អន្តរជាតិ
IMF៖អតិផរណាវេណេស៊ុយអេឡានឹងកើនដល់១លានភាគរយ ស្រដៀងស៊ីមបាវ៉េកាលពីចុងឆ្នាំ ២០០០
× មូលនិធិរូបិយវត្ថុអន្តរជាតិ (IMF) បានព្រមានថា វិបត្តិហិរញ្ញវត្ថុរដ្ឋអាមេរិកឡាទីនវេណេស៊ុយអេឡាធ្លាក់ដល់កម្រិតធ្ងន់ធ្ងរបំផុត ហើយអត្រាអតិផរណាអាចនឹងកើនឡើងដល់ ១លានភាគរយត្រឹមចុងឆ្នាំ ២០១៨នេះផង។
ស្ថានការណ៍សេដ្ឋកិច្ច និងហិរញ្ញវត្ថុវេណេស៊ុយអេឡាមិនមានសញ្ញាប្រសើរឡើងឡើយ ហើយវិបត្តិមនុស្សជាតិកាន់តែធ្ងន់ធ្ងរទៀត។ ថ្ងៃចន្ទទី ២៣ ខែកក្កដាតំណាងមូលនិធិរូបិយវត្ថុបានព្រមានថា បញ្ហាអតិផរណានៅវេណេស៊ុយអេឡាធ្លាក់ដល់កម្រិតប្រកាសអាសន្នហើយ។ អនាគតវេណេស៊ុយអេឡាមិនខុសពីអាល្លឺម៉ង់ក្រោយសង្គ្រាមលោកលើកទីមួយ និងស៊ីមបាវ៉េនៅចុងឆ្នាំ ២០០០ ឡើយ។
«យើងព្យាករថា អត្រាអតិផរណានឹងកើនដល់ ១លានភាគរយនៅចុងឆ្នាំ ដែលវាបង្ហាញថា ស្ថានភាពនៅវេណេស៊ុយអេឡាប្រហាក់ប្រហែលនឹងអាល្លឺម៉ង់ឆ្នាំ ១៩២៣ ឬស៊ីមបាវ៉េនៅក្នុងអំឡុងចុងឆ្នាំ ២០០០ដូចគ្នា»។ ទីភ្នាក់ងារព័ត៌មាន AFP ស្រង់សម្តីលោក Alejandro Werner ប្រធាននាយកដ្ឋានទទួលបន្ទុកអឌ្ឍគោលខាងលិចនៃមូលនិធិរូបិយវត្ថុអន្តរជាតិបែបនេះ។
យ៉ាងណាមិញ អ្នកតំណាងស្ថាប័នអន្តរជាតិទទួលស្គាល់ថា ការព្យាករអតិផរណាកម្រិតខ្ពស់នេះនៅមិន ច្បាស់លាស់នៅឡើយ ហើយវាអាចប្រែប្រួលទៀត។ ប៉ុន្តែកម្រិតអតិផរណាអាចស្ថិតនៅក្នុងចន្លោះពី ៨សែនភាគរយទៅដល់ ១លានភាគរយ។ អតិផរណាកម្រិតខ្ពស់បែបនេះនឹងមានផលប៉ះពាល់ខ្លាំងដល់បណ្តាប្រទេសជិតខាងនៅតំបន់អាមេរិកឡាទីនផងដែរ។
ទាក់ទិននឹងការកើនឡើងនៃអត្រាអតិផរណានៅវេណេស៊ុយអេឡា លោក Alejandro Werner បានចង្អុលលើគោលនយោបាយបោះពុម្ពលុយបន្ថែមសម្រាប់ផ្គត់ផ្គង់រដ្ឋាភិបាលវេណេស៊ុយអេឡា។ លោកបានសង្កត់ធ្ងន់ថា បើរដ្ឋាភិបាលវេណេស៊ុយអេឡាបន្តធ្វើបែបនេះ វានឹងបន្តបញ្ឆេះអតិផរណាឲ្យកើនរហ័សថែមទៀតដែរ។
តាមពិតទៅ សេដ្ឋកិច្ចវេណេស៊ុយអេឡារួមកាន់តែរួមតូចបីឆ្នាំបន្តបន្ទាប់គ្នានេះ ហើយនៅត្រឹមឆ្នាំ ២០១៨នេះ សេដ្ឋកិច្ចវេណេស៊ុយអេឡាធ្លាក់ចុះដល់ពីរខ្ទង់ពោលគឺ ១៨ ភាគរយឯណោះ។ ការថយចុះនៃទំហំសេដ្ឋកិច្ចវេណេស៊ុយអេឡានេះគឺដោយសារតែការផលិតប្រេងឆៅរបស់រដ្ឋអាមេរិកឡាទីនមួយនេះកាន់តែតិច។ របាយការណ៍អង្គការ OPEC បង្ហាញថា ការផលិតប្រេងនៅវេណេស៊ុយអេឡាធ្លាក់ចុះខ្លាំង។ ប្រទេសនេះបូមប្រេងបានតិចជាង ១,៥ លានបារ៉ែលក្នុងមួយថ្ងៃប៉ុណ្ណោះ បើទោះវេណេស៊ុយអេឡាមានប្រេងបម្រុងទុកច្រើនក្តី។
ស្ថានភាពសេដ្ឋកិច្ចកាន់តែអាក្រក់ជះឥទិ្ធពលកាន់តែខ្លាំងលើជីវភាពរស់នៅរបស់ប្រជាពលរដ្ឋវេណេស៊ុយអេឡា ហើយវាប្រាកដណាស់ថា ប្រជាជនកាន់តែច្រើននឹងបន្តរត់គេចចេញពីគ្រោះមហន្តរាយទៅជ្រកកោននៅប្រទេសជិតខាង។ ចំណែកប្រជាជនដែលបន្តរស់នៅក្នុងប្រទេសរងគ្រោះកាន់តែខ្លាំងដោយសារជំងឺតម្កាត់ កង្វះខាតស្បៀងអាហារ និងឱសថសម្រាប់ព្យាបាលជំងឺជាដើម៕
Tag:
ស៊ីមបាវ៉េ
វេណេស៊ុយអេឡា
IMF
© រក្សាសិទ្ធិដោយ thmeythmey.com