អន្តរជាតិ
ស្នងការសិទ្ធិមនុស្ស UN ទាមទារឲ្យអ៊ីស្រាអែលបញ្ចប់ការឃុំឃាំងក្មេងប៉ាឡេស្ទីនជាង៤០០នាក់
× ស្នងការសិទ្ធិមនុស្សអង្គការសហប្រជាជាតិបានទាមទារឲ្យអ៊ីស្រាអែលប្រញាប់ឈប់ឃុំឃាំង ហើយដំណើរការនីតិវិធីតុលាការពាក់ព័ន្ធនឹងក្មេងៗជនជាតិប៉ាឡេស្ទីនជាង ៤០០ នាក់ ឬអាចដោះលែងពួកគេឲ្យមានសេរីភាពវិញដែរ បើពួកគេគ្មានទោស។
ក្នុងកិច្ចប្រជុំមួយនាថ្ងៃចន្ទទី ២៣ ខែកក្កដា លោក Zeid Ra'ad Al Hussein ស្នងការជាន់ខ្ពស់ទទួលបន្ទុកសិទ្ធិមនុស្សអង្គការសហប្រជាជាតិបានទិតៀនរដ្ឋាភិបាលអ៊ីស្រាអែលដែលបន្តឃុំខ្លួនក្មេងៗជនជាតិប៉ាឡេស្ទីនប្រហែល ៤៤០ នាក់ដោយគ្មានការដោះលែង ឬកាត់ទោសពួកគេតាមនីតិវិធីឡើយ។
ទីភ្នាក់ងារព័ត៌មាន AFP ផ្សាយថា មន្ត្រីជាន់ខ្ពស់រូបនេះអះអាងថា អ៊ីស្រាអែលត្រូវចាប់ផ្តើមនីតិវិធីចោទប្រកាន់ឬដោះលែងក្មេងឲ្យមានសេរីភាពវិញ ហើយអ្វីដែលអ៊ីស្រាអែលកំពុងអនុវត្តនោះគឺ បំពារបំពានច្បាប់អន្តរជាតិនិងសិទ្ធិមនុស្សធ្ងន់ធ្ងរ។
លោក Zeid Ra'ad Al Hussein បាននិយាយដូច្នេះ៖ «អ៊ីស្រាអែលគួរចោទប្រកាន់ភ្លាមៗឬដោះលែងពួកគេទាំងអស់នោះ។ វាច្បាស់ណាស់ថា ច្បាប់អន្តរជាតិចែងថា ការឃុំខ្លួនកុមារជាវិធានការចុងក្រោយបំផុត»។
«ហើយបើទោះជាក្មេងតូចឬវ័យជំទង់ក៏ដោយ ការឃុំខ្លួនដោយគ្មានការកាត់ទោសដោយមានភស្តុតាងត្រឹមត្រូវ រក្សាទុកជាសម្ងាត់ ក៏ដូចចេញបទបញ្ជាបន្តការឃុំខ្លួនពួកគេទៀតក្នុងរយៈពេលនោះគឺផ្ទុយនឹងកាតព្វកិច្ចរបស់អ៊ីស្រាអែលស្ថិតក្រោមច្បាប់អន្តរជាតិ ហើយវាត្រូវតែបញ្ចប់»។ លោក Zeid Ra'ad បានបន្តដូច្នេះ។
ក្រៅថាពីទិតៀនអ៊ីស្រាអែលរឿងឃុំខ្លួនក្មេង មេស្ថាប័នសិទ្ធិមនុស្សអង្គការសហប្រជាជាតិខាងលើក៏បានឆ្លៀតរិះគន់អ៊ីស្រាអែលផងដែរជុំវិញការចាប់ និងឃុំខ្លួនសកម្មជនសិទ្ធិមនុស្សតាមអំពើចិត្តរបស់ខ្លួនកន្លងមកនេះដោយគ្មានខ្លាចក្រែងសហគមន៍អន្តរជាតិបន្តិចសោះ។
កិច្ចពិភាក្សានេះដែរផ្តោតសំខាន់លើអំពើហិង្សាដែលកើតឡើងនៅតំបន់កាហ្សា ហើយបញ្ហានេះក៏នឹងត្រូវលើកឡើងក្នុងកិច្ចពិភាក្សាប្រចាំខែនៅក្រុមប្រឹក្សាសន្តិសុខអង្គការសហប្រជាជាតិនៅថ្ងៃអង្គារទី ២៤ កក្កដានេះដូចគ្នា។
Tag:
UN
Zeid Ra\'ad Al Hussein
ប៉ាឡេស្ទីន
អ៊ីស្រាអែល
© រក្សាសិទ្ធិដោយ thmeythmey.com