ជាតិ
នៅសល់ប៉ុស្តិ៍នគរបាល១៤៤ទៀត ដែលមិនទាន់កសាង សម្តេច ស ខេង ធ្វើជាអធិបតីក្នុងពិធីប្រគល់ម៉ូតូ១៦៤៦គ្រឿងដល់ប៉ុស្តិ៍នគរបាលទូទាំងប្រទេស នៅព្រឹកថ្ងៃទី១៨ ខែកក្កដា ឆ្នាំ២០១៨
× ក្នុងចំណោមប៉ុស្តិ៍នគររដ្ឋបាល តាមឃុំ-សង្កាត់ទាំង១៦៤៦ នៅទូទាំងប្រទេស មានប៉ុស្តិ៍នគរបាល១៤៤ ដែលមិនទាន់បានកសាង។ នេះបើសម្តេច ស ខេង រដ្ឋមន្ត្រីក្រសួងមហាផ្ទៃ ដែលថ្លែងក្នុងពិធីប្រគល់ម៉ូតូ១៦៤៦គ្រឿង ដល់ប៉ុស្តិ៍នគរបាលទូទាំងប្រទេស នៅព្រឹកថ្ងៃទី១៨ ខែកក្កដា ឆ្នាំ២០១៨។
សម្តេច ស ខេង អះអាងថា តាមគម្រោង ប៉ុស្តិ៍នគរបាលទាំង១៤៤ នឹងត្រូវកសាងឲ្យរួចរាល់ នៅឆ្នាំ២០២០។ ប៉ុន្តែរដ្ឋមន្ត្រីក្រសួងមហាផ្ទៃ សង្កត់ធ្ងន់ថា រដ្ឋាភិបាល នឹងខិតខំកសាងប៉ុស្តិ៍នគរបាលទាំងនោះ ឲ្យរួចរាល់នៅត្រឹមឆ្នាំ២០១៩ តាមយរៈការស្វែងរកថវិកាពីប្រភពផ្សេងៗ ក្រៅតែថវិការបស់រដ្ឋ។
សម្តេច ស ខេង បញ្ជាក់យ៉ាងដូច្នេះថា៖«មិនមែនដើម្បីបានអង្គុយក្នុងម្លប់ស្រួលនោះទេ តែបើគ្មានកន្លែងធ្វើការ គឺមិនដឹងថាដាក់ឯកសារនៅឯណា។ ឯកសារនៅរាយប៉ាយ ខ្លះនៅតាមផ្ទះមេប៉ុស្តិ៍អ៊ីចឹងទៅ»។
រដ្ឋមន្ត្រីក្រសួងមហាផ្ទៃ បន្តថា ប៉ុស្តិ៍នគរបាលនីមួយៗ គឺជាកម្លាំងស្នូល ក្នុងការរក្សាសន្តិសុខ តាមមូលដ្ឋាន។ សម្តេច វាយតម្លៃជាវិជ្ជមានថា បច្ចុប្បន្ន សមត្ថកិច្ចតាមប៉ុស្តិ៍នគរបាល យល់ដឹងពីការការពារនិងការបម្រើប្រជាពលរដ្ឋ៕
Tag:
ប៉ុស្តិ៍នគរបាល
សន្តិសុខ
ស ខេង
© រក្សាសិទ្ធិដោយ thmeythmey.com