លិចទូកនៅថៃ៖ រកឃើញសាកសព២១នាក់ហើយ

អន្តរជាតិ

លិចទូកនៅថៃ៖ រកឃើញសាកសព២១នាក់ហើយ

06, Jul 2018 , 4:12 pm

រូបភាព

ប្រតិបត្តិការសង្គ្រោះ និងប្រមូលសាកសពដោយសារការលិចទូកនៅភូកេត។ រូបថត AFP

ដោយ: ធឿន បញ្ញាឬទិ្ធ

ថៃ៖ យ៉ាងហោចណាស់មនុស្សចំនួន២១នាក់ស្លាប់ នៅក្នុងឧប្បទ្ទវហេតុលិចទូកទេសចរណ៍ នៅប្រទេសថៃ កាលពីថ្ងៃទី៥ កក្កដា។ នេះបើតាមការផ្សាយរបស់ទីភ្នាក់ងារព័ត៌មាន AFP ដោយគិតត្រឹមរសៀលថ្ងៃសុក្រ ទី៦ ខែកក្កដា។

ទូកទេសចរណ៍ Phoenix ដែលដឹកភ្ញៀវទេសចរណ៍ ចំនួន១០៥នាក់ ភាគច្រើនជាជនជាតិចិន បានជួបឧប្បទ្ទវហេតុមួយ ដោយសាររលកកម្ពស់៥ម៉ែត្រ បានវាយបោកទៅលើទូក ដែលបណ្ដាលឲ្យភ្ញៀវទេសចរធ្លាក់ចូលទៅក្នុងទឹក។ ក្នុងចំណោមភ្ញៀវទេសចរទាំងនោះ ត្រូវបានអាជ្ញាធរថៃ ជួយសង្គ្រោះប្រមាណ៥០នាក់។

ចំណែកមនុស្សចំនួន២១នាក់ផ្សេងទៀត ត្រូវបានរកឃើញថា បាត់បង់ជីវិត នៅក្នុងករណីគ្រោះថ្នាក់នេះ ខណៈសាកសពមួយចំនួនទៀតមិនទាន់ត្រូវបានស្រង់យក។

ក្រៅពីទូកទេសចរណ៍ Phoenix នេះ ក៏មានទូកទេសចរណ៍ជាច្រើនផ្សេងទៀត ជួបឧប្បទ្ទវហេតុដែរ ប៉ុន្តែអ្នកដំណើរទាំងនោះ ត្រូវបានជួយសង្គ្រោះទាន់ពេលវេលា។ នេះបើតាមរបាយការណ៍របស់អាជ្ញាធរខេត្តភូកេត ដែលបានបន្ថែមថា ទូកទេសចរណ៍ ដឹកអ្នកដំណើរទាំងនេះ ទំនងជាមិនបានដឹងពីបញ្ហាអាកាសធាតុ ដែលអាជ្ញាធរបានជូនដំណឹង៕