អន្តរជាតិ
យន្តហោះចម្បាំងចិនអាចហោះការពារសុវត្ថិភាពយន្តហោះលោក គីម ទៅកាន់សិង្ហបុរី លោក គីម ជុងអ៊ុន ជិះក្នុងយន្តហោះពិសេសរបស់ខ្លួន (រូបភាព AFP)
× ចិនអាចនឹងបញ្ជូនយន្តហោះចម្បាំងរបស់ខ្លួនហោះការពារយន្តហោះពិសេសរបស់មេដឹកនាំកូរ៉េខាងជើង គីម ជុងអ៊ុន ក្នុងដំណើរទៅជួបប្រធានាធិបតីអាមេរិក ដូណាល់ ត្រាំ នៅឯសិង្ហបុរី។ មន្ត្រីយោធាកូរ៉េខាងត្បូងនិយាយថា ការបញ្ជូនយន្តហោះចម្បាំងអមដំណើរយន្តហោះដឹកលោក គីម ជាសញ្ញាបង្ហាញពីទំនាក់ទំនងជិតស្និទ្ធរវាងចិន និងកូរ៉េខាងជើងចំពោះមុខជំនួបលើកទីមួយរវាងលោក ត្រាំ និងលោក គីម ស្ដីពីការំសាយនុយក្លេអ៊ែរ។
ផ្លូវធ្វើដំណើររបស់យន្តហោះពិសេសនៃប្រមុខដឹកនាំកំពូលកូរ៉េខាងជើង គីម ជុងអ៊ុន ទៅកាន់សិង្ហបុរី មិនត្រូវបានគេដឹងឡើយ។ ប៉ុន្តែលោក គីម អាចជ្រើសរើសការហោះហើរកាត់ដែនអាកាសរបស់ចិនក្នុងដំណើរឆ្ពោះទៅកាន់ជំនួបជាមួយប្រធានាធិបតី ដូណាល់ ត្រាំ នៅថ្ងៃទី១២ ខែមិថុនា។ ដើម្បីសុវត្ថិភាព ចិនក៏អាចនឹងបញ្ចេញយន្តហោះរបស់ខ្លួនធ្វើដំណើរអមយន្តហោះពិសេសរបស់មេដឹកនាំកូរ៉េខាងជើងដែរសម្រាប់ការហោះហើរក្នុងដែនអាកាសខ្លួន។
មន្ត្រីយោធាអាកាសកូរ៉េខាងត្បូងម្នាក់បានប្រាប់សារព័ត៌មាន South China Morning Post ថា ការហោះអមដំណើរប្រមុខរដ្ឋបែបនេះ គឺជាបែបបទពិធីការថ្នាក់ខ្ពស់បំផុតមួយ។ មន្ត្រីយោធាដដែលនេះបន្តថា បើចិនពិតជាធ្វើបែបនេះមែន វាក៏ជាសញ្ញាប្រាប់អាមេរិក និងកូរ៉េខាងត្បូងថា ខ្លួនជាខ្នងបង្អែករឹងមាំរបស់កូរ៉េខាងជើងដែរ។
ជុំវិញបញ្ហានេះដែរ អតីតអង្គរក្សកូរ៉េខាងជើងម្នាក់និយាយដែរថា លោក គីម ទំនងជាជ្រើសរើសដែនអាកាសរបស់ចិនដើម្បីរក្សាសុវត្ថិភាពរបស់ខ្លួន។ ក្នុងករណីនេះ យន្តហោះពិសេស Chammae-1 របស់លោក គីម នឹងមានការអមដំណើរចាប់ពីព្រំដែនចិន និងកូរ៉េខាងជើង រួចកាត់តាមលម្ហអាកាសសមុទ្រចិនខាងត្បូង ឯសិង្ហបុរីក៏ទំនងជាបញ្ជូនយន្តហោះខ្លួនហោះអមយន្តហោះលោក គីម វិញ ពេលចូលដល់ដែនអាកាសរបស់ខ្លួន ដ្បិតយន្តហោះចម្បាំងចិនគ្មានសិទ្ធិចូលដែនអាកាសសិង្ហបុរីឡើយ។
តាមពិតទៅ មេដឹកនាំកូរ៉េខាងជើងគ្រប់ជំនាន់យកចិត្តទុកដាក់ខ្លាំងលើសុវត្ថិភាពរបស់ខ្លួន។ ក្នុងដំណើរចាកឆ្ងាយពីកូរ៉េខាងជើងលើកនេះ លោក គីម ត្រូវជឿថា បានបង្កើនការពង្រឹងសុវត្ថិភាពផ្ទាល់ខ្លួនតាមរយៈការបង្កើនចំនួនអង្គរក្ស និងការលាក់បាំងផ្លូវហោះហើរជាដើម។ បញ្ហានេះក្លាយជាការព្រួយបារម្ភខ្លាំងសម្រាប់សិង្ហបុរីដែលជាម្ចាស់ផ្ទះ។ ប្រមុខការទូតសិង្ហបុរី Vivian Balakrishan បានហោះទៅកាន់ព្យុងយ៉ាង និងទំនងជាជជែកជាមួយកូរ៉េខាងជើងលើបញ្ហាទាំងនេះឲ្យស្រេចបាច់។
ដោយឡែក ព័ត៌មាននៃការធ្វើដំណើររបស់លោក ត្រាំ ទៅកាន់សិង្ហបុរី ត្រូវបានសេតវិមានបញ្ចេញហើយ។ លោក ត្រាំ នឹងធ្វើដំណើរត្រង់ពីកាណាដា ជាទីដែលចូលរួមកិច្ចប្រជុំមហាអំណាចសេដ្ឋកិច្ចទាំង៧ ឆ្ពោះទៅកាន់សិង្ហបុរីតែម្ដង។ អ្នកនាំពាក្យសេតវិមាន Sarah Sanders និយាយថា លោក ត្រាំ នឹងចាកចេញពីកាណាដានៅព្រឹកថ្ងៃទី៩ ខែមិថុនា (យប់ថ្ងៃទី៩ ខែមិថុនានៅកម្ពុជា) ក្នុងដំណើរ១៧ម៉ោងទៅសិង្ហបុរី៕
Tag:
ចិន
កូរ៉េខាងជើង
សិង្ហបុរី
គីម ជុងអ៊ុន
© រក្សាសិទ្ធិដោយ thmeythmey.com