ជាតិ
សេដ្ឋកិច្ច
សួនសត្វដំបូងបង្អស់នៅភ្នំពេញលើផ្ទៃដី ៦០ហិកតា បើកដំណើរការ
× ភ្នំពេញ៖ ក្រុមហ៊ុន LYP Group របស់លោក លី យ៉ុងផាត់ បានបើកដំណើរការគម្រោងវិនិយោគថ្មីរបស់ខ្លួន គឺសួនសត្វភ្នំពេញសាហ្វារី នៅរាជធានីភ្នំពេញ។ គម្រោងនេះត្រូវបានសម្ពោធក្រោមអធិបតីភាពសម្ដេចនាយករដ្ឋមន្ត្រី ហ៊ុន សែន នៅថ្ងៃទី២៣ខែមិថុនានេះ។
គម្រោងសួនសត្វដំបូងបំផុតនៅភ្នំពេញមួយនេះ ត្រូវបានរៀបចំលើផ្ទៃដីជាង ៦០ហិកតាក្នុងតំបន់អភិវឌ្ឍន៍របស់លោក លី យ៉ុងផាត់ ដែលមានផ្ទៃដីសរុបជាង ១០០០ហិកតា ក្នុងខណ្ឌជ្រោយចង្វារ។ គម្រោងនេះ ត្រូវបានបោះទុនវិនិយោគប្រមាណ ១០លានដុល្លារ។
សួនសត្វសាហ្វារី មានសត្វព្រៃ ៨៩ប្រភេទ និងផ្ដល់ការសំដែងរបស់ប្រភេទសត្វមួយចំនួន។ ក្រៅពីបម្រើឲ្យការកម្សាន្ត សួនសត្វមួយនេះក៏ដើរតួនាទីជាកន្លែងអភិរក្សសត្វផងដែរ។
លោក លី យ៉ុងផាត់ ថ្លែងថា សួនសត្វមួយនេះ ត្រូវបានផ្លាស់ប្ដូរពីគម្រោងមុននៅខេត្តកោះកុង។ លោកមានប្រសាសន៍ដូច្នេះថា៖«យើងផ្លាស់ប្ដូរសួនសត្វមកភ្នំពេញ ព្រោះកំណើនប្រជានជននៅភ្នំពេញ និងតំបន់ជុំវិញ ដែលកំពុងត្រូវការកន្លែងកម្សាន្តថ្មី និងទំនើប សមស្របនឹងជីវភាពរបស់ពួកគេកាន់តែធូរធា»។ ប្រធានក្រុមហ៊ុន LYP Group ដែលមានគម្រោងវិនិយោគយ៉ាងច្រើនរូបនេះ បានបន្ថែមថា គម្រោងសួនសត្វនេះ នឹងជួយលើកមុខមាត់រាជធានីភ្នំពេញ ហើយនឹងទាក់ទាញភ្ញៀវទេសចរកាន់តែច្រើនឡើង។
សួនសត្វដែលត្រូវបើកសម្ពោធនៅថ្ងៃនេះ បានបង្កើតការងារចំនួន ២៣០កន្លែង។ ហើយជាជំហានបន្ទាប់ លោក លី យ៉ុងផាត់ ឲ្យដឹងថា សួនសត្វនេះនឹងត្រូវពង្រីកដល់ទៅ ១៦០ហិកតា៕
Tag:
សួនសត្វ
លី យ៉ុងផាត់
lyp group
© រក្សាសិទ្ធិដោយ thmeythmey.com