អន្តរជាតិ
ឥណ្ឌាកំពុងក្លាយជាគោលដៅទេសចរណ៍សុខាភិបាលទាក់ទាញបំផុតសម្រាប់ប្រជាជនអាស៊ាន
អនុប្រធានសភាពាណិជ្ជកម្មឥណ្ឌាលោក Bodhisattva Mukherjee ស្ថិតក្នុងជំនួបជាមួយអ្នកសារព័ត៌មានអាស៊ានថ្ងៃ ១៤ ខែកក្កដា ក្នុងក្រុង Kolkata នៃរដ្ឋបេងកាល់ខាងលិច
×![]()
(Kolkata)៖ ឥណ្ឌាក្លាយជាទិសដៅទេសចរណ៍សុខាភិបាលពេញនិយមបំផុតមួយក្នុងតំបន់អាស៊ីដោយសារប្រទេសនេះមានប្រព័ន្ធសុខាភិបាលទំនើប និងអាចផ្តល់សេវាដេលមានតម្លៃទាប។ បច្ចុប្បន្ននេះ មហាអំណាចអាស៊ីខាងត្បូងនេះកំពុងព្យាយាមពង្រឹងការផ្សព្វផ្សាយពីទេសចរណ៍សុខាភិបាលខ្លួនដើម្បីទាក់ទាញទេសចរកាន់តែច្រើនពីប្រទេសអាស៊ានដែលនៅជាប់ភូមិផងរបងជាមួយគ្នាដែរ។
អនុប្រធានសភាពាណិជ្ជកម្មឥណ្ឌាលោក Bodhisattva Mukherjee បានថ្លែងប្រាប់អ្នកសារព័ត៌មានអាស៊ាន២០ រូបដែលស្ថិតក្នុងកម្មវិធីផ្លាស់ប្តូរទស្សនកិច្ចអាស៊ាន-ឥណ្ឌានៅថ្ងៃសៅរ៍ទី ១៤ខែកក្កដាថា ទេសចរណ៍សុខាភិបាលនេះកំពុងលូតលាស់ខ្លាំង ហើយប្រជាជនអាស៊ានក៏ក្លាយជាគោលដៅសំខាន់បំផុតមួយសម្រាប់វិស័យនេះដែរ។
លោកបានពន្យល់ថា ទេសចរណ៍សុខាភិបាលកំពុងបន្តរីកលូតលាស់ខ្លាំងដោយសារប្រព័ន្ធសុខាភិបាលឥណ្ឌាមានគុណភាពខ្ពស់ មានមន្ទីរពេទ្យដែលបំពាក់ដោយគ្រឿងបរិក្ខារ និងបច្ចេកវិទ្យាទំនើប ហើយគ្រូពេទ្យមានជំនាញខ្ពស់ ខណៈដែលសេវាមានតម្លៃសមរម្យ។ ប្រជាជនអាស៊ានកាន់តែច្រើនក៏ចាប់ផ្តើមស្វែងរកសេវាសុខាភិបាលនៅឥណ្ឌា ដោយសារទីតាំងភូមិសាស្ត្ររវាងអាស៊ាននិងឥណ្ឌានៅកៀកគ្នា និងងាយស្រួលធ្វើដំណើរ។
លោកសង្ឃឹមថា ទេសចរណ៍សុខាភិបាលនេះក្រៅពីផ្តល់ផលចំណេញសម្រាប់អាស៊ាន និងឥណ្ឌា វាក៏នឹងពង្រឹងការផ្សាភ្ជាប់ចំណងមិត្តភាពរវាងអាស៊ាន និងឥណ្ឌាឲ្យកាន់តែជិតស្និទ្ធគ្នាផងដែរជាពិសេសរវាងប្រជាជននិងប្រជាជន ខណៈដែលឥណ្ឌាកំពុងបន្តពង្រឹងការផ្សាភ្ជាប់ទំនាក់ទំនងជាមួយអាស៊ានក្រោមគោលនយោបាយធ្វើសកម្មភាពនៅភាគខាងកើត (Act East Policy)។
ពាក់ព័ន្ធនឹងការបន្តលើកស្ទួយវិស័យទេសចរណ៍សុខាភិបាលនេះ លោក Ashwini Fatehpuria នាយកប្រតិបត្តិក្រុមហ៊ុនឱសថធម្មជាតិ និងគ្រឿងសម្អាង Ishita International ដែលនាំមុខគេនៅឥណ្ឌាបានប្រាប់អ្នកសារព័ត៌មានថ្មីៗថា បច្ចុប្បន្ននេះអ្នកទេសចរមកពីអាស៊ានមានម៉ាឡេស៊ី សិង្ហបុរី មីយ៉ាន់ម៉ា និងបណ្តាប្រទេសអាហ្វ្រិកផងដែរបន្តស្វែងរកសេវាសុខាភិបាលនៅឥណ្ឌា។
«យើងឃើញមានអ្នកទេសចរច្រើនណាស់មកពីរដ្ឋអាស៊ានមានទាំងមីយ៉ាន់ម៉ា ម៉ាឡេស៊ី និងសិង្ហបុរីជាដើមមកទទួលការព្យាបាលសុខភាពនៅឥណ្ឌាជាពិសេសនៅរដ្ឋតាមិលណាឌូ (Tamil Nadu)»។ នេះជាការអះអាងរបស់លោក Ashwini Fatehpuria។
លោកបានបន្តថា៖« ដោយសារសក្កានុពលនេះ រដ្ឋាភិបាលឥណ្ឌាកំពុងព្យាយាមលើកកម្ពស់សេវាទេសចរណ៍សុខាភិបាលនេះបន្ថែមទៀត។ យើងកំពុងព្យាយាមកំណត់យុទ្ធសាស្ត្រថានឹងធ្វើបែបណាទៀតដើម្បីអាចបញ្ជៀបព័ត៌មាននេះដល់ប្រជាជននៅបណ្តាប្រទេសអាស៊ានផងដែរ»។
បើតាមនាយកប្រតិបត្តិក្រុមហ៊ុនឥណ្ឌាខាងលើ ហេតុផលធ្វើឲ្យឥណ្ឌាកាន់តែល្បីល្បាញនោះគឺ ក្រៅពីសេវាសុខាភិបាលបែបទំនើប ឥណ្ឌាក៏ផ្តល់សេវាកម្មថែទាំ ឱសថប្រពៃណីបែបធម្មជាតិដែរ។ សេវានេះងាយស្រួលសម្រាប់អ្នកប្រើប្រាស់ និងមិនបារម្ភពីផលប៉ះពាល់សុខភាពផង ហើយអាចថា មានតែឥណ្ឌាប៉ុណ្ណោះដែលផ្តល់ថែរក្សាសុខាភិបាលលក្ខណៈធម្មជាតិបែបនេះដល់អ្នកទេសចរបរទេស។
តាមពិតទៅ ឥណ្ឌាត្រូវបានគេចាត់ទុកជា គោលដៅពេញនិយមសម្រាប់អ្នកទេសចរដែលស្វែងរកសេវាព្យាបាល និងថែទាំងសុខភាពដោយសារតែវាមានតម្លៃថោកសមរម្យ និងមានគុណភាពខ្ពស់ជាងគេនៅអាស៊ីផង។ បើតាមរបាយការណ៍ផ្លូវការរបស់សភាពាណិជ្ជកម្មនិងឧស្សាហកម្មសហព័ន្ធឥណ្ឌា (FICCI) រៀងរាល់ឆ្នាំអ្នកទេសចរបរទេសយ៉ាងហោចណាស់ប្រាំសែននាក់ស្វែងរកសេវាសុខាភិបាលនៅឥណ្ឌា។
ឥណ្ឌាក៏រំពឹងថា ខ្លួនអាចរកចំណូលបានរហូតដល់ ៨ ពាន់លានដុល្លារអាមេរិកត្រឹមឆ្នាំ ២០២០ពីវិស័យទេសចរណ៍សុខាភិបាលនេះដែរ។ អ្នកទេសចរភាគច្រើនមកកាន់ឥណ្ឌាដើម្បីទទួលការវះកាត់បេះដូង, កែសម្រស់, ប្តូរឆ្អឹងក្បាលជង្គង់ និងថែរក្សាធ្មេញជាដើម៕
Tag:
ឥណ្ឌា
ទេសចរណ៍សុខាភិបាល
អាស៊ាន
© រក្សាសិទ្ធិដោយ thmeythmey.com
