កីឡាជាតិ
ជាតិ
ខ្សែមប្រើ ចេន ដែលចុះកិច្ចសន្យាលេងបឹងកេត ជាតារាចម្រៀងនៅក្រុម Mustache Band កីឡាករ ចេន (កណ្តាល) កាន់អាវថ្មីក្នុងក្លិបបឹងកេតជាមួយថ្នាក់ដឹកនាំក្លិប, រូបភាពពីហ្វេសប៊ុកក្លិបបាល់ទាត់បឹងកេត
× ក្លិបកីឡាបាល់ទាត់បឹងកេតបាននាំចូលកីឡាករថ្មី១រូបបន្ថែម គឺខ្សែបម្រើ ចេន សម្រាប់ការប្រកួតជើងទី២ពានរង្វាន់បាល់ទាត់ក្របខណ្ឌកំពូលកម្ពុជា។ ក្រៅអាជីពបាល់ទាត់ ខ្សែបម្រើរូបនេះ ក៏ជាតារាចម្រៀងនៅក្រុម Mustache Band ផងដែរ។
នៅថ្ងៃទី២៩ ខែមិថុនា ឆ្នាំ២០១៨នេះ ក្លិបការពារតំណែងជើងឯកបឹងកេត បានចុះកិច្ចសន្យានាំចូលខ្សែបម្រើមួយរូប ដើម្បីត្រៀមប្រជែងនាការប្រកួតជើងទី២នៃពានរង្វាន់បាល់ទាត់ក្របខណ្ឌកំពូលកម្ពុជា។ ខ្សែបម្រើដែលមានឈ្មោះថា ចេន ត្រូវបានក្លិបនេះអះអាងថា ជាតារាចម្រៀងដ៏ល្បីមួយរូបនៅក្រុម Mustache Band។
«ក្លិបសូមជម្រាបជូនពីការចុះកិច្ចសន្យាជាមួយកីឡាករចំណូលថ្មី ចេន មកចូលរួមជាមួយយើង។ ចេន ត្រូវបានមហាជនស្គាល់ថា ជាតារាងចម្រៀងវ័យក្មេងមានសម្លេងពិរោះ។ ក្រៅពីអាជីពជាតារាចម្រៀងនៅក្រុម Mustache Band ចេន មានទេពកោសល្យ និងចំណូលចិត្តលើវិស័យកីឡា ជាពិសេសគឺកីឡាបាល់ទាត់តែម្ដង»។ នេះជាការរៀបរាប់របស់ក្លិបបាល់ទាត់បឹងកេត។
តាមរយៈការចូលរួមជាមួយបឹងកេត ខ្សែបម្រើរូបនេះរំពឹងថា នឹងទទួលបានការលើកទឹកចិត្តពីទស្សនិកជន ដើម្បីជាកម្លាំងចលករអភិវឌ្ឍសមត្ថភាពឲ្យកាន់តែប្រសើរក្នុងការវិវត្តខ្លួនឲ្យក្លាយជាកីឡាករអាជីពនាពេលដ៏ខ្លីខាងមុខ៕
Tag:
បឹងកេត
ចេន
Cambodian League 2018
© រក្សាសិទ្ធិដោយ thmeythmey.com