តៃវ៉ាន់ឲ្យហៃទីខ្ចី១៥០លានដុល្លារដើម្បីអភិវឌ្ឍប្រទេស ស្របពេលបាត់បង់មិត្តជាបន្តបន្ទាប់

អន្តរជាតិ

នយោបាយអន្តរជាតិ

តៃវ៉ាន់ឲ្យហៃទីខ្ចី១៥០លានដុល្លារដើម្បីអភិវឌ្ឍប្រទេស ស្របពេលបាត់បង់មិត្តជាបន្តបន្ទាប់

02, Jun 2018 , 7:39 pm

រូបភាព

ប្រធានាធិបតីហៃទី Jovenel Moise អមដំណើរដោយសមភាគីតៃវ៉ាន់ Tsai Ing-wen នាដំណើរទស្សនកិច្ចនៅតៃវ៉ាន់ (រូបភាព AFP)

ដោយ: តន ចាន់រិទ្ធារ៉ា

កោះតៃវ៉ាន់មានផែនការឲ្យសម្ព័ន្ធមិត្តតំបន់ការ៉ាអ៊ីបហៃទីខ្ចីលុយចំនួន១៥០លានដុល្លារដើម្បីអភិវឌ្ឍហេដ្ឋារចនាសម្ព័ន្ធរបស់ខ្លួន។ ហៃទីដែលជារដ្ឋក្រីក្រ កំពុងត្រូវការជំនួយយ៉ាងច្រើនដើម្បីកសាងប្រទេសឡើងវិញ បន្ទាប់ពីរងគ្រោះដោយរញ្ជួយដីធ្ងន់ធ្ងរកាលពីឆ្នាំ២០១០ ។ ការផ្ដល់កម្ចីនេះ ក៏ទំនងជាផ្នែកមួយនៃការប្រឹងប្រែងរបស់តៃវ៉ាន់ក្នុងរក្សាសម្ព័ន្ធមិត្តរបស់ខ្លួនបន្ទាប់ពីបាត់បង់អស់ពីរប្រទេសក្នុងរយៈពេលត្រឹមមួយខែប៉ុណ្ណោះ។

មកទល់ពេលនេះ មានតែប្រទេសចំនួន១៨ប៉ុណ្ណោះដែលទទួលស្គាល់តៃវ៉ាន់ជារដ្ឋឯករាជ្យ។ សម្ព័ន្ធមិត្តរបស់តៃវ៉ាន់បានថយចុះជាលំដាប់ក្រោយលោកស្រី Tsai Ing-wen ក្លាយជាប្រធានាធិបតីតៃវ៉ាន់ ខណៈចិនបានបង្កើនការប្រឹងប្រឺងតាមគ្រប់វិធីសាស្ត្រដើម្បីបញ្ចប់ដង្ហើមការទូតរបស់តៃវ៉ាន់ ដែលខ្លួនចាត់ទុកជាអាណាខេត្តមួយមិនអាចបំបែកបានដាច់ខាត។ ស្របពេលបាត់បង់មិត្តជាបន្តបន្ទាប់ តៃវ៉ាន់ក៏ព្យាយាមរក្សាមិត្តដែលនៅសេសសល់របស់ខ្លួន។

ទំនងជាឆ្លើយតបវិធីសាស្ត្រទឹកលុយរបស់ចិន តៃវ៉ាន់ក៏ប្រើវិធីសាស្ត្រនេះដូចគ្នាដើម្បីទាក់ទាញសណ្ដានចិត្តប្រទេសជាមិត្តរបស់ខ្លួន ដោយបានផ្ដល់កម្ចីជាទឹកប្រាក់ចំនួន១៥០លានដុល្លារទៅឲ្យហៃទី។ អ្នកនាំពាក្យក្រសួងការបរទេសតៃវ៉ាន់ Andrew Lee និយាយនៅថ្ងៃទី៣១ ខែឧសភា ថា ជំនួយរបស់តៃវ៉ាន់មានគោលដៅអភិវឌ្ឍបណ្ដាញអគ្គិសនីនៅហៃទីដែលរងការបំផ្លិចបំផ្លាញធ្ងន់ធ្ងរដោយសាររញ្ជួយដីកាលពី៨ឆ្នាំមុន។ នេះបើតាមការផ្សាយរបស់សារព័ត៌មាន South China Morning Post ។

«កម្ចីនេះក្លាយជាយុទ្ធសាស្ត្រឈ្នះ-ឈ្នះក្នុងការជួយសម្ព័ន្ធមិត្ត (របស់តៃវ៉ាន់) តាមរយៈគម្រោងអភិវឌ្ឍហេដ្ឋារចនាសម្ព័ន្ធធំៗ ព្រមទាំងបង្កើតឱកាសធ្វើពាណិជ្ជកម្មនៅបរទេសសម្រាប់ក្រុមហ៊ុនតៃវ៉ាន់ផងដែរ។» នេះជាការបញ្ជាក់របស់អ្នកនាំពាក្យក្រសួងការបរទេសតៃវ៉ាន់។

សូមបញ្ជាក់ថា ប្រទេសដែលទទួលស្គាល់តៃវ៉ាន់ភាគច្រើននៅរដ្ឋក្រីក្រី និងជាប្រទេសដែនកោះនៅតំបន់ការ៉ាអ៊ីប និងប៉ាស៊ីហ្វិក។ ចំណែកឯទ្វីបអាហ្វ្រិកវិញ គេឃើញតែរាជាណាចក្រស្វាស៊ីឡង់មួយប៉ុណ្ណោះដែលមានទំនាក់ទំនងការទូតជាមួយតៃវ៉ាន់។ ថ្មីៗនេះ បូគីណាហ្វាសូ ទើបតែផ្ដាច់ទំនាក់ទំនងជាមួយតៃវ៉ាន់ ហើយងាករកចិនវិញ ដោយអះអាងថា ការទទួលស្គាល់ចិនជាចរន្តរបស់ពិភពលោកទាំងមូល។

បន្ទាប់ពីអូសទាញបានបូគីណហ្វាសូ ចិនក៏បានបន្តបញ្ចុះបញ្ចូលសម្ព័ន្ធមិត្តរបស់តៃវ៉ាន់ចុងក្រោយមួយទៀត។ ប្រមុខការទូតចិន វ៉ាង យី បានផ្ញើសារទៅកាន់ស្វាស៊ីឡង់ ដោយសង្ឃឹមថា ប្រទេសនេះនឹងចូលរួមជាមួយគ្រួសារអាហ្វ្រិកក្នុងការបង្កើតទំនាក់ទំនងមិត្តភាពជាមួយចិននៅពេលឆាប់ៗ ហើយរដ្ឋអាហ្វ្រិកទាំងអស់នឹងឈរជាមួយចិនក្នុងការឈានឆ្ពោះទៅរកការបង្រួបបង្រួមជាតិចិនពេញលេញ៕