ជាតិ
បាក់ឌុប
បាក់ឌុប៖ មុខវិជ្ជាដែលត្រូវប្រឡងនៅថ្ងៃនេះ សម្រាប់ថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម
× ភ្នំពេញ៖ ចាប់ពីម៉ោង ៧:៣០ នាទីព្រឹកថ្ងៃនេះ សិស្សទី១២គ្រប់រាជធានី-ខេត្ត ចាប់ផ្តើមប្រលងលើមុខវិទ្យា ប្រវត្តិវិទ្យា និងជីវវិទ្យា សម្រាប់ថា្នក់វិទ្យាសាស្ត្រ និងសម្រាប់ថា្នក់វិទ្យាសាស្ត្រសង្គម ប្រលងលើមុខវិទ្យា ផែនដីវិទ្យា និងប្រវត្តិវិទ្យា។ ពួកគេម្នាក់ៗ សុទ្ធតែស្វះស្វែង ញាប់ដៃ ក្នុងការសរសេរ ចម្លើយ រៀងៗខ្លួន ដែលប្រកបដោយភាពស្ងៀមស្ងាត់។
កាលវិភាគ សម្រាប់ការប្រឡងបាក់ឌុបឆ្នាំ២០១៨ នេះ ត្រូវបានបែងចែកជាពីរថា្នក់ គឺថា្នក់វិទ្យាសាស្ត្រ និងវិទ្យាសាស្ត្រសង្គម។ សម្រាប់ថ្នាក់វិទ្យាសាស្ត្ររួមមាន ប្រវត្តិវិទ្យា, ជីវវិទ្យា, គីមីវិទ្យា,រូបវិទ្យា, ភាសាបរទេស,អក្សរសាស្ត្រខ្មែរ, និងគណិតវិទ្យា។ ចំណែកថ្នាក់វិទ្យាសាស្ត្រសង្គម មាន ផែនដី និងបរិស្ថានវិទ្យា, ប្រវត្តិវិទ្យា, ភូមិវិទ្យា, ភាសាបរទេស, សីលធម៌ ពលរដ្ឋវិជ្ជា, អក្សរសាស្ត្រខ្មែរ និងគណិតវិទ្យា។
នៅរសៀលថ្ងៃទី២០ ខែសីហា សិស្សថ្នាក់វិទ្យាសាស្ត្រទាំងអស់ នឹងត្រូវបន្តប្រលងលើមុខវិទ្យា គីមីវិទ្យា និងភាសាបរទេស និងថា្នក់វិទ្យាសាស្ត្រសង្គម ប្រលង ភូមិវិទ្យា និងភាសាបរទេស។ សម្រាប់ការប្រលងនៅថ្ងៃចុងក្រោយទី២១ ខែសីហា សិស្សថ្នាក់វិទ្យាសាស្ត្រ នឹងត្រូវប្រលង អក្សរសាស្ត្រខ្មែរ និង រូបវិទ្យា ហើយថ្នាក់វិទ្យាសាស្ត្រសង្គម ប្រឡងលើវិញ្ញាសា គណិតវិទ្យា និងសីលធម៌ ពលរដ្ឋវិជ្ជា។ ចំណែក នៅរសៀលថ្ងៃដដែល ពួកគេនឹងបន្តប្រឡងមុខវិជ្ជាដ៏លំបាក គឺគណិតវិទ្យា ខណៈដែលថា្នក់វិទ្យាសាស្ត្រសង្គម ប្រឡង អក្សរសាស្ត្រខ្មែរ ដែលមានរយៈពេល ១៥០ នាទីដូចគ្នា។
សូមបញ្ជាក់ថា សម័យប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៨ មានបេក្ខជនប្រឡងចំនួន ១១៧.០៦១នាក់ និងមានមណ្ឌលប្រឡងចំនួន១៩៥ មណ្ឌល ចែកចេញជា ៤.៧១៦បន្ទប់ នៅរាជធានីខេត្តទាំង២៥ទូទាំងប្រទេស។ ការប្រកាសលទ្ធផលប្រឡង ធ្វើឡើងនៅថ្ងៃទី១១ ខែកញ្ញា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី១២ ខែកញ្ញា សម្រាប់មណ្ឌលប្រឡងតាម បណ្តាខេត្ត៕
© រក្សាសិទ្ធិដោយ thmeythmey.com