កីឡាជាតិ
ជាតិ
លោក ហៅ សុជាតិ រួចបម្រាមពីពានរង្វាន់សម្តេច ហ៊ុន សែន តែលីគកំពូលនៅដដែល
× គណៈកម្មការវិន័យនៃសហព័ន្ធកីឡាបាល់ទាត់កម្ពុជា បានសម្រចសម្រាលទោសលោក ហៅ សុជាតិ គ្រូបង្វឹកបឹងកេត ដោយអនុញ្ញាតឲ្យដឹកនាំក្រុមក្នុងពានរង្វាន់សម្តេច ហ៊ុន សែន ឡើងវិញ។ ប៉ុន្តែរក្សាការពិន័យក្នុងពានរង្វាន់លីគកំពូលរយៈពេល១ខែ និងថវិកា៥០ម៉ឺនរៀលនៅដដែល។ គណៈកម្មការវិន័យទុកពេល៥ថ្ងៃ ឲ្យសាមីរងបណ្តឹងក្នុងការប្តឹងឧទ្ធរណ៍ បើសិនមិនឯកភាពចំពោះការសម្រេចនេះ។
កាលពីថ្ងៃទី២៦ ខែកក្កដា ឆ្នាំ២០១៨ គណៈកម្មការវិន័យនៃសហព័ន្ធកីឡាបាល់ទាត់កម្ពុជា បានចេញសេចក្តីសម្រេច ពិន័យលោក ហៅ សុជាតិ គ្រូបង្វឹកបឹងកេត មិនឲ្យចូលរួមក្នុងព្រឹត្តិការណ៍ដែលរៀបចំដោយសហព័ន្ធរយៈពេល១ខែ និងពិន័យជាប្រាក់៥០ម៉ឺនរៀល ក្រោយរកឃើញថា គ្រូបង្វឹករូបនេះបានរុញ និងប្រើសម្តីមិនសមរម្យដាក់មន្ត្រីការប្រកួត។
ប៉ុន្តែនៅថ្ងៃទី១ ខែសីហានេះ គណៈកម្មវិន័យបានចេញសេចក្តីសម្រេចថ្មី១ទៀត ដោយអនុញ្ញាតឲ្យលោក ហៅ សុជាតិ ដឹកនាំក្រុមក្នុងពានរង្វាន់សម្តេច ហ៊ុន សែន ប្រចាំឆ្នាំ២០១៨ ធម្មតាឡើងវិញ។ ប៉ុន្តែរក្សាទុកការពិន័យរយៈពេល១ខែក្នុងពានរង្វាន់លីគកំពូល និងថវិកា៥០ម៉ឺនរៀលឲ្យនៅដដែល។ ទោះបីមានការសម្រាលទោស តែគណៈកម្មការវិន័យបានចោទលោក ហៅ សុជាតិ ពីបទប្រើឥរិយាបថមិនសមរម្យ គឺរុញ និងប្រើសម្តីមិនសមរម្យដាក់មន្ត្រីការប្រកួតដដែល។
ការសម្រាលទោសនេះ បន្ទាប់ពីថ្នាក់ដឹកនាំក្លិបបឹងកេត ប្តឹងឧទ្ធរណ៍សុំសម្រាលទោសទៅកាន់គណៈកម្មការឧទ្ធរណ៍ ក្រោយយល់ថា ការពិន័យនេះមានស្ថានទម្ងន់ទោសធ្ងន់ធ្ងរពេក។ ទោះបីយ៉ាងនេះក្តី សេចក្តីសម្រេចដែលចុះហត្ថលេខាដោយលោក អេង ពៅទិត្យ បានទុករយៈពេល៥ថ្ងៃឲ្យភាគរងបណ្តឹងក្នុងការប្តឹងឧទ្ធរណ៍ បើនៅតែមិនពេញចិត្តលើការសម្រេចលើកទី២នេះ៕
© រក្សាសិទ្ធិដោយ thmeythmey.com