ជាតិ
សេដ្ឋកិច្ច
ចិនផ្តល់កម្ចី២៥៩លានដុល្លារដល់កម្ពុជា លើគម្រោងសាងសង់ផ្លូវក្រវាត់ក្រុងទីបី
× ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀងឥណទានសម្បទានជាមួយធនាគារនីហរ័ណ-អាហរ័ណចិន នូវទឹកប្រាក់ទំហំ២៥៩លានដុល្លារ សម្រាប់ហិរញ្ញប្បទានដល់គម្រោងសាងសង់ផ្លូវក្រវាត់ក្រុងទីបី។ នេះបើតាមការផ្សាយរបស់ទីភ្នាក់ងារព័ត៌មាន AKP។
គម្រោងសាងសង់ផ្លូវក្រវាត់ក្រុងទីបីនេះ សម្រាប់ស្ថាបនាផ្លូវប្រវែង ៤៧,៦ គីឡូម៉ែត្រ។ វាជាប្រភេទផ្លូវ៤គន្លង ដោយមានទទឹង២៥ម៉ែត្រ សម្រាប់ផ្លូវរថយន្ត៤គន្លង ដោយ១គន្លងមានប្រវែង៣,៥០ម៉ែត្រ និងផ្លូវទោចក្រយានយន្ត២គន្លង ដោយមានប្រវែង២,២៥ម៉ែត្រក្នុង១គន្លង ។
ផ្លូវក្រវាត់ក្រុងទីបីនេះ ចាប់ផ្តើមធ្វើពីផ្លូវជាតិលេខ៤ ម្តុំអូរដឹម ត្រង់គីឡូម៉ែត្រលេខ ១៤+១០៥ ទៅចំណុចបញ្ចប់ភ្ជាប់នឹងផ្លូវជាតិលេខ១ ត្រង់គីឡូម៉ែត្រលេខ ២៤+៨៤០ ដោយត្រូវកាត់ផ្លូវជាតិលេខ៣ ត្រង់ចំណុចគីឡូម៉ែត្រលេខ ២១+២០០ កាត់ផ្លូវជាតិលេខ២ ត្រង់ចំណុចគីឡូម៉ែត្រលេខ ២២+៨០០ និងកាត់ផ្លូវជាតិលេខ២១ ត្រង់ចំណុចគីឡូម៉ែត្រលេខ ១៨+៤០០ និងផ្លូវខ្នែងប្រវែង៥.៣៧៥គីឡូម៉ែត្រ។
ផ្លូវក្រវ៉ាត់ក្រុងទីបីនេះ ជាខ្សែផ្លូវថ្មីមួយ ដែលតភ្ជាប់ផ្លូវជាតិសំខាន់ៗរបស់ប្រទេសកម្ពុជា ដោយចាប់ពីស្ពានព្រែកព្នៅផ្លូវជាតិលេខ៥ ឆ្លងមកផ្លូវជាតិលេខ៤ ភ្ជាប់មកផ្លូវជាតិលេខ៣ ផ្លូវជាតិលេខ២ ផ្លូវជាតិលេខ២១ និងផ្លូវជាតិលេខ១ នឹងភ្ជាប់ទៅកំពង់ផែភ្នំពេញថ្មី។
ជាមួយគ្នានេះ ផ្លូវក្រវ៉ាត់ក្រុងទីបី នឹងរួមចំណែកជួយសម្រួលចរាចរណ៍ក្នុងរាជធានីភ្នំពេញ និងការអនុវត្តគោលនយោបាយអភិវឌ្ឍន៍ឧស្សាហកម្មរបស់ប្រទេសកម្ពុជា និងជាខ្សែផ្លូវថ្មីមួយទៀតបន្ទាប់ពីផ្លូវក្រវ៉ាត់ក្រុងទី២ ដែលកំពុងដំណើរការសាងសង់។
សូមបញ្ជាក់ថា កិច្ចព្រមព្រៀងឥណទានសម្បទានសម្រាប់គម្រោងសាងសង់ផ្លូវក្រវាត់ក្រុងទី៣ ដែលកម្ពុជា និងចិនបានចុះហត្ថលេខានេះ គឺជាផ្លែផ្កាថ្មីមួយទៀត ដែលកើតចេញពីភាពជាដៃគូយុទ្ធសាស្ត្រគ្រប់ជ្រុងជ្រោយរវាងរដ្ឋាភិបាលកម្ពុជា ជាមួយរដ្ឋាភិបាលចិន៕
Tag:
ហិរញ្ញប្បទាន
ចិន
ផ្លូវក្រវាត់ក្រុង
© រក្សាសិទ្ធិដោយ thmeythmey.com