អន្តរជាតិ
នយោបាយអន្តរជាតិ
នាយករដ្ឋមន្ត្រីថៃ ៖ តំណាងរាស្ត្រដែលដេកលង់លក់ក្នុងសម័យប្រជុំ នឹងគ្មានអនាគតទេ
× ប្រមុខរបបសឹកថៃលោកឧត្តមសេនីយ៍ ប្រាយុទ្ធ ចន្ទ អូចា បានផ្ទុះប្រតិកម្មខ្លាំងជាមួយនឹងសមាជិកសភាថៃមួយចំនួនដែលបានដេកលង់លក់ក្នុងពេល ដែលសភាកំពុងតែអនុម័តច្បាប់សំខាន់របស់ប្រទេស។ លោកឧត្តមសេនីយ៍ ព្រមានដាក់បញ្ជីខ្មៅដល់តំណាងរាស្ត្រទាំងនោះសម្រាប់ការបំពេញតួនាទីនេះនាពេលអនាគត។
លោកនាយករដ្ឋមន្ត្រី ប្រាយុទ្ធ ចន្ទ អូចា នៅថ្ងៃ៨ ឧសភា បានឲ្យដឹងថា លោក បានជជែកជាមួយនឹងប្រធានសភាថៃ ដើម្បីឲ្យប្រមុខស្ថាប័នសភាជាតិ ព្រមានដល់តំណាងរាស្ត្រទាំងអស់កុំឲ្យដេកនៅក្នុងពេលដែលកំពុងតែប្រជុំ។ លោកនាយករដ្ឋមន្ត្រី អះអាងថាលោក ពិតជាអន់ចិត្តជាខ្លាំងនៅពេលឃើញរឿងបែបនេះកើតឡើង ។ នេះបើយោងតាមការចុះផ្សាយរបស់សារព័ត៌មានថៃ Bangkok Post។
តាមប្រភពព័ត៌មានដដែលនោះ លោកនាយករដ្ឋមន្ត្រី បានផ្ញើសារព្រមានយ៉ាងដូច្នេះថា៖« មិនថាសមាជិកសភាណាក៏ដោយ ដែលដេកក្នុងពេលម៉ោងធ្វើការ នឹងមិនត្រូវបានជ្រើសរើសសម្រាប់បំពេញការងារនាពេលអនាគតឡើយ។ ហើយប្រសិនបើចង់ដេក គួរតែទៅដេកនៅផ្ទះទៅ»។
ជាមួយនឹងការព្រមាន និងស្តីបន្ទោសនេះ លោកនាយករដ្ឋមន្ត្រី ក៏ថ្លែងហួសចិត្តចំពោះអ្នកប្រើប្រាស់បណ្តាញសង្គម ដែលមានការចាប់អារម្មណ៍ជ្រុលទៅនឹងរឿងនេះ ខណៈមិនសូវអើពើលើការអនុវត្តច្បាប់ពាក់ព័ន្ធឹនឹងថវិកាទៅវិញ។
សូមជម្រាបផងដែរថា ប្រតិកម្មរបស់ប្រមុខរបបសឹកថៃរូបនេះ ធ្វើឡើងបន្ទាប់ពីរូបភាពដេកលង់លក់ក្នុងពេលប្រជុំអនុម័តច្បាប់គ្រប់គ្រង់ថវិកាប្រចាំរបស់សមាជិកសភាថៃមួយចំនួនត្រូវបានបង្ហោះ និងចែករំលែកក្នុងបណ្តាញសង្គមជាច្រើន៕
Tag:
ថៃ
អាស៊ាន
តំណាងរាស្ត្រ
© រក្សាសិទ្ធិដោយ thmeythmey.com