ខ្មែរក្រហម
ជាតិ
សង្គមជាតិ
គណបក្សសង្រោះជាតិ ៖ ការដាក់ពាក្យប្ដឹងលោក កឹម សុខា មិនមែនជាការបារម្ភនោះទេ
× មួយថ្ងៃបន្ទាប់ពីលោក ជុំ ម៉ី អតីតអ្នកជាប់គុកក្នុងមន្ទីស២១(គុកទូលស្លែង) បានចេញមុខជំនួសឲ្យក្រុមជនរងគ្រោះនៃរបបខ្មែរក្រហម ប្រកាសដាក់ពាក្យប្ដឹងលោក កឹម សខា ប្រធានស្ដីទីគណបក្សសង្គ្រោះជាតិពីបទបរិហាកេរ្តិ៍ជាសាធារណៈនោះ នៅថ្ងៃទី១៥ ខែមិថុនានេះ គណបក្សសង្គ្រោះជាតិ តាមរយៈលោក យឹម សុវណ្ណ ជាមន្ត្រីនាំពាក្យនោះ បានអត្ថាធិប្បាយប្រាប់គេហទំព័រថ្មីៗថា ការដាក់ពាក្យប្ដឹងលោក កឹម សុខា របស់លោកតា ជុំ ម៉ី មិនអាចធ្វើឲ្យគណបក្សសង្គ្រោះជាតិ ឬលោក កឹម សុខា មានការព្រួយបារម្ភនោះទេ។ បើតាមលោក យឹម សុវណ្ណ ទាំងគណបក្សសង្រោះជាតិ ទាំងលោក កឹម សុខា គ្មានពេលមកគិតពិចារណាតាមការធ្វើព្យុះធ្វើភ្លៀងរបស់លោកតា ជុំ ម៉ី នោះទេ។
ថ្លែងប្រាប់គេហទំព័រថ្មីៗតាមទូរស័ព្ទ លោក យឹម សុវណ្ណ មន្ត្រីនាំពាក្យគណបក្សសង្គ្រោះជាតិនិយាយឲ្យដឹងថា គណបក្សសង្គ្រោះជាតិមិនមានការព្រួយរម្ភណាមួយនោះឡើយ ជាមួយការដាក់ពាក្យបណ្ដឹងរបស់លោកតា ជុំ ម៉ី ដែលប្ដឹងលោក កឹម សុខា ទៅកាន់សាលាដំបូងរាជធានីភ្នំពេញពីបទបរហាកេរ្តិ៍ជាសាធារណៈនោះ ហើយថា បណ្ដឹងរបស់លោកតា ជុំ ម៉ី ដែលប្ដឹងប្រឆាំងលោក កឹម សុខា នោះគឺជាការយល់ឃើញរបស់លោក ជុំ ម៉ី និងក្រុមរបស់គាត់តែប៉ុណ្ណោះ។
បើតាមលោក យឹម សុវណ្ណ ទាំងគណបក្សសង្គ្រោះជាតិ ទាំងលោក កឹម សុខា គ្មានពេលមកគិតពិចារណាដោះស្រាយបញ្ហាជាមួយការធ្វើព្យុះ ធ្វើភ្លៀង របស់លោកតា ជុំ ម៉ី នោះទេ ហើយថា បញ្ហាដែលគណបក្សរបស់លោកត្រូវប្រឈមតទល់ដោះស្រាយនោះ គឺជាបញ្ហាទុកលំបាករបស់ប្រជាជន។
លោក យឹម សុវណ្ណ បញ្ជាក់ថា ៖« គណបក្សសង្គ្រោះជាតិដែលមានលោក កឹម សុខាជាប្រធានស្ដីទី កំពុងតស៊ូជាមួយភាពអយុត្តិធម៌សម្រាប់ប្រជាជនខ្មែរ មិនមែនស្វែងរកវិធីធ្វើបាបខ្មែរគ្នាឯងដូចសកម្មភាពរបស់លោកតា ជុំ ម៉ី ធ្វើមកលើលោក កឹម សុខានោះទេ។
គួរបញ្ជាក់ថា នៅថ្ងៃទិ១៤ ខែមិថុនាម្សិលមិញនេះ ដោយការឈឺចាប់នឹងពាក្យសម្ដីរបស់លោក កឹម សុខា ដែលនិយាយថាគុកទួលស្លែងជាឆាកល្ខោន ឬជាគុកសិប្បនិម្មិតនោះ លោក ជុំ ម៉ី អតីតអ្នករួចជីវិតពីការធ្វើទារុណកម្មនៅគុកទួលស្លែង បានចេញមុខជំនួសក្រុមជនរងគ្រោះផ្សេងទៀត ដាកពាក្យប្ដឹងលោក កឹម សុខា ទៅកាន់សាលាដំបូងរាជាធានីភ្នំពេញពីបទ បរិហាកេរ្តិ៍ជាសាធារណៈ បន្ទាប់ពីលោក កឹម សុខា បាននិយាយថាសំឡេងរបស់លោកដែលត្រូវបានក្រុមជនរងគ្រោះនៃរបបខ្មែរក្រហមចាប់កំហុសបាននោះ គឺជាសំឡេងកាត់តរបស់ក្រុមខិលខូចដែលចង់មួលបង្កាច់ទំលាក់កំហុសលើរូបលោក៕
© រក្សាសិទ្ធិដោយ thmeythmey.com