អន្តរជាតិ
អាមេរិកដូរឈ្មោះទីបញ្ជាការយោធាប្រចាំតំបន់ប៉ាស៊ីហ្វិកទៅជា «ឥណ្ឌូ-ប៉ាស៊ីហ្វិក» រដ្ឋមន្រ្តីការពារជាតិអាមេរិក ជេម ម៉ាធីស ក្នុងពិធីផ្លាស់ប្ដូរតំណែងមេបញ្ជាការយោធាអាមេរិកប្រចាំឥណ្ឌូ-ប៉ាស៊ីហ្វិក (រូបភាពពីក្រសួងការពារជាតិអាមេរិក)
× រដ្ឋមន្ត្រីការពារជាតិអាមេរិក ជេម ម៉ាធីស នៅថ្ងៃទី៣០ ខែឧសភា បានប្រកាសដូរឈ្មោះទីបញ្ជាការយោធាអាមេរិកប្រចាំតំបន់ប៉ាស៊ីហ្វិកទៅជា «ទីបញ្ជាការយោធាអាមេរិកប្រចាំឥណ្ឌូ-ប៉ាស៊ីហ្វិក»។ ការផ្លាស់ប្ដូរឈ្មោះនេះ ជាសញ្ញាបង្ហាញពីសារសំខាន់នៃរបស់ឥណ្ឌាក្នុងនយោបាយរបស់អាមេរិកនៅតំបន់អាស៊ីដ៏ធំនេះ ក៏ដូចជាទំនាក់ទំនងទ្វេភាគីផង។ លោក ម៉ាធីស ប្រកាសដូរឈ្មោះបែបនេះក្នុងពិធីប្រគល់តំណែងមេបញ្ជាការនៃយោធាអាមេរិកប្រចាំឥណ្ឌូ-ប៉ាស៊ីហ្វិកនៅកោះហាវ៉ៃ។
«ដោយសារកំណើនការតភ្ជាប់រវាងមហាសមុទ្រឥណ្ឌា និងប៉ាស៊ីហ្វិក យើងដូរឈ្មោះទីបញ្ជាការយោធាអាមេរិកប្រចាំប៉ាស៊ីហ្វិកទៅជាទីបញ្ជាការយោធាអាមេរិកប្រចាំឥណ្ឌូ-ប៉ាស៊ីហ្វិកវិញ»។ នេះជាការប្រកាសរបស់រដ្ឋមន្ត្រីការពារជាតិអាមេរិក ជេម ម៉ាធីស ក្នុងពិធីផ្លាស់ប្ដូរមេបញ្ជាកងទ័ពអាមេរិកប្រចាំតំបន់អាស៊ី ដោយនាយឧត្តមនាវី Philip Davidson កាន់តំណែងនេះជំនួសនាយឧត្តមនាវី Harry Harris ដែលត្រូវជ្រើសរើសជាឯកអគ្គរដ្ឋទូតអាមេរិកប្រចាំកូរ៉េខាងត្បូង។
ចាប់ពីពេលដូរឈ្មោះនេះ ទីបញ្ជាការយោធាដែលមានមូលដ្ឋាននៅកោះហាវ៉ៃមួយនេះ មានទំហំប្រតិបត្តិការគ្របដណ្ដប់ចាប់ពីព្រំដែនឥណ្ឌាជាមួយប៉ាគីស្ថាន ចិន អាស៊ីអាគ្នេយ៍ រហូតដល់អូស្ត្រាលី។ ពោល គឺគ្របដណ្ដប់មហាសមុទ្រធំចំនួនពីររបស់ពិភពលោកតែម្ដង។ ការផ្លាស់ប្ដូរឈ្មោះនេះ បានបង្ហាញពីកំណើនទំនាក់ទំនងយោធារវាងអាមេរិក និងឥណ្ឌាក្នុងគោលដៅទប់ទល់របស់ចិនក្នុងតំបន់មួយនេះដែរ។
ចំពោះមុខមន្ត្រីយោធាជាន់ខ្ពស់ជាច្រើន លោក ម៉ាធីស និយាយថា ទំនាក់ទំនងរវាងសម្ព័ន្ធអាមេរិកនៅមហាសមុទ្រឥណ្ឌា និងប៉ាស៊ីហ្វិកបានដើរតួសំខាន់ក្នុងការរក្សាស្ថិរភាពតំបន់ ហើយអាមេរិកនឹងឈរនៅជាមួយដៃគូរបស់ខ្លួនក្នុង និងគាំទ្រការសម្រេចចិត្តរបស់ពួកគេផង។ សម្រាប់លោក ម៉ាធីស ប្រទេសក្នុងតំបន់ទាំងអស់ មិនថាតូចឬធំឡើយ គឺសុទ្ធតែមានតួនាទីសំខាន់ដើម្បីរក្សាលំនឹងក្នុងតំបន់ដ៏សំខាន់របស់ពិភពលោកមួយនេះ។
ឆ្លៀតឱកាសនោះ រដ្ឋមន្ត្រីការពារជាតិអាមេរិកក៏ប្រកាសដែរថា អាមេរិកនឹងបន្តជួយពង្រឹងស្ថិរភាពតំបន់ឥណ្ឌូ-ប៉ាស៊ីហ្វិក ព្រមទាំងជួយជំរុញការបើកចំហនៃសណ្ដាប់ធ្នាប់អន្តរជាតិដែលបានជួយឲ្យតំបន់នេះលូតលាស់អស់ពេល៧០ឆ្នាំមកហើយនោះ។ យ៉ាងណាមិញ ទោះជាអាមេរិកត្រៀមខ្លួនឆ្លើយតបទៅនឹងប្រទេសណាដែលចង់សាកល្បងការតាំងចិត្តរបស់អាមេរិកក្ដី លោក ម៉ាធីស អះអាងថា យុទ្ធសាស្ត្រការពារជាតិរបស់អាមេរិក មិនមែនជាយុទ្ធសាស្ត្រប្រឈមមុខឡើយ។
ការផ្លាស់ប្ដូរឈ្មោះនេះ ទំនងជាសញ្ញាប្រាប់សម្ព័ន្ធមិត្តអាមេរិកនៅក្នុងតំបន់អាស៊ីឲ្យត្រជាក់ចិត្តដែរ ដ្បិតកន្លងមកមានការព្រួយបារម្ភច្រើនជុំវិញលទ្ធភាពដែលលោក ត្រាំ អាចកាត់បន្ថយតួនាទីរបស់អាមេរិក ស្របពេលឥទ្ធិពលចិនកើនឡើងខ្លាំងនោះ។ ដោយមិននិយាយចំឈ្មោះចិន លោក ម៉ាធីស បញ្ជាក់ថា អាមេរិកបើកចំហសម្រាប់ការសន្ទនាជាមួយគូប្រជែងរបស់ខ្លួនលើបញ្ហាដែលពាក់ព័ន្ធផលប្រយោជន៍អាមេរិក ឬក៏សម្ព័ន្ធមិត្តក្នុងតំបន់របស់អាមេរិក៕
Tag:
អាមេរិក
ឥណ្ឌូ-ប៉ាស៊ីហ្វិក
USINDOPACOM
© រក្សាសិទ្ធិដោយ thmeythmey.com