សម្ព័ន្ធមិត្តអាមេរិកតបតភ្លាមៗ ក្រោយ ត្រាំ អនុវត្តពន្ធលើដែកថែបនិងអាលុយមីញ៉ូម

អន្តរជាតិ

សម្ព័ន្ធមិត្តអាមេរិកតបតភ្លាមៗ ក្រោយ ត្រាំ អនុវត្តពន្ធលើដែកថែបនិងអាលុយមីញ៉ូម

01, Jun 2018 , 5:02 pm

រូបភាព

រូបភាព AFP

ដោយ: តន ចាន់រិទ្ធារ៉ា

បន្ទាប់ពីលើកលែងការអនុវត្តជាច្រើនខែរួចមក រដ្ឋបាលប្រធានាធិបតី ដូណាល់ ត្រាំ នៅថ្ងៃទី៣១ ខែឧសភា បានប្រកាសចាប់ផ្ដើមអនុវត្តពន្ធថ្មីលើផលិតផលដែកថែបចំនួន២៥ភាគរយ និងអាលុយមីញ៉ូមចំនួន១០ភាគរយដែលនាំចូលពីកាណាដា ម៉ិកស៊ិក និងអឺរ៉ុប។ រដ្ឋាភិបាលទាំងបីនេះបានបង្ហាញការមិនសប្បាយចិត្តយ៉ាងខ្លាំងចំពោះអាមេរិក ដោយចាត់ទុកចំណាត់ការនេះជារឿងមិនអាចទទួលយកបានទៀតផង។ កាណាដា និងម៉ិកស៊ិកបានឆ្លើយតបវិញភ្លាមៗ ខណៈអឺរ៉ុបនឹងមានវិធានការនៅពេលខាងមុខ។

អស់ច្រើនខែនៃភាពមិនច្បាស់លាស់ និងការចរចា អាមេរិកនៅតែសម្រេចចិត្តអនុវត្តពន្ធថ្មីលើសម្ព័ន្ធមិត្តរបស់ខ្លួនដោយគ្មានការលើកលែងអ្វីទៀតឡើយ។ ការយកពន្ធនាំចូលដែកថែបចំនួន២៥ភាគរយ និងអាលុយមីញ៉ូមចំនួន១០ភាគរយ ដែលលោកប្រធានាធិបតី ដូណាល់ ត្រាំ ប្រកាសតាំងពីខែមីនា នឹងចាប់ផ្ដើមអនុវត្តចាប់ពីថ្ងៃទី១ ខែមិថុនានេះតទៅ។ កាលនោះ អាមេរិកមិនទាន់អនុវត្តវិធានការថ្មីដើម្បីស្វែងរកដំណោះស្រាយសិន ប៉ុន្តែគ្មានបានផ្លែផ្កាអ្វីទេ។

ការចាប់ផ្ដើមអនុវត្តពន្ធនេះ ត្រូវបានប្រកាសដោយរដ្ឋមន្ត្រីពាណិជ្ជកម្ម Wilbur Ross នៅថ្ងៃទី៣១ ខែឧសភា ហើយដែលធ្វើឲ្យគេឯងបារម្ភថា ជម្លោះពាណិជ្ជកម្មអាចរាលដាលពេញពិភពលោកតាមរយៈការចាត់វិធានការសងសឹកគ្នាទៅមក។ កាន់តែសំខាន់ ចំណាត់ការរបស់លោក ត្រាំ លើកាណាដា ម៉ិកស៊ិក និងអឺរ៉ុប ក៏ធ្វើឲ្យទំនាក់ទំនងរវាងអាមេរិក និងសម្ព័ន្ធមិត្តជិតស្និទ្ធរបស់ខ្លួនកាន់តែល្អក់កករខ្លាំងផងដែរ។

មូលហេតុនៃដែលនាំឲ្យមានការអនុវត្តពន្ធនេះ ក៏ដោយសារលោក ត្រាំ មិនពេញចិត្តនឹងការរកស៊ីដែលអាមេរិកជាអ្នកខាត ហើយដៃគូរបស់អាមេរិកចំណេញប្រាក់ច្រើន។ លោកអះអាងថា លោកនឹងការពារ ប្រយោជន៍ក្រុមហ៊ុនក្នុងស្រុកអាមេរិក បង្កើតការងារឲ្យប្រជាជន ព្រមទាំងធ្វើឲ្យពាណិជ្ជកម្មទ្វេភាគីមានយុត្តិធម៌ឡើងវិញ។ មេដឹកនាំអាមេរិករូបនេះក៏បានយកបញ្ហាសន្តិសុខជាតិធ្វើជាលេសដើម្បីបង្កើនពន្ធនាំចូលផង។

១. កាណាដា និងម៉ិកស៊ិកតបតវិញភ្លាម

ភ្លាមៗក្រោយអាមេរិកសម្រេចចិត្តយកពន្ធដ៏ច្រើន រដ្ឋាភិបាលកាណាដា និងម៉ិកស៊ិកក៏បានចាត់វិធានការតបវិញទាន់ចិត្តដែរ។ កាណាដា ដែលជាអ្នកនាំចូលដែកថែប និងអាលុយមីញ៉ូមធំជាងគេទៅកាន់អាមេរិក បានប្រកាសដាក់ពន្ធ២៥ភាគរយ និង១០ភាគរយលើផលិតផលអាមេរិកដូចជាលោកហៈ អាហារកសិកម្ម និងទំនិញដទៃទៀតដែលមានតម្លៃដល់ទៅ១២.៨ពាន់លានដុល្លារឯណោះ។ នាយករដ្ឋមន្ត្រីកាណាដា ចាស្ទីន ទ្រូដូ និយាយថា កាណាដាក្លាយជាការគំរាមសន្តិសុខអាមេរិកមិនមែនជារឿងប្លែកមែនទែន។

ចំណែកឯម៉ិកស៊ិកវិញ ដែលកំពុងទាស់ជាមួយអាមេរិករឿងជញ្ជាំងព្រំដែននោះ ក៏បានឆ្លើយតបវិញដូចគ្នាដែរតាមរយៈការប្រកាសពន្ធលើទំនិញអាមេរិកដូចជាសាច់ជ្រូក ផ្លែឈើ និងដែកបន្ទះជាដើម។ ក្រុងម៉ិកស៊ីកូនិយាយថា វិធានការរបស់ខ្លួនជាការរឿងស្មើភាពទៅនឹងអ្វីដែលអាមេរិកបានធ្វើ។ ជាមួយគ្នានេះ តម្លៃលុយម៉ិកស៊ិកក៏បានធ្លាក់ចុះដល់កម្រិតទាបបំផុតបើប្រៀបធៀបនឹងលុយដុល្លារក្នុងរយៈ១៥ខែមកនេះ។

២. អឺរ៉ុបរៀបចំបញ្ជីទំនិញដើម្បីដំឡើងពន្ធវាយបកអាមេរិកវិញ

ខណៈកាណាដា និងម៉ិកស៊ិកមានវិធានការតបអាមេរិកភ្លាមៗ អឺរ៉ុបក៏បានប្រកាសដែរថា ខ្លួននឹងធ្វើដូចគ្នាដែរ។ ប្រទេសសមាជិកអឺរ៉ុប ដែលមានឈ្មោះជាសម្ព័ន្ធមិត្តឆ្លងអាត្លង់ទិក និងធ្លាប់ប្រកៀកស្មាគ្នាជាច្រើនឆ្នាំ ខឹងសម្បារនឹងការអនុវត្តពន្ធរបស់អាមេរិកជាខ្លាំង។ ប្រធានគណៈកម្មការអឺរ៉ុប Jean-Claude Juncker ចាត់ទុកសកម្មភាពរបស់អាមេរិកជារឿងមិនអាចទទួលយកបាន និងបានសន្យាបញ្ចេញចំណាត់ការតបវិញ។

យោងតាមទីភ្នាក់ងារព័ត៌មាន AFP ប្រធានាធិបតីបារាំង អេម៉ានុយអែល ម៉ាក្រុង បានជជែកតាមទូរសព្ទជាមួយសមភាគីអាមេរិក ត្រាំ ជុំវិញពន្ធនេះនៅយប់ថ្ងៃទី៣១ ខែឧសភា។ លោក ម៉ាក្រុង បានប្រាប់លោក ត្រាំ ថា ការអនុវត្តពន្ធរបស់អាមេរិកលើដែកថែប និងអាលុយមីញ៉ូមជារឿងខុសច្បាប់ ហើយថា អឺរ៉ុបនឹងតបតវិញដោយវិធីសាស្ត្រដាច់ខាតតែម្ដង។ ប្រមុខបារាំងក៏ស្នើឲ្យអាមេរិកចរចាជាមួយសម្ព័ន្ធមិត្ត និងដៃគូពាណិជ្ជកម្មដើម្បីពង្រឹងច្បាប់អង្គការពាណិជ្ជកម្មពិភពលោក។

សម្រាប់អង់គ្លេសវិញ អាមេរិកមិនគួរអនុវត្តចំណាត់បែបនេះលើសម្ព័ន្ធមិត្តរបស់ខ្លួនឡើយ។ អ្នកនាំពាក្យរដ្ឋាភិបាលអង់គ្លេសនិយាយថា អង់គ្លេស និងសមាជិកសហភាពអឺរ៉ុបផ្សេងទៀតគឺជាមិត្តជិតស្និទ្ធរបស់អាមេរិក ដូចនេះគួរតែទទួលបានការលើកលែងពន្ធទាំងស្រុង និងអចិន្ត្រៃយ៍។ ចំណែកឯអធិការបតីវ័យក្មេងអូទ្រីស Sebastian Kurz អះអាងថា អឺរ៉ុបមិនត្រូវការសង្គ្រាមពាណិជ្ជកម្មជាមួយអាមេរិក តែត្រូវឆ្លើយតបការសម្រេចិត្តរបស់អាមេរិកវិញ៕