបទៀត គឺអ្នកស្រី ស្អាត ស៊ីវន អាយុ៦៦ឆ្នាំ ហាក់មិនសូវសប្បាយចិត្តឡើយ នៅពេលដែលរឿងនេះ បញ្ចប់ត្រង់ចំណុច ឱ្យមនុស្សការពារយុត្តិធម៌ត្រូវបានសមត្ថកិច្ចចាប់ខ្លួន ព្រោះតែការស៊ីសំណូក អ្នកស្រីយល់ថាការណ៍នេះមិនបានផ្ដល់យុត្តិធម៌ឱ្យដល់អ្នកស្លូតត្រង់។ អ្នកស្រី ស៊ីវន បញ្ជាក់៖«រឿងនេះបង្ហាញពីបញ្ហាសង្គមពិតៗ។ វាពិតជាមានបែបនេះមែន តែខ្ញុំមិនសូវពេញចិត្តនៅវគ្គបញ្ចប់ទេ។ ខ្ញុំចង់ឱ្យគេរកយុត្តិធម៌ឱ្យអ្នកស្លូតត្រង់ មិនមែនចាប់គេដាក់គុកទេ»។

ជាសាស្ត្រាចារ្យបង្រៀនផ្នែកនាដសាស្ត្រនិយាយនៅសាកលវិទ្យាល័យភូមិន្ទវិចិត្រសិល្បៈលោក អន សុភៈ ដែលបានដើរតួជាថៅកែ ក្នុងរឿងនេះ បានលើកឡើងថាល្ខោននិយាយរឿង«ថៅកែចិត្តចោរ»នេះ បានឆ្លុះបញ្ចាំងពីភាពអវិជ្ជមាន ច្រើនជាងវិជ្ជមាន ដើម្បីឱ្យអ្នកមើលបានពិចារណាឱ្យឃើញថា ត្រូវធ្វើយ៉ាងណាឱ្យកើតមានភាពយុត្តិធម៌ក្នុងសង្គម។

លោកបានសង្កត់ធ្ងន់ថា ក្នុងវគ្គមួយបង្ហាញពីយុវជនមួយរូប ដែលទើបបញ្ចប់ការសិក្សា គេមិនហ៊ាននិយាយថា គេនឹងមិនទទួលសំណូកឡើយ ប្រសិនបើគេធ្វើការក្នុងរាជការ។ លោកថា យុវជនខ្មែរមួយចំនួននៅក្នុងសង្គមបច្ចុប្បន្ន ក៏ស្ថិតក្នងសភាពដូចយុវជននៅក្នុងរឿងនេះដែរ ព្រោះពេលគេនៅរៀន គេតែងជេរអ្នកប្រព្រឹត្តអំពើរពុករលួយ តែដល់ខ្លួនបានធ្វើការនោះរិញ ក៏ប្រព្រឹត្តដូចគេដែរ។ លោក អន សុភៈ បញ្ជាក់៖«យុវជន គាត់មិនទាន់យល់ច្បាស់ទេ ថាអ្វីជាយុត្តិធម៌សង្គម។ មកដល់បច្ចុប្បន្ន ក៏មានយុវជនបែបនេះដែរ។ ឃើញគេពុករលួយ ត្មះតិះដៀលគ្រប់បែបយ៉ាង តែដល់ខ្លួនឡើងវិញដូចគេដែរ»។

សូមស្ដាប់សំឡេងរឿង«ថៅកែចិត្តចោរ» ត្រង់ឈុត តៃកុងហំ សួរទៅយុវជនទើបបញ្ចប់ការសិក្សាពីបញ្ហាស៊ីសំណូករបស់មន្ត្រីរាជការ៖

តួសម្តែងនីមួយៗ ត្រូវបានជម្រុះដល់ទៅ៣ដង ដើម្បីរកតួដែលត្រូវនឹងចរិតតួអង្គ។ ចំណែកឯពេលវេលាហាត់សមវិញ គឺបានចំណាយពេលកន្លះឆ្នាំ ដើម្បីមកសម្ដែងលើឆាកតែរយៈពេលជិតមួយម៉ោងតែប៉ុណ្ណោះ។ នេះជាការបញ្ជាក់របស់ លោក សួង សុភ័ក្រ អ្នកដឹកនាំការសម្តែងល្ខោននិយាយរឿង «ថៅកែចិត្តចោរ»។

លោក សួង សុភ័ក្រ លើកឡើងបន្តថា រឿងនេះមានក្នុងកម្មវិធីសិក្សារបស់ក្រសួង ហើយវាបានផ្ដល់តម្លៃគំនិតអប់រំច្រើនដល់សង្គម។ លោក សុភ័ក្រ ក៏មានគម្រោងយករឿងនេះ ផលិតជាភាពយន្តខ្នាតធំនៅពេលខាងមុខផងដែរ ដែលគ្រោងចំណាយដើមទុនជិត១៥ម៉ឺនដុល្លារ។ គម្រោងផលិតជាភាពយន្តនេះ គឺមិនត្រឹមតែសម្រាប់បញ្ចាំងនៅតាមបណ្តារោងភាពយន្តនោះទេ តែលោក សុភ័ក្រក៏មានមហិច្ឆតា បញ្ចាំងនៅក្នុងតំបន់អាស៊ី អ៊ឺរ៉ុប និងអាចសហការជាមួយក្រសួងអប់រំ ដើម្បីយកទៅបញ្ចាំងឱ្យសិស្សមើលផងដែរ។លោក សួង សុភ័ក្រ បញ្ជាក់៖ «ខ្ញុំសប្បាយចិត្ត ថ្ងៃនេះមានអ្នកទស្សនាច្រើន។ វាជាជោគជ័យហើយ។ ខ្ញុំសំណូមពរឱ្យយុវជនគ្រប់រូបគាំទ្រ ឱ្យតម្លៃសិល្បៈខ្មែរគ្រប់ទម្រង់ទាំងអស់។ រឿងនេះ ខ្ញុំបានបំបែកជាភាពយន្តរួចហើយ។ ពេលនេះកំពុងស្វែងរកដៃគូសហការផលិត។ បើសិនជាអាច ខ្ញុំចង់សហការជាមួយក្រសួងអប់រំ ដើម្បីយករឿងនេះ ទៅចាក់ឱ្យសិស្សមើល អាចដាក់ក្នុងកម្មវិធីសិក្សាតែម្ដង តែយើងមិនដឹងថា នឹងអាចសម្រេចបានប៉ុណ្ណាឡើយ វាគ្រាន់តែជាគម្រោងសិន»៕

សូមស្ដាប់សំឡេងរឿង”ថៅកែចិត្តចោរ” ត្រង់ឈុតនគរបាលជាតិ ទទួលសំណូក ពីថៅកែ និងចាប់តៃកុងហំ និងកម្មករ៖