អន្តរជាតិ
អាមេរិកឲ្យឥណ្ឌាពិចារណាផលវិបាកទាំងឡាយសិន មុនទិញប្រព័ន្ធការពារអាកាស S-400 ពីរុស្ស៊ី ប្រព័ន្ធការពារអាកាស S-400 របស់រុស្ស៊ី (រូបភាព AFP)
× សហរដ្ឋអាមេរិកបានព្រមានឥណ្ឌាពីផលវិបាកទាំងឡាយដែលអាចកើតឡើង បើសម្រេចចិត្តទិញប្រព័ន្ធការពារអាកាសដ៏មានឥទ្ធិពល S-400 របស់រុស្ស៊ី។ ឥណ្ឌាដែលជាម៉ូយដុំរបស់អាមេរិក និងរុស្ស៊ី អាចប្រកាសបំណងទិញប្រព័ន្ធការពារនេះនៅដំណាច់ឆ្នាំនេះ ដែលវាជារឿងដែលធ្វើឲ្យអាមេរិកមិនសូវសប្បាយចិត្តឡើយ។ មុននេះអាមេរិកក៏ទើបគំរាមដាក់ទណ្ឌកម្មលើតួកគីដែលចង់ទិញអាវុធយុទ្ធភណ្ឌរបស់រុស្ស៊ីដូចគ្នាដែរ។
ផែនការទិញប្រព័ន្ធការពារមីស៊ីល S-400 របស់រុស្ស៊ីពីសំណាក់ឥណ្ឌា ធ្វើឲ្យអាមេរិកខ្វល់ខ្វាយយ៉ាងខ្លាំង។ លោក Mac Thornberry ប្រធានគណៈកម្មាធិការកិច្ចការកងទ័ពដ៏មានឥទ្ធិពលរបស់សភាអាមេរិកនិយាយថា ការទិញសញ្វវុធពីរុស្ស៊ី នឹងរារាំងដល់កិច្ចសហប្រតិបត្តិការរួមគ្នារវាងឥណ្ឌា និងអាមេរិក ហើយអាមេរិកអាចលែងចែករំលែកព័ត៌មានឲ្យឥណ្ឌាផងដែរ។ លោកបានប្រាប់ឲ្យឥណ្ឌាពិចារណាពីផលវិបាក មុននឹងសម្រេចចិត្តទិញ។
ក្នុងកិច្ចសម្ភាសជាមួយសារព័ត៌មានឥណ្ឌា Economics Times នៅថ្ងៃទី២៩ ខែឧសភា លោក Thornberry បញ្ជាក់ថា ទាំងរដ្ឋបាលលោក ដូណាល់ ត្រាំ ទាំងសភា សុទ្ធតែបារម្ភពីគម្រោងទិញ S-400 នេះទាំងអស់ ហើយក៏បានប្រាប់ពីការព្រួយបារម្ភនេះទៅកាន់អង្គភាពពាក់ព័ន្ធគ្រប់កម្រិតដែរ។ សមាជិកសភាពដែលកំពុងទស្សនកិច្ចនៅឥណ្ឌារូបបន្តថា អាមេរិកក៏ពិបាកចែករំលែកបច្ចេកវិទ្យាសំខាន់ទៅឲ្យឥណ្ឌាដែរ ដោយសារការផែនការទិញ S-400 នេះ។
«វាជាការព្រួយបារម្ភនៅពេលប្រទេសមួយទិញប្រព័ន្ធការពារដែលធ្វើឲ្យស្មុគស្មាញដល់សមត្ថភាពធ្វើការជាមួយយោធាអាមេរិក»។ នេះជាការលើកឡើងរបស់លោក Thornberry មុននឹងនិយាយបែបក្រើនរំឭកឥណ្ឌាឲ្យចំណាយពេលគិតគូរឲ្យម៉ត់ចត់ជុំវិញការទិញអាវុធរបស់រុស្ស៊ី។ លោកក៏បានភ្ជាប់ករណីនេះទៅកាន់គម្រោងផ្ទេរបច្ចេកវិទ្យាអាមេរិកទៅឲ្យឥណ្ឌាដែលត្រូវប្រើប្រាស់ក្នុងការផលិតយន្តហោះចម្បាំងផង។
ផែនការទិញប្រព័ន្ធការពារ S-400 នេះ អាចត្រូវចុះហត្ថលេខាផ្លូវការនៅក្នុងខែតុលាខាងមុខ ហើយវានឹងប៉ះពាល់ដល់គម្រោងលក់យន្តហោះគ្មានអ្នកបើករបស់អាមេរិកផង ខណៈរដ្ឋបាលលោក ត្រាំ បានទើបបានប្រកាសផែនការសម្រួលការទិញអាវុធពីសំណាក់ប្រទេស។ ផែនការថ្មីនេះមានគោលដៅអនុញ្ញាតឲ្យក្រុមហ៊ុនផលិតអាវុធអាមេរិកលក់អាវុធទៅឲ្យសម្ព័ន្ធមិត្តអាមេរិកផ្ទាល់ ដោយមិនចាំបាច់ឆ្លងកាត់ក្រសួងការបរទេស មន្ទីរបញ្ចកោណ និងសភាឡើយ។
ឥណ្ឌាមិនមែនជាប្រទេសទីមួយដែលរងសម្ពាធពីអាមេរិកឲ្យពិចារណាការទិញប្រព័ន្ធការពាររបស់រុស្ស៊ីឡើងវិញឡើយ។ តួកគី ដែលជាសម្ព័ន្ធមិត្តអាមេរិក និងជាសមាជិកសម្ព័ន្ធយោធាណាតូដែរនោះ ក៏រងការគំរាមកំហែងពីអាមេរិកដែរ។ ក្រុងវ៉ាស៊ីនតោនបានគំរាមឈប់លក់យន្តហោះចម្បាំងស៊េរីទំនើប F-35 បើក្រុងអង់ការ៉ានៅតែជម្នះទិញ S-400 របស់រុស្ស៊ីនោះ៕
Tag:
អាមេរិក
ឥណ្ឌា
រុស្ស៊ី
© រក្សាសិទ្ធិដោយ thmeythmey.com