ជាតិ
ទឹកទន្លេមេគង្គកម្ពុជា នឹងហក់ឡើងជាថ្មី ដោយសារមានប្រព័ន្ធទាបកើតឡើងនៅអាងទន្លេមេគង្គថៃ-ឡាវ
× កាលពី រសៀលថ្ងៃទី២៣ ខែសីហា នេះ មានប្រព័ន្ធសម្ពាធទាបមួយ បានកើតឡើងនៅលើតំបន់អាងទន្លេមេគង្គប្រទេសថៃ និងឡាវ ដោយកម្ពុជា នឹងរងឥទ្ធិពលខ្យល់មូសុងនិរតីខ្សោយផងដែរ ជាហេតុបង្កឱ្យមានភ្លៀងធ្លាក់រាយប៉ាយពីបង្គួរទៅច្រើន ហើយការធ្លាក់ភ្លៀងនេះ អាចនឹងធ្វើឱ្យទឹកទន្លេមេគង្គកម្ពុជា ហក់ឡើងជាថ្មីម្ដងទៀត។ នេះបើតាមសេចក្ដីជូនដំណឹងនៃក្រសួងធនធានទឹក នៅថ្ងៃទី២៤ ខែសីហា។
ក្រសួងធនធានទឹក បានបន្តថា លក្ខណៈដូចខាងលើ នឹងធ្វើឱ្យអាកាសធាតុនៅកម្ពុជា នៅតំបន់អាងទន្លេមេគង្គ និងតំបន់ខ្ពង់រាបឦសាន រួមទាំងបណ្ដាខេត្ត ដែលស្ថិតនៅតាមបណ្ដោយព្រំដែនកម្ពុជា វៀតណាម អាចនឹងបន្តមានភ្លៀងធ្លាក់ ក្នុងកម្រិតពីបង្គួរទៅច្រើន។ ជាមួយគ្នានេះ បណ្ដារាជធានី-ខេត្តដទៃទៀត អាចនឹងមានភ្លៀងធ្លាក់ពីតិចទៅបង្គួរ។
នៅតំបន់អាងទន្លេមេគង្គ ចាប់ពីតំបន់ស្ថានីយតម្រង់ទឹកភ្លៀង-ជលសាស្ត្រ អាចនឹងមានភ្លៀងធ្លាក់រាយប៉ាយពីបង្គួទៅច្រើន។ នេះបើតាមការបន្ថែមរបស់ក្រសួងធនធានទឹក និងបានបញ្ជាក់ថា៖«ការធ្លាក់ភ្លៀងនេះ អាចនឹងបង្កឱ្យទឹកទន្លេមេគង្គ ហក់ឡើងជាថ្មីម្ដងទៀត»៕
© រក្សាសិទ្ធិដោយ thmeythmey.com