ជាតិ
នយោបាយជាតិ
៥នាក់រួចខ្លួនហើយ ចុះអ្នកបន្ទាប់? ពីឆ្វេងទៅស្តាំ៖ លោក គឹម សុខ, លោកស្រី ទេព វន្នី, លោក អ៊ួន ឈិន, លោក យាង សុជាមេត្តា, លោក សួន សេរីរដ្ឋា
× ភ្នំពេញ៖ ប្រមាណ២០ថ្ងៃ ក្រោយការបោះឆ្នោតត្រូវបានបញ្ចប់ អ្នកជាប់ឃុំ៥នាក់ ដែលគេដឹងថាមិនសូវត្រូវជាមួយរដ្ឋាភិបាល ត្រូវបានដោះលែងជាបន្តបន្ទាប់។ អ្នកទាំង៥នោះ គឺលោក គឹម សុខ អ្នកវិភាគនយោបាយ លោកស្រី ទេព វន្នី សកម្មជនបឹងកក់ លោក អ៊ួន ឈិន-លោក យ៉ាង សុជាមេត្តា អតីតអ្នកកាសែតនៃវិទ្យុអាស៊ីសេរី និងលោក សួន សេរីរដ្ឋា អតីតប្រធានគណបក្សអំណាចខ្មែរ។
ក្នុងចំណោមអ្នកទាំង៥ លោក គឹម សុខ ជាមនុស្សមុនគេ ដែលត្រូវបានដោះលែង កាលពីថ្ងៃទី១៧ ខែសីហា ឆ្នាំ២០១៨។ អ្នកវិភាគនយោបាយរូបនេះ មានឱកាសទទួលបានសេរីភាពឡើងវិញ បន្ទាប់ពីជាប់ពន្ធនាគារគ្រប់តាមកាលកំណត់ មិនមែនដោយសារតែនាយករដ្ឋមន្ត្រី ថ្វាយសំណើទៅព្រះមហាក្សត្រ សុំព្រះរាជទានលើកលែងទោសឲ្យនោះទេ។
លោក គឹម សុខ ជាប់ពន្ធនាគារ កាលពីថ្ងៃទី១៧ ខែកុម្ភៈ ឆ្នាំ២០១៧ ក្រោមបណ្តឹងរបស់សម្តេចនាយករដ្ឋមន្ត្រី ហ៊ុន សែន។ មូលហេតុដែលនាំឲ្យលោករងបណ្តឹងនេះ ដោយសារតែលោក និយាយថា សម្តេច ហ៊ុន សែន ស្ថិតនៅពីក្រោយអំពើឃាតកម្មលើលោកបណ្ឌិត កែម ឡី។ តុលាការ បានកាត់ទោសលោក ឲ្យជាប់ពន្ធនាគាររយៈពេល១៨ខែ។
អ្នកទី២ ដែលមានសំណាងបានចេញពីពន្ធនាគារ គឺលោកស្រី ទេព វន្នី ជាស្ត្រីដ៏សកម្មក្នុងការតវ៉ារឿងដីធ្លីនៅតំបន់បឹងកក់ និងតែងជំទាស់នឹងរឿងអយុត្តិធម៌ផ្សេងៗ។ លោកស្រី ត្រូវបានតុលាការ កាត់ទោសឲ្យជាប់ពន្ធនាគាររយៈពេល២ឆ្នាំកន្លះ។
ប៉ុន្តែ ក្រោយជាប់ឃុំបាន២ឆ្នាំ លោកស្រី ត្រូវបានព្រះមហាក្សត្រ ចេញព្រះរាជក្រឹត្យលើកលែងទោស កាលពីថ្ងៃទី២០ ខែសីហា ឆ្នាំ២០១៨ តាមសំណើរបស់នាយករដ្ឋមន្ត្រី។ តុលាការ ចោទប្រកាន់សកម្មជនបឹងកក់រូបនេះ ថាបានប្រមាថនិងប្រើអំពើហិង្សាលើសន្តិសុខ នៅក្បែរវិមានឯករាជ្យ កាលពីឆ្នាំ២០១៣។
បន្ទាប់មកទៀត គឺលោក អ៊ួន ឈិន និងលោក យាង សុជាមេត្តា អតីតអ្នកកាសែតនៃវិទ្យុអាស៊ីសេរី ដែលបានរួចផុតពីពន្ធនាគារ ក្រោមការសម្រេចចិត្តរបស់ចៅក្រមស៊ើបសួរ កាលពីថ្ងៃទី២១ ខែសីហា ឆ្នាំ២០១៨។ ប៉ុន្តែ ចៅក្រមសើបសួរ ពុំទាន់ទម្លាក់ចោលបទចោទលើអតីតអ្នកកាសែតទាំង២នាក់នេះទេ។
ហេតុដូច្នេះ ពួកគេ នៅតែស្ថិតក្រោមការឃ្លាំមើលរបស់ចៅក្រោមស៊ើបសួរដដែល។ ចៅក្រមស៊ើបសួរ អាចហៅពួកគេ ទៅសួរបានគ្រប់ពេល បើចាំបាច់។
ចៅក្រមស៊ើបសួរ អនុញ្ញាតឲ្យអតីតអ្នកកាសែតទាំង២នាក់ រស់នៅក្រៅពន្ធនាគារជាបណ្តោះអាសន្ន ក្រោយពីពួកគេ បានជាប់ឃុំជិត១ឆ្នាំ។ អ្នកទាំង២ ត្រូវបានចោទពីបទផលិតព័ត៌មានខុសច្បាប់ ដែលប៉ះពាល់ដល់សន្តិសុខជាតិ និងបទផលិតវីដេអូអាសអាភាស។
ចុងក្រោយ គឺលោក សួន សេរីរដ្ឋា អតីតប្រធានគណបក្សអំណាចខ្មែរ ដែលបានចេញពីពន្ធនាគារ កាលពីថ្ងៃ២៣ ខែសីហា ឆ្នាំ២០១៨។ លោក បានរួចទោស ដោយអំណាចព្រះរាជក្រឹត្យរបស់ព្រះមហាក្សត្រ តាមសំណើរបស់នាយករដ្ឋមន្ត្រី។
អតីតប្រធានគណបក្សអំណាចខ្មែររូបនេះ មានទោស ព្រោះតែសរសេរសារលើបណ្តាញសង្គមហ្វេសប៊ុក ដោយរិះគន់រដ្ឋាភិបាល ក្នុងការបញ្ជាកងទ័ពឲ្យទៅកាន់ព្រំដែនកម្ពុជា-ឡាវ កាលពីអំឡុងខែសីហា ឆ្នាំ២០១៧។ មូលហេតុដែលរដ្ឋាភិបាលបញ្ជូនកងទ័ពទៅព្រំដែនកម្ពុជា-ឡាវ នាពេលនោះ គឺដោយសារតែកងទ័ពឡាវ ចូលមកឈរជើងនៅលើទឹកដីកម្ពុជា។
តុលាការ ចាត់ទុកសាររបស់លោក សួន សេរីរដ្ឋា ថាធ្វើឲ្យកងទព័មិនស្តាប់បញ្ជា។ ក្រោយមក តុលាការ ក៏កាត់ទោសលោក ឲ្យជាប់ពន្ធនាគាររយៈពេល៥ឆ្នាំ។ ប៉ុន្តែ ក្រោយជាប់ឃុំអស់រយៈពេល១ឆ្នាំ លោក ក៏ត្រូវបានព្រះមហាក្សត្រ ព្រះរាជទានលើកលែងទោស។ មុនរួចទោស លោក បានសរសេរលិខិតសុំទោសនាយករដ្ឋមន្ត្រី ដល់ទៅ២លើក។
ប្រហែលជាមិនទាន់អស់ទេ អ្នកដែលអាចត្រូវបានដោះលែង។ ក្នុងពិធីជួបសំណេះសំណាលជាមួយកម្មករ-កម្មការិនី នៅស្រុកកៀនស្វាយ ខេត្តកណ្តាល កាលពីថ្ងៃទី២៣ ខែសីហា ឆ្នាំ២០១៨ សម្តេច ហ៊ុន សែន បានប្រកាសដំណឹងដ៏ល្អមួយ គឺគម្រោងលើកលែងទោសជាលក្ខណទ្រង់ទ្រាយធំតែម្តង។ ប្រមុខរដ្ឋាភិបាល បង្ហើបថា ក្នុងនោះ ក៏មានមនុស្ស១២ផងដែរ។
ទោះជាមិននិយាយឲ្យចំក្តី តែគេ សន្និដ្ឋានថា មនុស្ស១២នាក់នោះ ប្រហែលជាលោក មាជ សុវណ្ណារ៉ា អតីតមន្ត្រីជាន់ខ្ពស់របស់គណបក្សសង្គ្រោះជាតិ និងសកម្មជន១០នាក់ទៀត ហើយក៏អាចមានអតីតតំណាងរាស្ត្រនៃគណបក្សប្រឆាំងនេះផងដែរ។
សម្តេច ហ៊ុន សែន បកស្រាយថា គម្រោងដោះលែងនេះ គឺជាទឹកចិត្តរបស់ខ្លួនក្នុងនាមជានាយករដ្ឋមន្ត្រី មិនមែនដោយសារតែខ្លាចសម្ពាធពីអន្តរជាតិឡើយ។ នាយករដ្ឋមន្ត្រីរូបនេះ ព្រមានថា គម្រោងលើកលែងទោសនេះ អាចនឹងត្រូវផ្អាក បើមានបុគ្គលណា អត្ថាធិប្បាយថា រដ្ឋាភិបាលកម្ពុជា រងសម្ពាធពីអន្តរជាតិ។
មជ្ឈដ្ឋានជាច្រើន ជាពិសេសសហគមន៍អន្តរជាតិ សាទរចំពោះការដោះលែងអ្នកទោសខាងលើ។ មជ្ឈដ្ឋានទាំងនោះ ថែមទាំងអំពាវនាវឲ្យរដ្ឋាភិបាល និងតុលាការ បន្តដោះលែងអ្នកផ្សេងទៀត រួមទាំងលោក កឹម សុខា អតីតប្រធានគណបក្សសង្គ្រោះជាតិផងដែរ ដើម្បីធ្វើឲ្យស្ថានការណ៍នយោបាយនៅកម្ពុជា កាន់តែមានភាពល្អប្រសើរ៕
© រក្សាសិទ្ធិដោយ thmeythmey.com