ជាតិ
រឿងអតីតសង្ឃ៖ នាយករដ្ឋមន្ត្រីព្រមានលោក ផែង វណ្ណៈ និងលោក ខណ្ឌ័ច័ន្ទសុផល
× ភ្នំពេញ៖ ពីពិធីសម្ពោធកំណាត់ផ្លូវជាតិលេខ៦ នៅព្រឹកថ្ងៃទី១១ មិថុនានេះ សម្ដេចនាយករដ្ឋមន្ត្រី ហ៊ុន សែន បានស្តីបន្ទោសលោក ផែង វណ្ណៈ និងលោក ខណ្ឌ័ ច័ន្ទសុផល ដែលត្រូវបានគេស្គាល់ថា ជាបុគ្គលល្បីលើបណ្ដាញសង្គមហ្វេសប៊ុក ក្នុងការវែកញែករកហេតុផល លើរឿងបញ្ហាដែលកើតឡើងក្នុងសង្គម។
រឿងដែលលោក ផែង វណ្ណៈ និងលោក ខណ្ឌ័ ច័ន្ទសុផល បានវែកញែកតាមរយៈការផ្សាយផ្ទាល់ជាវីដេអូ បង្ហោះលើបណ្ដាញសង្គមហ្វេសប៊ុក ហើយល្បីដល់សម្ដេច ហ៊ុន សែន នោះ គឺករណីផ្ទុះរឿងអាស្រូវរបស់អតីតព្រះចៅអធិការវត្តភ្នំបាក់លើ ខេត្តបន្ទាយមានជ័យ កាលពីពេលថ្មីៗនេះ។ សម្ដេច ហ៊ុន សែន ចាត់ទុកបុគ្គល ផែង វណ្ណៈ និង ខណ្ឌ័ ច័ន្ទសុផល ជាក្រុមបង្ករឿងលើបណ្ដាញហ្វេសប៊ុក ។ បង្ករឿងត្រង់ថា បុគ្គលទាំងពីរ បាននាំគ្នាទៅសម្ភាសភាគីសាមីខ្លួនម្ខាងៗ ដើម្បីឲ្យចេញមុខបកស្រាយវាយប្រហារគ្នាទៅវិញទៅមក។ សម្រាប់សម្ដេច ហ៊ុន សែន សកម្មភាពប្រើប្រាស់ហ្វេសប៊ុករបស់លោក ផែង វណ្ណៈ និងលោក ខណ្ឌ័ ច័ន្ទសុផល ជាទង្វើដែលកំពុងខុសឆ្គង និងបំពុលបរិយាកាសក្នុងសង្គម។
សូមស្ដាប់សំឡេងសម្ដេច ហ៊ុន សែន៖
ជាមួយគ្នានេះប្រមុខរដ្ឋាភិបាល បានស្នើឲ្យបុគ្គលទាំងពីរ បញ្ឈប់សកម្មភាពផ្សាយវីដេអូ និយាយពីរឿងណា ដែលមិនទាន់ដឹងហេតុផលច្បាស់ ដើម្បីកុំឲ្យមានបញ្ហាល្អក់កករនៅក្នុងសង្គម ជាពិសេសដូចករណីរឿងអាស្រូវរបស់ព្រះសង្ឃជាដើម។ ហើយបើបុគ្គលទាំងពីរខាងលើនេះ មិនបញ្ឈប់សកម្មភាពខ្លួនទេ ពួកគេ ក៏ប្រឈមមុខ នឹងការដេញពីជួរយោធាផងដែរ។ នេះជាការព្រមានរបស់សម្ដេច ហ៊ុន សែន ដែលបានបន្ថែមថា បុគ្គល ផែង វណ្ណៈ បានបកស្រាយខុស ក្នុងរឿងផ្លូវនៅខេត្តសៀមរាប ហើយក៏បានសុំទោសសម្ដេចម្ដងរួចហើយ ចំពោះទង្វើរបស់គេ នៅពេលនិយាយតាមទូរសព្ទជាមួយសម្ដេច កាលពីពេលថ្មីៗនេះ។
ការព្រមានរបស់នាយករដ្ឋមន្ត្រី ហ៊ុន សែន ធ្វើឡើងបន្ទាប់ពីលោក ផែង វណ្ណៈ បានទៅសម្ភាសអតីតសង្ឃ ស្រិល វណ្ណា ឲ្យបកស្រាយពីរឿងខ្លួន និងនារីម្នាក់ ដែលបង្ហោះវីដេអូរឿងអាស្រូវផ្ទុះឡើង ខណៈលោក ខណ្ឌ័ ច័ន្ទសុផល មានចិត្តទោរទន់ទៅភាគីខាងស្រីនោះ បានទៅសម្ភាសសាមីខ្លួនជនរងគ្រោះ ឲ្យបកស្រាយវាយប្រហារមកលើអតីតសង្ឃវិញ។ បើតាមសម្ដេច ហ៊ុន សែន សកម្មភាពបុគ្គលល្បីលើហ្វេសប៊ុកទាំងពីរនេះ កើតឡើងដោយសារតែពួកគេ ធ្លាប់មានបញ្ហាទាស់ចិត្តគ្នា នាពេលកន្លងមក ទើបបង្កឲ្យមានបញ្ហាល្អក់កករបែបនេះ៕
Tag:
ហ៊ុន សែន
ផែង វណ្ណៈ
ខណ្ឌ័ ច័ន្ទសុផល
ព្រះសង្ឃ
© រក្សាសិទ្ធិដោយ thmeythmey.com