អន្តរជាតិ
ប្រធានសិទ្ធិមនុស្ស UN ៖ UN អាចដួល ព្រោះមហាអំណាចទាំង៥ ក្ដាប់កិច្ចការខ្លាំងពេក ឧត្តមស្នងការអង្គការសហប្រជាជាតិផ្នែកសិទ្ធិមនុស្ស Zeid Ra'ad Al Hussein (រូបភាព AFP)
× ប្រធានសិទ្ធិមនុស្សអង្គការសហប្រជាជាតិដែលចប់អាណត្តិ Zeid Ra'ad al-Hussein បានរិះគន់សមាជិកអចិន្ត្រៃយ៍ក្រុមប្រឹក្សាសន្តិសុខ ដែលមានអំណាចខ្លាំង និងសម្រេចចិត្តការងារយ៉ាងច្រើន។ លោក al-Hussein បានព្រមានថា អំណាចវ៉េតូដែលមានក្នុងដៃមហាអំណាចទាំង៥ ដូចជាចិន អាមេរិក អង់គ្លេស បារាំង និងរុស្ស៊ី អាចនាំឲ្យអង្គការពិភពលោកមួយនេះដួលរលំមិនខាន។ លោកក៏ស្នើឲ្យមានកំណែទម្រង់ស្ថាប័ននេះផង។
ពីទីស្នាក់ការក្នុងទីក្រុងហ្សឺណែវ ស្នងការជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស Zeid Ra'ad al-Hussein បាននិយាយរិះគន់ចំៗមហាអំណាចទាំង៥ ដែលជាសមាជិកអចិន្ត្រៃយ៍ក្រុមប្រឹក្សាសន្តិសុខ។ ក្រុមប្រឹក្សាសន្តិសុខ ជាស្ថាប័នមួយចំណុះអង្គការសហប្រជាជាតិ តែមានអំណាចខ្លាំងលើស្ថាប័នផ្សេងទៀត និងបានចាត់ចែងការងារជាច្រើនទាក់ទងបញ្ហាសន្តិសុខ និងការរក្សាស្ថិរភាពក្នុងពិភពលោក។
ក្នុងសន្និសីទសារព័ត៌មាននៅថ្ងៃទី២០ ខែសីហា លោក al-Hussein និយាយថា ចិន បារាំង រុស្ស៊ី អង់គ្លេស និងអាមេរិក កំពុងដឹកនាំការងារលើសលប់ ព្រោះប្រទេសទាំងនេះមានអំណាចវ៉េតូក្នុងដៃ ដែលអាចជំទាស់ដំណោះស្រាយណាមួយដែលស្នើដោយសមាជិកអង្គការសហប្រជាជាតិផ្សេងទៀតបានគ្រប់ពេល។ បើតាមមន្ត្រីកំពូលផ្នែកសិទ្ធិមនុស្សរូបនេះ នៅពេលប្រទេសទាំង៥ សហការគ្នា អ្វីៗល្អប្រសើរ តែពេលមិនត្រូវគ្នា បញ្ហានឹងជាប់គាំង ហើយស្ថាប័នទាំងមូលនឹងមិនដំណើរការដែរ។
«រឿងរ៉ាវនេះត្រូវតែផ្លាស់ប្ដូរ។ បើមិនដូច្នេះទេ នៅចុងបញ្ចប់ អង្គការសហប្រជាជាតិអាចដួលរលំ ហើយប៉ះពាល់សហគមន៍អន្តរជាតិធ្ងន់ធ្ងរ។» នេះជាការសម្ដីរបស់លោក al-Hussein ប្រធានសិទ្ធិមនុស្ស UN សញ្ជាតិហ្ស៊កដានី ដែលផ្សាយដោយទូរទស្សន៍ Al Jazeera ។ លោក al-Hussein ដែលត្រូវចប់អាណត្តិក្នុងខែសីហានេះបន្តថា ប្រទេសទាំងអស់ធ្វើការជាមួយគ្នា តែអ្នកនយោបាយដែលព្រហើន អាចបំផ្លាញប្រទេសដៃទៀតបាន។
តាមពិតទៅ ក្នុងពេលបួនឆ្នាំក្នុងតំណែងជាន់ខ្ពស់ផ្នែកសិទ្ធិមនុស្សនេះ លោក al-Hussein បានស្នើឲ្យមានការធ្វើកំណែទម្រង់ស្ថាប័នពិភពលោក ដើម្បីបើកផ្លូវដល់ការដោះស្រាយបញ្ហាឲ្យមានប្រសិទ្ធភាពខ្ពស់។ នេះក៏ព្រោះតែនាពេលកន្លងមក សមាជិកអចិន្ត្រៃយ៍តែងប្រើសិទ្ធិវ៉េតូលើដំណោះស្រាយនានាដែលលើកឡើងដោយសមាជិកមួយទៀត ហើយជាលទ្ធផលនោះ បញ្ហាមិនត្រូវបានដោះស្រាយឡើយជាក់ស្ដែងគឺវិបត្តិស៊ីរី ដែលអាមេរិក និងរុស្ស៊ីទាត់ចោលសំណើរៀងៗខ្លួន។
សូមបញ្ជាក់ថា ក្រុមប្រឹក្សាសន្តិសុខមានសមាជិកទាំងអស់១៥ប្រទេស មានសំឡេងបោះឆ្នោតមួយដូចគ្នា។ ៥ប្រទេសជាសមាជិកអចិន្ត្រៃយ៍ ប្រទេស១០ផ្សេងទៀត ជាសមាជិកមិនអចិន្ត្រៃយ៍ គ្មានអំណាចវ៉េតូ ហើយផ្លាស់ប្ដូររៀងរាល់២ឆ្នាំម្ដង។ ដោយសារបញ្ហា សំណើឲ្យមានការផ្លាស់ប្ដូរនៅក្នុងក្រុមប្រឹក្សាសន្តិសុខ ក៏កើនឡើងកាន់តែខ្លាំង ជាពិសេសកំណែទម្រង់អំណាចវ៉េតូតែម្ដងដើម្បីកាត់បន្ថយការបំពានអំណាចផង និងបើកច្រកឲ្យមានការសម្រេចចិត្តបានល្អផង៕
Tag:
UN
សិទ្ធិមនុស្ស
Zeid Ra\'ad al-Hussein
© រក្សាសិទ្ធិដោយ thmeythmey.com