គណបក្សចំនួន៣ រក្សាជំហរមិនចូលឧត្តមក្រុមប្រឹក្សាពិគ្រោះយោបល់ឡើយ

ជាតិ

នយោបាយជាតិ

គណបក្សចំនួន៣ រក្សាជំហរមិនចូលឧត្តមក្រុមប្រឹក្សាពិគ្រោះយោបល់ឡើយ

24, Aug 2018 , 9:39 pm

រូបភាព

ដោយ:

ភ្នំពេញ៖ ទោះអាចទទួលតំណែងស្មើទេសរដ្ឋមន្ត្រី និងទទួលបានប្រាក់ខែផងនោះ ក៏គណបក្សចំនួន៣ មិនព្រមចូលរួមជាមួយរដ្ឋាភិបាល ក្នុងការបង្កើតឧត្តមក្រុមប្រឹក្សាពិគ្រោះយោបល់ឡើយ។ គណបក្សទាំង៣នោះរួមមាន គណបក្សសម្ព័ន្ធដើម្បីប្រជាធិបតេយ្យ គណបក្សធិបតេយ្យមូលដ្ឋាន និងគណបក្សខ្មែរឈប់ក្រ។

លោក យ៉ង់ សាំងកុមារ ចេញមុខបដិសេធចូលរួមឧត្តមក្រុមប្រឹក្សាពិគ្រោះយោបល់នេះ ដោយសារខុសទិសដៅរួម ដែលគណបក្សខ្លួនចង់ធ្វើ។ គណបក្សលោក ត្រូវការសេរីភាព ឯករាជ្យភាព និងភាពស្របច្បាប់ ក្នុងការធ្វើសកម្មភាពនយោបាយ និងសន្ទនា ដើម្បីចូលរួមដោះស្រាយបញ្ហាសង្គម មិនមែនទាល់តែមានឋានៈស្មើទេសរដ្ឋមន្ត្រី ឬរដ្ឋមន្ត្រីនោះទេ។ សម្រាប់មន្ត្រីជាន់ខ្ពស់គណបក្សប្រជាធិបតេយ្យមូលដ្ឋានរូបនេះ យល់ឃើញថា គណបក្សក្រៅសភា និងក្រៅរដ្ឋាភិបាល ប្រៀបដូចជាអង្គការសង្គមស៊ីវិល ដែលធ្វើការតស៊ូមតិ ឬសន្ទនាមតិនយោបាយតាមវិស័យផ្សេងៗ។

លោក យ៉ង សាំងកុមារ បានសរសេរហ្វេសប៊ុកខ្លួនដូច្នេះថា៖ «ការមានយន្តការ ឬវេទិកាមួយស្របច្បាប់សម្រាប់ការសន្ទនាមតិរវាងតំណាង គណបក្សនយោបាយដោយឈើលើគុណតម្លៃ សមភាព ភាតរភាព និងគោរពឲ្យតម្លៃគ្នាទៅវិញទៅមក ក្នុងនាមជាគណបក្សនយោបាយខ្មែរ ដូចគ្នានឹងជួយលើកស្ទួយប្រជាធិបតេយ្យសេរីពហុបក្ស និងសាមគ្គីជាតិដែលមិនធ្លាប់មានក្នុងប្រវត្តិសាស្ត្រខ្មែរ»។

ចំណែកគណបក្សសម្ព័ន្ធដើម្បីប្រជាធិបតេយ្យ វិញក៏បានតាំងចិត្តមិនទទួលយកទទួលយកតំណែង ដែលកើតចេញពីឧត្តមក្រុមប្រឹក្សាពិគ្រោះ និងផ្ដល់យោបល់ដែរ។ លោក ចិន ថុន អគ្គលេខាធិការគណបក្សបាននិយាយថា គណបក្សលោកមិនសោកស្ដាយតួនាទី និងប្រាក់ខែ ដែលរដ្ឋាភិបាលផ្ដល់ឲ្យនោះទេ ។«ព្រោះថារាល់តំណែង និងតួនាទី គឺជាអម្រែក និងការទទួលខុសត្រូវ។ ទទួលបានតួនាទីមួយគឺជាអម្រែកសម្រាប់គណបក្សសម្ព័ន្ធដើម្បីប្រជាធិបតេយ្យ ដូច្នេះមិនមានអ្វីដែលត្រូវសប្បាយរីករាយទេ។ តំណែងនឹងតួនាទីដែលអាចធ្វើឲ្យសប្បាយរីករាយបាន លុះត្រាតែជាតំណែងដែលទទួលផលប្រយោជន៍ផ្ទាល់ខ្លួន»។ ដោយឈរលើស្មារតីគោរពឆន្ទៈពលរដ្ឋដែលបោះឆ្នោតឲ្យគណបក្សប្រជាជនកម្ពុជា ដែលទទួលបានអាសនៈទាំង១២៥ និងដោយសារតែ សម្ដេចនាយករដ្ឋមន្ត្រីបានដាក់លក្ខខណ្ឌថា ការចូលរួមផ្ដល់យោបល់ពីតំណាងគណបក្សផ្សេងៗ មិនត្រូវពាក់ព័ន្ធនឹងគោលនយោបាយរបស់គណបក្សប្រជាជនឡើយ។ នេះបើតាមសេចក្ដីជូនដំណឹងរបស់គណបក្សសម្ព័ន្ធដើម្បីប្រជាធិបតេយ្យ ។

មិនខុសគ្នានេះដែរ គណបក្សខ្មែរឬឈប់ក្រ បានអះអាងថា បក្សខ្លួនមិនទទួលនូវកិច្ចសហប្រតិបត្តិការណាដែលផ្ទុយនិងឆន្ទៈរបស់ប្រជាពលរដ្ឋឡើយ។ អ្នកនាំពាក្យគណបក្សខ្មែរឈប់ក្រ បានលើកហេតុផល ថា សម្ដេចនាយករដ្ឋមន្ត្រីអនុញ្ញាតឲ្យគ្រប់គណបក្សដែលចូលរួមឧត្តមក្រុមប្រឹក្សានេះ អាចផ្ដល់ត្រឹមយោបល់ តែមិនអាចលើកយកគោលនយោបាយរបស់ខ្លួនទៅជជែកបាន។ ដូច្នេះគឺបញ្ច្រសទិសដៅគណបក្សខ្លួន។

លោក ស៊ិន វណ្ណារិទ្ធ ដែលមិនទទួលស្គាល់ការបោះឆ្នោតកន្លងមកនេះ បានបញ្ជាក់ដូច្នេះថា៖«យើងមិនមានការសោកស្ដាយនោះទេ ពីព្រោះយើងបានសម្រេចចិត្តរួចហើយ ថាយើងមិនមែនធ្វើគណបក្សនយោបាយដើម្បីតែកៅអី ឬតួនាទីណាមួយដែលគេឲ្យ ដើម្បីគ្រាន់តែបង្គ្រប់កិច្ច ដែលយើងឃើញថាគ្មានសិទ្ធិគ្មានអំណាច នៅក្នុងសង្គមប្រជាធិបតេយ្យនោះទេ»។

ទោះមិនចូលរួមជាមួយឧត្តមក្រុមប្រឹក្សាពិគ្រោះ និងផ្ដល់យោបល់ក្ដី តែគណបក្សក្រៅរដ្ឋសភាទាំង៣ បន្តប្ដេជ្ញាបំពេញតួនាទីរបស់ខ្លួន និងបន្តសកម្មភាពដែលធ្លាប់បានអនុវត្តបន្ថែមទៀត។

ឧត្តមក្រុមប្រឹក្សា និងផ្ដល់យោបល់ ត្រូវបានសម្ដេចនាយករដ្ឋមន្ត្រី ហ៊ុន សែន ផ្ដួចផ្ដើមគំនិតឡើង នៅក្នុងជំនួបរវាងសម្ដេច និងតំណាងគ្រប់គណបក្ស កាលពីថ្ងៃទី២១ ខែសីហា ឆ្នាំ២០១៨។ តំណាងគណបក្សនានា ដែលមិនបានទទួលអាសនៈក្នុងរដ្ឋសភាសម្រាប់ការបោះឆ្នោតនៅនីតិកាលទី៦ ដែលចូលរួមជាសមាជិក នៃឧត្តមក្រុមប្រឹក្សា និងផ្ដល់យោបល់នេះ នឹងមានឋានៈស្មើទេសរដ្ឋមន្ត្រី និងឋានៈស្មើរដ្ឋមន្ត្រី ហើយថែមទាំងបានប្រាក់ខែផងដែរ ៕