ពេទ្យធ្មេញដែលនាំអ៊ីស្លង់ឡើង Euro និង World Cup ចេញពីតំណែងគ្រូបង្វឹក

កីឡាអន្តរជាតិ

អន្តរជាតិ

ពេទ្យធ្មេញដែលនាំអ៊ីស្លង់ឡើង Euro និង World Cup ចេញពីតំណែងគ្រូបង្វឹក

18, Jul 2018 , 12:33 pm

រូបភាព

ទោះបីមមាញឹកដឹកនាំក្រុមបាល់ទាត់ក៏ដោយ ក៏លោក Heimir Hallgrimsson បានអះអាងប្រាប់អ្នកសារព័ត៌មានថា លោកនៅតែបើកគ្លីនិកព្យាបាលធ្មេញដដែល។ រូបថត FIFA និង Ole

ដោយ: ទេព ពិទូរ្យ

លោក Heimir Hallgrimsson ជាទន្តបណ្ឌិតមួយរូប ប៉ុន្តែឈ្មោះគាត់ត្រូវបានកត់ត្រានៅក្នុងប្រវត្តិសាស្ត្រកីឡាបាល់ទាត់អ៊ីស្លង់ តាមរយៈការនាំប្រទេសកោះដ៏តូចមួយនេះឡើងទៅលេងពានរង្វាន់អឺរ៉ុប (Euro Championship) និងពិភពលោក (World Cup) ជាប្រវត្តិសាស្ត្រ។ ទោះបីមិនស្ថិតក្រោមសម្ពាធក៏ដោយ លោក Hallgrimsson បានសម្រេចលាលែងពីតំណែងគ្រូបង្វឹកអ៊ីស្លង់ ដែលលោកបានដឹកនាំអស់រយៈពេល៧ឆ្នាំ។ នេះបើតាមការអះអាងសហព័ន្ធកីឡាបាល់ទាត់អ៊ីស្លង់ កាលពីថ្ងៃទី១៧ ខែកក្កដា។

គ្រូបង្វឹកវ័យ ៥១ ឆ្នាំរូបនេះ ត្រូវបានសហព័ន្ធកីឡាបាល់ទាត់អ៊ីស្លង់ (KSI) ជ្រើសរើសមកធ្វើជាជំនួយការលោក Lars Lagerback កាលពីឆ្នាំ ២០១១ មុនក្លាយជាអ្នកគ្រប់គ្រងពេញលេញក្នុងឆ្នាំ ២០១៤ ហើយបានជួយឲ្យអ៊ីស្លង់ទម្លាក់អង់គ្លេសនៅ Euro 2016 ទៀតផង។

ជាអតីតពេទ្យធ្មេញ Hallgrimsson ជាគ្រូបង្វឹកតែម្នាក់គត់ក្នុងប្រវត្តិសាស្ត្របាល់ទាត់អ៊ីស្លង់ក្នុងការនាំប្រទេសដ៏តូចមួយនេះឈានទៅកាន់ការប្រកួតពានរង្វាន់ពិភពលោក FIFA World Cup ជាលើកដំបូង ដែលធ្វើឡើងក្នុងប្រទេសរុស្ស៊ី ឆ្នាំ២០១៨នេះ។

យ៉ាងណាក៏ដោយ Hallgrimsson មិនអាចជួយក្រុមឆ្លងផុតវគ្គចែកពូលឡើយ បើទោះប្រកួតស្មើជាមួយក្រុមខ្លាំងអាហ្សង់ទីនក៏ដោយ។

សហព័ន្ធកីឡាបាល់ទាត់អ៊ីស្លង់ បានបញ្ជាក់ពីការលាលែងយ៉ាងនេះថា៖ «KSI អាចបញ្ជាក់ថា Heimir Hallgrímsson នឹងមិនបន្តជាគ្រូបង្វឹករបស់ក្រុមជម្រើសជាតិអ៊ីស្លង់ទៀតទេ។ Hallgrímsson បានស្នើសុំឈប់ពីតំណែងរបស់គាត់ក្រោយពីបានបំពេញការងាររយៈពេល ៧ ឆ្នាំពោលគឺតាំងពីឆ្នាំ ២០១១៕