កីឡាអន្តរជាតិ
អន្តរជាតិ
Ronaldo៖ ខ្ញុំចេញពី Real Madrid ដោយគ្មានស្រណោះអ្វីទេ
× ខ្សែប្រយុទ្ធឆ្នើម Cristiano Ronaldo បាននិយាយថាមិនមែនជារឿងពិបាកនោះទេក្នុងការសម្រេចចិត្តចាកចេញពី Real Madrid ដើម្បីទៅចូលរួមក្រុម Juventus បើទោះជាជោគជ័យជាមួយនឹងការឈ្នះពានជាច្រើនក្នុងរយៈពេល៩ឆ្នាំនៅទឹកដីអេស្ប៉ាញក៏ដោយ។ នេះបើតាមការផ្សាយរបស់ទីភ្នាក់ងារព័ត៌មាន Reuters។
អតីតសមាជិកក្រុម Manchester United វ័យ៣៣ឆ្នាំរូបនេះបានចូលរួមជាមួយក្រុមម្ចាស់ជើងឯកអ៊ីតាលី Serie A នៅមុនបើករដូវកាលថ្មីដោយយល់ព្រមចុះកិច្ចសន្យារយៈពេល៤ឆ្នាំ។ នេះមានន័យថា Ronaldo បានបញ្ចប់រដូវកាលដ៏អស្ចារ្យជាមួយក្លិបមានមូលដ្ឋានក្នុងក្រុងម៉ាឌ្រីដក្រោយជួយក្រុមឈ្នះពាន La Liga ពីរលើកនិង Champions League រហូតដល់ទៅ ៤សម័យ។
ម្ចាស់ពាន Ballon d'Or ៥សម័យកាលរៀបរាប់ជុំវិញការចាកចេញដូច្នេះថា៖«នេះគឺជាការសម្រេចចិត្តមួយដ៏ងាយស្រួល។ ខ្ញុំបានធ្វើរឿងជាច្រើនដែលមិនគួរឲ្យជឿសម្រាប់ Real ខ្ញុំបានឈ្នះគ្រប់យ៉ាង គ្រួសាររបស់ខ្ញុំរស់នៅយ៉ាងសុខសាន្តនៅទីនោះ ប៉ុន្តែវាគ្រាន់តែជាផ្នែកមួយនៃអតីតកាលប៉ុណ្ណោះ»។
ក្លិបសេះបង្កង់ Juventus បានចំណាយទឹកប្រាក់១១៥លានដុល្លារអាមេរិក ដើម្បីទទួលបាន Ronaldo ពីទឹកដី Santiago Bernabeu ដោយបានបង្ហាញខ្លួនជាលើកដំបូងក្នុងការទទួលជ័យជម្នះ ៣-២ លើក្រុម Chievo ក្នុងការប្រកួតសប្តាហ៍ទី១ ក្របខណ្ឌ Serie A រដូវកាល ២០១៨-២០១៩៕
Tag:
បាល់ទាត់
Cristiano Ronaldo
Real Madrid
Juventus
© រក្សាសិទ្ធិដោយ thmeythmey.com