កីឡាជាតិ
ជាតិ
ពាក់កណ្តាលម៉ារ៉ាតុនអន្តរជាតិឆ្នាំនេះផ្លាស់ប្តូរផ្លូវរត់ ហើយពេលនេះ មានអ្នកចុះឈ្មោះជាង៣ពាន់នាក់
× ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិភ្នំពេញ ដែលរៀបចំឡើងដើម្បីអបអរពិធីបុណ្យចម្រើនព្រះជន្មសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ បានផ្លាស់ប្តូរផ្លូវរត់មួយចំនួននៅឆ្នាំនេះ ពោលគឺគ្មានការរត់ឆ្លងកាត់ស្ពានជ្រោយចង្វាទៅកាន់ត្រើយម្ខាងនោះទេ។ គិតត្រឹមថ្ងៃទី១២ ខែមិថុនា ឆ្នាំ២០១៨ មានអ្នកចុះឈ្មោះចូលរួមជាង៣ពាន់នាក់ មកពីជាង៣០ប្រទេស។ ការចុះឈ្មោះចូលរួមបន្តរហូតជិតដល់ថ្ងៃប្រកួត ខណៈថ្នាក់ដឹកនាំរំពឹងថា ឆ្នាំនេះអាចទាក់ទាញអ្នកចូលរួមប្រមាណជាង៤ពាន់នាក់។
អ្នកចូលរួមរត់ប្រណាំងពាក់កណ្តាលម៉ារ៉ាតុនអន្តរជាតិភ្នំពេញឆ្នាំនេះ នឹងមិនបានរត់លើផ្លូវតាមទន្លេនៃត្រើយម្ខាងឡើយ បន្ទាប់ពីគណៈកម្មការរៀបចំព្រឹត្តិការណ៍នេះ បានផ្លាស់ផ្លូវរត់មួយចំនួន ដោយបង្វែរឲ្យរត់តែលើផ្លូវក្នុងទីក្រុងតែប៉ុណ្ណោះ។ ការផ្លាស់ប្តូរនេះ គឺដើម្បីរួមចំណែកកាត់បន្ថយការកកស្ទះចរាចរណ៍នៅម្តុំរង្វង់មូលជ្រោយចង្វា បន្ទាប់ពីស្ពានជ្រោយចង្វាមិត្តភាពកម្ពុជា-ជប៉ុនបាននិងកំពុងជួសជុល។ នេះបើយោងតាម លោក សែម ផល្លា នាយកប្រតិបត្តិព្រឹត្តិការណ៍មារ៉ាតុន និងពាក់កណ្តាលម៉ារ៉ាតុនអន្តរជាតិនៃក្រសួងទេសចរណ៍។
សម្រាប់វិញ្ញាសារត់ចម្ងាយ២១គីឡូម៉ែត្រ អត្តពលិកទាំងអស់ចេញដំណើរនៅមុខព្រះបរមរាជវាំងតាមបណ្តោយផ្លូវសុធារសឆ្ពោះទៅកាន់ផ្សារទំនើបអ៊ីអនរួចបណ្តដំណើរទៅកាន់ស្តុបចម្ការមន។ បន្ទាប់មកធ្វើដំណើរតាមផ្លូវនរោត្តមកាត់វិមានឯករាជ្យឆ្ពោះទៅកាន់វត្តភ្នំ រួចរត់តាមផ្លូវមុខមន្ទីរពេទ្យគន្ធបុប្ផាទៅកាន់រង្វង់មូលជ្រោយចង្វា បន្ទាប់មកបត់ស្តាំស្របស្ពានជ្រោយចង្វាមិត្តភាពកម្ពុជា-ជប៉ុន រួចហើយបត់ស្តាំបន្តដំណើរតាមផ្លូវមាត់ទន្លេឆ្ពោះទៅកាន់កោះពេជ្រ។ អត្តពលិកទាំងនោះត្រូវរត់ក្រឡឹងកោះពេជ្រពីរជុំ បន្ទាប់មកចេញពីទីនោះមកបញ្ចប់ទីនៅមុខព្រះបរមរាជវាំងវិញ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាហាក់បង្ហាញក្តីបារម្ភចំពោះការផ្លាស់ប្តូរផ្លូវរត់នៅឆ្នាំនេះ ដោយលោកយល់ថា ការផ្លាស់ប្តូរនេះអាចមានផលប៉ះពាល់មួយចំនួនដល់អ្នករត់ ពិសេសអត្តពលិកបរទេស។ «វាអាចមានបញ្ហាខ្លះៗសម្រាប់ការផ្លាស់ប្តូរផ្លូវរត់នេះ ព្រោះអត្តពលិកយើងពិសេសបរទេសដែលធ្លាប់តែរត់តាមផ្លូវមុនៗ អាចមានភាពស្រពេចស្រពិល។ តែយ៉ាងយើងបានផ្តល់ព័ត៌មានពីការផ្លាស់ប្តូរនេះ ទៅពួកគាត់រួចហើយ»។ នេះជាលើកឡើងរបស់លោក វ៉ាត់ ចំរើន។
ជាមួយគ្នានេះ លោកក៏បានស្នើឲ្យអ្នកចូលរួមរត់ក្នុងព្រឹត្តិការណ៍ពាក់កណ្តាលម៉ារ៉ាតុនអន្តរជាតិភ្នំពេញលើកទី៨ នាថ្ងៃទី១៧ ខែមិថុនា ឆ្នាំ២០១៨ យោគយល់ចំពោះការផ្លាស់ប្តូរនេះផងដែរ។ ទន្ទឹមនឹងនេះ លោកស្នើឲ្យបងប្អូនប្រជាពលរដ្ឋ សិស្សនិស្សិត និងមន្ត្រីរាជការចុះឈ្មោះចូលរួមឲ្យបានច្រើនកុះករ ព្រោះថវិកាដែលបានពីការចុះឈ្មោះ នឹងបរិច្ចាគជូនមន្ទីរពេទ្យគន្ធបុប្ផា។
ក្រៅពីគោលបំណងស្វែងរកមូលនិធិសប្បុរសធម៌ ព្រឹត្តិការណ៍នេះរៀបចំឡើង ដើម្បីអបអរពិធីបុណ្យចម្រើនព្រះជន្មសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ និងបំផុសឲ្យប្រជាពលរដ្ឋពិសេសយុវជនឲ្យចេះស្រលាញ់បរិស្ថាន ក្នុងន័យជំរុញឲ្យរាជធានីភ្នំពេញមានបរិស្ថានស្អាតនិងបៃតង។ ពាក្យស្លោក«រាជធានីស្អាតនិងបៃតង»នេះ នឹងប្រើរហូតដល់ឆ្នាំ២០២៣ ដែលកម្ពុជាធ្វើជាម្ចាស់ផ្ទះកីឡាស៊ីហ្គេមលើកទី៣២។
គិតត្រឹមថ្ងៃទី១២ ខែមិថុនា ឆ្នាំ២០១៨ អត្តពលិកជាង៣ពាន់នាក់មកពី៣៩ប្រទេសបានចុះឈ្មោះចូលរួមក្នុងព្រឹត្តិការណ៍នេះ។ លោក វ៉ាត់ ចំរើន រំពឹងថា ឆ្នាំនេះអាចទាក់ទាញអត្តពលិកជាង៤ពាន់នាក់ឲ្យចូលរួម ខណៈការចុះឈ្មោះនឹងបន្តរហូតដល់ថ្ងៃទី១៦ ខែមិថុនា ឆ្នាំ២០១៨ ពោលគឺក្រោយ១ថ្ងៃនៃការប្រកួត។ ចំនួននេះមានកើនឡើងតិចតួចបើធៀបនឹងឆ្នាំមុន ដែលមានប្រមាណជា៤ពាន់នាក់។
ពាក់ព័ន្ធការកើនឡើងតិចតួចនៃចំនួនអ្នកចូលរួមក្នុងព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនេះដែរ លោក វ៉ាត់ ចំរើន បានដាក់បន្ទុកធ្ងន់លើបញ្ហាហេដ្ឋារចនាសម្ព័ន្ធ ដោយសារផ្លូវរត់ក្នុងទីក្រុងភ្នំពេញមិនទាន់អាចឆ្លើយតបនឹងតម្រូវការ។ ហើយបញ្ហានេះ ក៏កត្តារាំងស្ទះក្នុងការវិវត្តព្រឹត្តិការណ៍នេះទៅជាព្រឹត្តិការណ៍ម៉ារ៉ាតុនអន្តរជាតិភ្នំពេញដែរ។ ម្យ៉ាងទៀត ក្នុងខែមិថុនានេះ មានបណ្តាប្រទេសជាច្រើនលើពិភពលោកបានរៀបចំព្រឹត្តិការណ៍នេះ។ អគ្គលេខាធិការរូបនេះបានបញ្ជាក់ថា អ្នករត់ម្នាក់មិនអាចចូលរួមរត់ម៉ារ៉ាតុន ឬពាក់កណ្តាលម៉ារ៉ាតុនអន្តរជាតិពីរដងក្នុងរយៈពេល៣ខែបានទេ ពោលគឺយ៉ាងហោចណាស់ត្រូវការពេល៦ខែទើបអាចចូលរួមម្តងទៀតបាន។
អត្តពលិកខាងលើត្រូវប្រកួតប្រជែងលើ៣ប្រភេទវិញ្ញាសា គឺរត់ចម្ងាយ២១គីឡូម៉ែត្រ, ១០គីឡូម៉ែត្រ និងរត់ចម្ងាយ៣គីឡូម៉ែត្រ។ សម្រាប់តម្លៃចុះឈ្មោះចូលរួមលើវិញ្ញាសាពាក់កណ្តាលម៉ារ៉ាតុនបរទេស៤០ដុល្លារ រីឯកម្ពុជា១៥ដុល្លារ, វិញ្ញាសា១០គីឡូម៉ែត្របរទេស៣០ដុល្លារ ខណៈកម្ពុជា១០ដុល្លារ និងវិញ្ញាសា៣គីឡូម៉ែត្របរទេស១០ដុល្លារ និងកម្ពុជា៥ដុល្លារ៕
Tag:
ពាក់កណ្តាលម៉រ៉ាតុនអន្តរជាតិភ្នំពេញ
វ៉ាត់ ចំរើន
សែម ផល្លា
© រក្សាសិទ្ធិដោយ thmeythmey.com