ជាតិ
សម្ដេច ហ៊ុន សែន រិះគន់មន្ត្រីមានសញ្ញាបត្រខ្ពស់ ដែលអសមត្ថភាពបំពេញការងារនៅក្នុងជួររដ្ឋាភិបាល
× ភ្នំពេញ៖ ពីពិធីចែកសញ្ញាបត្រដល់សិស្សមន្ត្រី និងកម្មសិក្សាការី នៃសាលាភូមិន្ទរដ្ឋបាលនៅព្រឹកថ្ងៃទី៥ មិថុនានេះ សម្ដេចនាយករដ្ឋមន្ត្រី ហ៊ុន សែន បានរិះគន់មន្ត្រីមានសញ្ញាបត្រខ្ពស់មួយចំនួន ដែលបម្រើការងារមិនល្អ នៅក្នុងជួររដ្ឋាភិបាល។
សម្ដេច ហ៊ុន សែន បាននិយាយថា ការជឿទុកចិត្តលើសមត្ថភាពមន្ត្រីសញ្ញាបត្រខ្ពស់ខ្លះ បាននាំឲ្យរដ្ឋាភិបាល ធ្វើកិច្ចការខុសមួយចំនួនកន្លងមក។ សម្ដេច ថា ខ្លួនឈឺចាប់មិនតិចទេ ដោយសារការជឿទុកចិត្តលើមន្ត្រីទាំងនោះ។ ត្រង់ចំណុចនេះសម្ដេច ហ៊ុន សែន ចង់សំដៅទៅលើការងារកំណែទម្រង់ជាតិ និងរដ្ឋបាល ដែលមន្ត្រីអនុវត្តមិនបានល្អហើយ បែរជានាំឲ្យប៉ះពាល់ដល់កិច្ចការរដ្ឋាភិបាលទៅវិញ។ បើតាមនាយករដ្ឋមន្ត្រី រដ្ឋាភិបាលបានធ្វើកិច្ចការខុសអស់រយៈពេល១០ឆ្នាំកន្លងមក ដោយសារការផ្ដល់តម្លៃឲ្យមន្ត្រីមានសញ្ញាបត្រធំៗ ហើយបែរជាពួកគេគ្មានសមត្ថភាពបំពេញការងារ។
សូមស្ដាប់សំឡេងនាយករដ្ឋមន្រ្តី៖
ថ្លែងរិះគន់ដោយមិនបញ្ចេញឈ្មោះមន្ត្រី ប្រមុខរដ្ឋាភិបាលបានបញ្ជាក់ដូច្នេះថា៖«មិនមែនជាការបន្ដុះបង្អាប់ទេ ប៉ុន្តែអាចមកខ្ញុំជឿទុកចិត្តហួសហេតុពេក ជាមួយនឹងអ្នកមានសញ្ញាបត្រធំៗ ។ ប៉ុន្តែខ្ញុំសូមបញ្ជាក់ថា អ្នកដែលមានសញ្ញាបត្រធំ មិនព្រមធ្វើសកម្មភាព ហើយមិនយល់ដឹងកិច្ចការងារច្បាស់លាស់ មិនអាចធ្វើការកើតនោះទេ …។ អ៊ីចឹងទេ បានជាខ្ញុំយល់ថា រឿងរ៉ាវខ្លះ ដោយសារជំនឿទុកចិត្តទៅមន្ត្រីខាងក្រោម ទទួលខុសត្រូវ គិតថា ពួកគេមានសញ្ញាបត្រខ្ពស់ៗ គេអាចនឹងជួយយើងបាននៅត្រង់បញ្ហានេះ ផ្ទុយទៅវិញ វាមិនត្រឹមតែជួយទេ បែរជាឈានទៅដល់ការបំផ្លិចបំផ្លាញកំណែទម្រង់នេះទៀតផង»។
បន្ថែមពីនេះនាយករដ្ឋមន្ត្រី ហ៊ុន សែន បានព្រលយសម្តីរិះគន់ដោយប្រយោលទៅមន្ត្រីអែបអប ឡេមឡឺម និងមន្ត្រីខ្វះការទទួលខុសត្រូវលើការងារ ហើយរង់ចាំទទួលផលប្រយោជន៍ផងដែរ។ នេះជាសាររិះគន់របស់ប្រមុខរដ្ឋាភិបាល នៅចុងអាណត្តិទី៥នេះ ដែលលើកបញ្ហាមន្ត្រីក្នុងជួររដ្ឋាភិបាល មកបង្ហើបនៅចំពោះមុខសាធារណជន។
កន្លងមកប្រមុខរដ្ឋាភិបាល ក៏ធ្លាប់ព្រមានរដ្ឋមន្ត្រី និងមន្ត្រីតាមក្រសួង ស្ថាប័ននានា ដែលអសកម្មការងារថា ពួកគេអាចនឹងគ្មានមុខ ក្នុងជួររដ្ឋាភិបាលទៀតឡើយ នៅក្នុងអាណត្តិទី៦ខាងមុខ៕
Tag:
ហ៊ុន សែន
រដ្ឋាភិបាល
© រក្សាសិទ្ធិដោយ thmeythmey.com