ជនជាតិចិន បង្កបទល្មើសច្រើនជាងគេ ក្នុងត្រីមាសទី២ ឆ្នាំ២០១៨

ជាតិ

សង្គមជាតិ

ជនជាតិចិន បង្កបទល្មើសច្រើនជាងគេ ក្នុងត្រីមាសទី២ ឆ្នាំ២០១៨

18, Aug 2018 , 7:59 am

រូបភាព

ដោយ:

ភ្នំពេញ៖ រយៈពេល៣ខែ ដោយគិតពីខែមេសា ដល់ខែមិថុនា ឆ្នាំ២០១៨ សមត្ថកិច្ច រកឃើញថា ក្នុងចំណោមជនបរទេស ដែលមករស់នៅ ធ្វើការ និងធ្វើដំណើរកម្សាន្តនៅកម្ពុជា ជនជាតិចិន បានប្រព្រឹត្តបទល្មើសច្រើនជាងគេ។

របាយការណ៍ត្រីមាសទី២ នៃក្រុមព័ត៌មានទាន់ហេតុការណ៍ជាមួយជនបរទេសប្រចាំនៅកម្ពុជា (HOTLINE) បានឱ្យដឹងថា វិនិយោគិន និងអ្នកទេសចរ មកកម្ពុជា បានទទួលរងគ្រោះចំនួន១៧៨ករណី ដោយភាគច្រើនជាអំពើចោរកម្ម លួច-ឆក់ មានដល់ទៅ៧៧ករណី និងមាន៣៧សញ្ជាតិ។ ចំណែក ជនបរទេសប្រព្រឹត្តបទល្មើសមានចំនួន ៨៨ករណី ភាគច្រើនបទល្មើសប្រើប្រាស់-ជួញដូរគ្រឿងញៀន ដែលមានចំនួន១៧ករណី និងត្រូវបាន ឃាត់ខ្លួន ៣៧៨នាក់ មាន២៥សញ្ជាតិ។ នេះបើតាមគេហទំព័រអគ្គស្នងការគរបាលជាតិ ដែលចុះផ្សាយ នៅថ្ងៃទី១៥ ខែសីហា។

អគ្គស្នងការនគរបាលជាតិ បានបន្តថា បើតាមរបាយការណ៍ខាងលើ ជនបរទេសដែលរងគ្រោះ ក្នុងត្រីមាសទី២ បានកើនឡើង ៣៧ករណី បើប្រៀបធៀបជាមួយត្រីមាសទី១ ក្នុងឆ្នាំ២០១៨ ហើយជនបរទេសរងគ្រោះច្រើនជាងគេមាន ចិន, វៀតណាម, បារាំង, អូស្ត្រាលី និងអង់គ្លេស។ ចំណែក ជនបរទេស ដែលប្រព្រឹត្តបទល្មើសក្នុងត្រីមាសទី២នេះ មាន៨៨ករណី ហើយជនបរទេ ដែលប្រព្រឹត្តច្រើនជាងគេមាន ចិន (២៥៧នាក់), នីហ្ស៊េរីយ៉ា (៣៧នាក់), វៀតណាម (១៤នាក់), ថៃ (១២នាក់) និង កូរ៉េខាងត្បូង (៨នាក់)។ កន្លែង ដែលកើតមានច្រើនបទល្មើសជាងគេ ដោយសារជនបរទេសទាំងនោះ គឺនៅរាជធានីភ្នំពេញ។

បើតាមប្រភពខាងលើ នាយឧត្ដមសេនីយ៍ ថោង លីម អគ្គស្នងការរងនគរបាលជាតិ បានណែនាំដល់នាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្តជាសមាជិក ត្រូវអនុវត្តតាមផែនការរបស់ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ ឱ្យមានប្រសិទ្ធិភាពខ្ពស់ក្នុងការការពារសន្តិសុខជូនវិនិយោគិន និងអ្នកទេសបរទេស ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជា ក្នុងការទាក់ទាញ និងលើកទឹកចិត្តវិស័យវិនិយោគ និងអ្នកទេសចរនៅកម្ពុជា។

នគរបាលជាតិ បានបន្ថែមទៀតថា ការណែនាំរបស់លោក ថោង លីម ធ្វើឡើងនៅក្នុងកិច្ចប្រជុំត្រួតពិនិត្យបូកសរុបលទ្ធផលការងារប្រចាំត្រីមាសទី២ ឆ្នាំ២០១៨ ជាមួយនាយកដ្ឋាន អង្គភាព ស្នងការដ្ឋាននគរបាលរាជធានី-ខេត្ត រួមជាមួយបណ្ដាស្ថានទូតនានាប្រចាំនៅកម្ពុជា នាថ្ងៃទី១៥ ខែសីហា នៅសាលប្រជុំក្រសួងមហាផ្ទៃ។

នៅក្នុងកិច្ចប្រជុំពិភាក្សាការងារ តំណាងស្ដានទូតប្រចាំនៅកម្ពុជា បានថ្លែងអំណរគុណដល់អគ្គស្នងការដ្ឋាននគរបាលជាតិ ជាពិសេសក្រុមព័ត៌មានទាន់ហេតុការណ៍ជាមួយជនបរទេសប្រចាំនៅកម្ពុជា ដែលបានយកចិត្តទុកដាក់ការពារ និងដោះស្រាយបញ្ហាជូនប្រជាពលរដ្ឋខ្លួន និងការពារសន្តិសុខ សុវត្ថិភាព ជូនវិនិយោគិន ភ្ញៀវទេសចបរទេស មន្ត្រីការទូត ទីតាំងស្ថានទូត និងនិវេសនដ្ឋានឯកអគ្គរាជទូត-រដ្ឋទូត ដែលមានវត្តមាននៅកម្ពុជា។ នេះបើតាមនគរបាលជាតិដដែល៕