អន្តរជាតិ
អឺរ៉ុបនិងជប៉ុន ចាប់ដៃគ្នាទប់ទល់នយោបាយ America First របស់ ត្រាំ ប្រធានក្រុមប្រឹក្សាអឺរ៉ុប ដូណាល់ ទូស, នាយករដ្ឋមន្រ្តីជប៉ុន ស៊ីនហ្សូ អាបេ និងប្រធានគណៈកម្មការអឺរ៉ុប ហ្សង់-ក្លូដ ចាំងគើ (រូបភាព AFP)
× សហភាពអឺរ៉ុប និងជប៉ុន នៅថ្ងៃទី១៨ ខែកក្កដា បានចុះកិច្ចព្រមព្រៀងបង្កើតតំបន់ពាណិជ្ជកម្មសេរីដ៏ធំរបស់ពិភពលោក។ ការចាប់ដៃរវាងមហាអំណាចសេដ្ឋកិច្ចដ៏ធំទាំងពីរនេះ ជាសារឆ្លើយតបទៅនឹងនយោបាយ America First របស់ប្រធានាធិបតី ដូណាល់ ត្រាំ ដែលកំពុងជំរុញនយោបាយសេដ្ឋកិច្ចគាំពារនិយម និងការបង្កើតរបាំងពាណិជ្ជកម្ម។ ដោយសារគិតតែប្រយោជន៍អាមេរិកខ្លាំងពេក លោក ត្រាំ បានធ្វើឲ្យសម្ព័ន្ធមិត្តអាមេរិកនានាអាក់អន់ចិត្ត និងងាករកដៃគូរកស៊ីផ្សេងវិញ។
សម្ព័ន្ធមិត្តដ៏ធំរបស់អាមេរិកចំនួនពីរ គឺសហភាពអឺរ៉ុប និងជប៉ុន បានសម្រេចចិត្តបង្កើតតំបន់ពាណិជ្ជកម្មសេរីទ្វេភាគីដ៏ធំមួយដើម្បីផ្លាស់ប្ដូរទំនិញដោយគ្មានរបាំងអ្វីទាំងអស់។ នៅថ្ងៃទី១៧ ខែកក្កដា នាយករដ្ឋមន្ត្រីជប៉ុន ស៊ីនហ្សូ អាបេ, ប្រធានក្រុមប្រឹក្សាអឺរ៉ុប ដូណាល់ ទូស និងប្រធានគណៈកម្មការអឺរ៉ុប ហ្សង់-ក្លូដ ចាំងគើ បានចុះហត្ថលេខាលើកិច្ចព្រមព្រៀងដៃគូសេដ្ឋកិច្ចជប៉ុន-សហភាពអឺរ៉ុប ដែលមានគោលដៅជំរុញការធ្វើពាណិជ្ជកម្មដោយសេរី។
តំបន់ពាណិជ្ជកម្មសេរីថ្មីនេះ មានទំហំស្មើនឹង៣០ភាគរយនៃផលិតផលក្នុងស្រុកសរុបរបស់ពិភពលោក និងគ្របដណ្ដប់លើមនុស្ស៦០០លានដុល្លារ។ ក្រោយលេចជារូបរាងផ្លូវការនៅឆ្នាំ២០១៩ របាំងពន្ធគយលើទំនិញជប៉ុនចូលទីផ្សារអឺរ៉ុប និងផលិតផលអឺរ៉ុបចូលទីផ្សារជប៉ុន នឹងត្រូវលុបចោល ឬកាត់បន្ថយ ហើយការរកស៊ី និងការវិនិយោគទ្វេភាគី ក៏ត្រូវជំរុញកាន់តែខ្លាំងថែមទៀត។ កាន់តែសំខាន់ វាជាការឆ្លើយទៅនឹងនយោបាយគាំពារនិយមរបស់អាមេរិកទៀតផង។
បើតាមទីភ្នាក់ងារព័ត៌មាន AFP លោក អាបេ និយាយថា កិច្ចព្រមព្រៀងនេះបានបង្ហាញពិភពលោកពីឆន្ទៈឥតងាករេរបស់ជប៉ុន និងសហភាអឺរ៉ុបក្នុងការដឹកនាំពិភពលោកក្នុងនាមជាជើងឯកនៃពាណិជ្ជកម្មសេរី ក្នុងពេលដែលនយោបាយគាំពារនិយមកំពុងសាយភាយ។ នាយករដ្ឋមន្ត្រីជប៉ុនទំនងចង់រិះគន់ប្រធានាធិបតី ដូណាល់ ត្រាំ ដែលកំពុងអនុវត្តនយោបាយគិតតែប្រយោជន៍ខ្លាំងពេករហូតភ្លេចគិតពីប្រព័ន្ធពាណិជ្ជកម្មអន្តរជាតិទៅហើយនោះ។
ថ្លែងក្រោយចុះហត្ថលេខាដែលធ្វើនៅទីក្រុងតូក្យូ លោក ទូស ចាត់ទុកកិច្ចព្រមព្រៀងនេះជាសារដ៏ច្បាស់មួយដែលប្រឆាំងគំនិតគាំពារនិយម។ ក្នុងន័យបង្ហាញពីជំហរផ្ទុយពីនយោបាយអាមេរិក ប្រធានក្រុមប្រឹក្សាអឺរ៉ុបរូបនេះសង្កត់ថា៖ «យើងកំពុងផ្ញើសារថា អ្នកអាចពឹងផ្អែកលើយើងទាំងពីរ គឺជប៉ុន និងសហភាពអឺរ៉ុប។ យើងមានការទទួលខុសត្រូវ ច្បាសលាស់ ហើយយើងបន្តការពារសណ្ដាប់ធ្នាប់ពិភពលោកដោយផ្អែកលើច្បាប់ សេរីភាព និងតម្លាភាព។»
ជប៉ុន និងសហភាពអឺរ៉ុប ដែលធ្លាប់ពឹងផ្អែកខ្លាំងលើទីផ្សារអាមេរិកនោះ ត្រូវបង្ខំចិត្តរកគោលដៅថ្មី ព្រោះលោក ត្រាំ បានសម្រេចចិត្តបង្កើនពន្ធនាំចូលលើទំនិញជាច្រើនមុខជាពិសេសទំនិញកសិកម្ម និងឧស្សាហកម្មតែម្ដង។ ក្រោមកិច្ចព្រមព្រៀងថ្មីដែលរង់ចាំការផ្ដល់សច្ចាប័នពីស្ថាប័ននីតិបញ្ញត្តិរៀងៗខ្លួននោះ មហាអំណាចសេដ្ឋកិច្ចពិភពលោកទាំងពីរអាចប្រើប្រាស់ទីផ្សាររៀងៗខ្លួនដោយមិនមានបញ្ហារាំងស្ទះអ្វីទៀតឡើយ៕
Tag:
អឺរ៉ុប
ជប៉ុន
អាមេរិក
America First
© រក្សាសិទ្ធិដោយ thmeythmey.com