កីឡាអន្តរជាតិ
អន្តរជាតិ
Lampard៖ អង់គ្លេសអាចឈ្នះពាន World Cup នៅរុស្ស៊ី
× ក្រុមកីឡាបាល់ទាត់ជម្រើសជាតិអង់គ្លេសបានចាប់ផ្តើមយុទ្ធនាការរបស់ពួកគេដ៏អស្ចារ្យក្នុងការប្រកួតពានរង្វាន់បាល់ទាត់ពិភពលោក World Cup នៅរុស្ស៊ីជាមួយនឹងការបង្ហាញខ្លួនរបស់សមាសភាពកីឡាករក្មេងៗជាច្រើនក្រោមការដឹកនាំរបស់លោក Gareth Southgate។
អតីតវីរបុរស Chelsea និងជាអ្នកចាត់ការក្លិប Derby County លោក Frank Lampard មានជំនឿជឿជាក់ថាអង់គ្លេសអាចមានសម្ថភាពលើកពាន World Cup ឆ្នាំ២០១៨នេះបាន បន្ទាប់ពីក្រុមរហ្សនាមតោកំណាចអាចរកបាន៦ពិន្ទុពីការប្រកួត២លើកក្នុងពូល G ដោយយកឈ្នះទុយណេស៊ី ២-១ និងប៉ាណាម៉ាយ៉ាងចាស់ដៃ ៦-១។ នេះបើតាមការផ្សាយរបស់ Goal.com។
សមាសភាពកីឡាករវ័យក្មេងដែលអ្នកចាត់ការសញ្ចាតិអង់គ្លេស វ័យ៤៧ឆ្នាំ សម្រេចជ្រើសយកមកក្នុព្រឹត្តិការណ៍នេះបានបង្ហាញទម្រង់លេងគួរឲ្យកត់សម្គាល់បំផុតជាមួយប្រព័ន្ធប្រយុទ្ធច្រើន ៣-៥-២ ដែលក្រុមនេះមិនធ្លាប់ប្រើប្រាស់ពីមុនមក។
របៀបលេងក្នុងទម្រង់ថ្មី ហើយទទួលបានជោគជ័យយ៉ាងគាប់ប្រសើរនេះ បានធ្វើឲ្យអតីតសមាជិកក្រុមជម្រើសជាតិអង់គ្លេស Lampard មានការភ្ញាក់ផ្អើល ហើយជឿថាពួកគេអាចយកពានលំដាប់ពិភពលោកនេះទៅផ្ទះវិញបាន។
គ្រូបង្វឹកថ្មីក្រុម Derby County នៃលីកលំដាប់ទី២អង់គ្លេសបានប្រាប់កាសែត BBC World Cup ថា៖«ខ្ញុំគិតថាពួកគេពិតជាអាចធ្វើបាន។ ខ្ញុំមើលមិនឃើញថាពួកគេមិចអាចឈានដល់ការប្រកួតវគ្គពាក់កណ្តាលផ្តាច់ព្រ័ត្រនោះទេ។ ពួកគេពិតជាមានទេពកោសល្យ និងបង្ហាញទម្រង់លេងដ៏អស្ចារ្យពីមួយប្រកួតទៅមួយប្រកួត។ ដូច្នេះយើងអាចមើលពីខាងក្រៅបានថា ក្រុមនេះមានឱកាសពិតប្រាកដ»។
ការប្រកួតលើកចុងក្រោយរបស់អង់គ្លេស ត្រូវជួបជាមួយបែលហ្ស៊ិកដែលមាន៦ពិន្ទុដូចគ្នា ដើម្បីដណ្តើមយកលេខ១ នៃពូល G៕
Tag:
បាល់ទាត់
FIFA World Cup
Frank Lampard
GroupG
© រក្សាសិទ្ធិដោយ thmeythmey.com