ទ្រី លាង៖ កូនអ្នកលក់ដូរបានឱកាសទៅសិក្សានៅសាលាយោធាអាមេរិក West Point ដ៏ល្បី

អន្តរជាតិ

ទ្រី លាង៖ កូនអ្នកលក់ដូរបានឱកាសទៅសិក្សានៅសាលាយោធាអាមេរិក West Point ដ៏ល្បី

29, Jun 2018 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

យុវជន ទ្រី លាង ជាជនជាតិខ្មែរទីបួនដែលទទួលបានឱកាសដ៏កម្រដើម្បីចូលសិក្សាជំនាញយោធានៅសាលាបណ្ឌិតសភាយោធាអាមេរិក West Point ដ៏ល្បី។ ស្ថិតក្នុងវ័យ២០ឆ្នាំ ទ្រី លាង កើតក្នុងក្រុមគ្រួសារដែលមានឪពុកម្តាយជាអ្នកលក់ដូរនៅផ្សារអូឡាំពិក និងបច្ចុប្បន្នជានិស្សិតឆ្នាំទី ២ នៃវិទ្យាស្ថានបច្ចេកវិទ្យាកម្ពុជាហៅកាត់ថា តិចណូ។

អាហារូបករណ៍សិក្សាជំនាញយោធានៅសាលាបណ្ឌិតសភាយោធាអាមេរិក West Point ដែលយុវជន ទ្រី លាង ទទួលបានមានរយៈពេលបួនឆ្នាំ។ ថ្នាក់សិក្សារបស់យុវជនរូបនេះនឹងចាប់ផ្តើមនៅដើមខែកក្កដាខាងមុខនេះដែរ។

ក្នុងបទសម្ភាស៍ជាមួយអ្នកសារព័ត៌មានថ្មីៗ ទ្រី លាង បានប្រាប់ថា ខ្លួនបានចំណាយពេលប្រហែលពីរឆ្នាំដើម្បីប្រឹងប្រែង ហ្វឹកហាត់ និងពង្រឹងសមត្ថភាពកាយសម្បទា ក៏ដូចជាបង្កើនចំណេះដឹងទូទៅ និងភាសាអង់គ្លេស ដើម្បីឈានទៅដាក់ស្នើសុំអាហារូបករណ៍មួយនេះ។

ពាក់ព័ន្ធនឹងការជ្រើសរើសយកជំនាញយោធានេះដែរ ទ្រី លាង បានអះអាងថា ក្តីស្រមៃរបស់ខ្លួនតាំងពីតូចមក ព្រោះគេមានមហិច្ឆតាមួយចង់ចូលរួមចំណែកអភិវឌ្ឍប្រទេសកម្ពុជាតាមរយៈការគាំទ្រវិស័យការពារជាតិកម្ពុជាឲ្យបានប្រសើរឡើង ខណៈពេលដែលកម្ពុជាកំពុងអភិវឌ្ឍទៅមុខនោះ។

សម្រាប់យុវជនវ័យ ២០ឆ្នាំរូបនេះ កម្ពុជាសក្តិសមនឹងមានវិស័យការពារដែលរឹងមាំ ល្អប្រសើរ និងខ្លាំងក្លាដូចប្រទេសជិតខាង និងប្រទេសឯទៀតក្នុងតំបន់ដែរ។ នៅពេលបញ្ចប់ការសិក្សានៅសាលាយោធាដ៏ល្បីនៅអាមេរិកនេះ ទ្រី លាង សង្ឃឹមយ៉ាងមុតមាំថា ខ្លួននឹងអាចនាំសមត្ថភាព និង ចំណេះជំនាញថ្មីពាក់ព័ន្ធវិស័យយោធាដើម្បីពង្រឹងវិស័យការពារជាតិកម្ពុជាពេលខ្លួនចូលបម្រើការងារក្នុងកងយោធពលខេមរភូមិន្ទ។

បើតាមការឲ្យដឹងពីស្ថានទូតអាមេរិកប្រចាំនៅកម្ពុជា មកទល់បច្ចុប្បន្ននេះ ជនជាតិខ្មែរបីនាក់ហើយ បានបញ្ចប់ការសិក្សាពីបណ្ឌិសភាយោធា West Point ក្នុងនោះមានលោក ហ៊ុន ម៉ាណែត, អ្នកស្រី មៀច សិទ្ធិកា និងលោក ទី នីទ័រ។ ចំណែកយុវជន ទ្រី លាង នេះជាជនជាតិខ្មែរទីបួនដែលបានសិក្សានៅសាលានេះ៕

សូមស្តាប់បទសម្ភាសន៍ខាងក្រោម៖