អន្តរជាតិ
នាយករដ្ឋមន្ត្រី ម៉ូឌី ៖ ឥណ្ឌាដូចសត្វដំរីភ្ញាក់ពីដំណេក នាយករដ្ឋមន្រ្តីឥណ្ឌា នារិន្រ្ទា ម៉ូឌី (រូបភាព AFP)
× ឥណ្ឌាជាសត្វដំរី កំពុងរត់។ នេះជាពាក្យសរសើររបស់មន្ត្រីមូលនិធិរូបិយវត្ថុអន្តរជាតិ (IMF) ដែលប្រៀបធៀបទំហំសេដ្ឋកិច្ចដ៏ធំជាមួយនឹងកំណើនឆាប់រហ័សរបស់ឥណ្ឌាទៅនឹងសត្វដំរីមួយក្បាលដែលកំពុងរត់។ នៅថ្ងៃទី១៥ ខែសីហា នាយករដ្ឋមន្ត្រីឥណ្ឌាផ្ទាល់ នារិន្ទ្រា ម៉ូឌី ក៏បានប្រដូចឥណ្ឌាទៅនឹងសត្វដំរីដូចគ្នា ដោយលើកឡើងថា ដំរីឥណ្ឌាភ្ញាក់ពីដំណេក ហើយការរីកចម្រើននេះជាស្នាដៃរបស់រដ្ឋាភិបាលលោក។
នាឱកាសថ្ងៃបុណ្យឯករាជ្យជាតិឥណ្ឌាថ្ងៃទី១៥ ខែសីហា លោកនាយករដ្ឋមន្ត្រី នារិន្ទ្រា ម៉ូឌី បាននិយាយលើកសរសើរសមិទ្ធផលរបស់ប្រទេសដែលសម្រេចបានក្រោមការដឹកនាំរបស់លោកនារយៈពេល៥ឆ្នាំមកនេះ។ លោក ម៉ូឌី បានលើកឡើងពីការរីកចម្រើនផ្នែកសេដ្ឋកិច្ច និងបានប្រកាសផែនការធានារ៉ាប់រងសុខភាពទ្រង់ទ្រាយធំដែលនឹងអនុវត្តនៅកញ្ញា និងថា ឥណ្ឌានឹងបញ្ជូនមនុស្សទៅកាន់ទីលំហនៅឆ្នាំ២០២២ ផង។
ក្នុងសុន្ទរកថាជាង៨០នាទីខាងមុខវិមាន Red Fort ក្នុងរដ្ឋធានីញូវដែល្លី មេដឹកនាំជាតិនិយមរូបនេះនិយាយថា មុនលោកក្លាយជានាយករដ្ឋមន្ត្រីក្នុងឆ្នាំ២០១៤ ឥណ្ឌាត្រូវបានចាត់ទុកជាប្រទេសដែលមានការបែកបាក់។ លោក ម៉ូឌី ដែលឈ្នះឆ្នោតភ្លូកទឹកភ្លូកដីនោះបន្តថា ឥណ្ឌាបច្ចុប្បន្នជាទឹកដីនៃការកែទម្រង់ និងការផ្លាស់ប្ដូរ ហើយកំពុងស្ថិតក្នុងដំណើរទៅកាន់កំណើនសេដ្ឋកិច្ចដ៏ខ្ពស់មិនធ្លាប់មានពីមុនមក។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ដោយប្រៀបធៀបឥណ្ឌាទៅនឹងសត្វដំរី លោក ម៉ូឌី បញ្ជាក់ថា៖ «សព្វថ្ងៃ ពិភពលោកនិយាយថា សត្វដំរីបានក្រោកពីដំណេក កំពុងដើរ និងចូលរួមការប្រកួត»។ ប្រៀបធៀបប្រទេសទៅនឹងដំរី ព្រោះឥណ្ឌាដែលមានប្រជាជនលំដាប់ទីពីររបស់ពិភពលោក មានអត្រាកំណើនសេដ្ឋកិច្ចប្រចាំឆ្នាំច្រើនជាង៧ភាគរយក្រោយលោក ម៉ូឌី ក្លាយជានាយករដ្ឋមន្ត្រី ហើយត្រូវទស្សទាយថា នឹងបន្តរក្សាអត្រាខ្ពស់បែបនេះនៅរយៈពេលវែងទៀត។
ក្នុងរបាយការណ៍ចេញថ្ងៃទី៨ ខែសីហា IMF បានព្យាករកំណើនសេដ្ឋកិច្ចរបស់ឥណ្ឌាក្នុងឆ្នាំ២០១៨ នេះចំនួន៧.៣ភាគរយរហូតដល់ខែមីនាឆ្នាំ២០១៩ ។ ចាប់ពីឆ្នាំ២០១៩ អត្រាកំណើនសេដ្ឋកិច្ចរបស់ឥណ្ឌានឹងកើនដល់៧.៥ភាគរយឯណោះ ដែលនោះជាកំណើនមួយដ៏លឿនប្រៀបធៀបនឹងប្រទេសនានា។ បើតាមរបាយការណ៍ដដែលនេះ កំណើនសេដ្ឋកិច្ចរបស់ឥណ្ឌាមានទំហំប្រមាណ១៥ភាគរយនៃកំណើនសេដ្ឋកិច្ចពិភពលោក។
ក្នុងទិសដៅជំរុញសុខាមាលភាពប្រជាជន រដ្ឋាភិបាលឥណ្ឌានឹងដាក់ចេញផែនការផ្ដល់ធានារ៉ាប់រងប្រចាំឆ្នាំចំនួន៧ពាន់ដុល្លារទៅឲ្យប្រជាជន៥០០លាននាក់ដែលមានជីវភាពខ្សត់ខ្សោយ ដោយចាប់ផ្ដើមពីខែកញ្ញាតទៅ។ ប្រជាជនឥណ្ឌា៥០០លាននាក់នេះ ស្ទើរស្មើប្រជាជនសហភាពអឺរ៉ុបទៅហើយ។ លើសពីនោះ លោក ម៉ូឌី ក៏ប្រកាសគម្រោងបញ្ជូនជនជាតិឥណ្ឌាម្នាក់ដែលអាចជាបុរស ឬស្ត្រីទៅកាន់ទីអវកាសនៅរយៈពេល៤ឆ្នាំខាងមុខ៕
Tag:
ឥណ្ឌា
នារិន្ទ្រា ម៉ូឌី
© រក្សាសិទ្ធិដោយ thmeythmey.com