លោក ចន ម៉ាខេន សមាជិកព្រឹទ្ធសភាបក្សសាធារណរដ្ឋ និងជាអ្នកនយោបាយតែងរិះគន់ប្រធានាធិបតី ដូណាល់ ត្រាំ មិនសំចៃមាត់នោះ បានទទួលមរណភាពនៅថ្ងៃសៅរ៍ទី ២៥ ខែសីហាក្នុងវ័យ ៨១ឆ្នាំ។ នេះបើតាមទីភ្នាក់ងារព័ត៌មាន AFP។
កើតនៅរដ្ឋអារីហ្សូណាក្នុងឆ្នាំ ១៩៣៦ លោក ចន ម៉ាខេន បានបាត់បង់ជីវិតដោយសារជំងឺមហារីកខួរក្បាលធ្ងន់ធ្ងរ ហើយលោកសម្រេចចិត្តឈប់ទទួលការថែទាំងសុខាភិបាលសប្តាហ៍នេះដែរព្រោះលោកដឹងថា វាឈានដល់ដំណាក់កាលចុងក្រោយហើយ។
ក្រោយទទួលបានដំណឹងពីមរណភាពរបស់លោក ម៉ាខេន ដែលធ្លាប់ជាគូប្រជែងក្នុងការបោះឆ្នោតប្រធានាធិបតីឆ្នាំ ២០០៨ អតីតប្រធានាធិបតីអាមេរិកលោក បារ៉ាក់ អូបាម៉ា និងភរិយាបានបានចេញសារបង្ហាញការសោកស្តាយចំពោះការបាត់បង់ជីវិតរបស់សមាជិកព្រឹទ្ធសភាដ៏មានឥទ្ធិពល និងជាវីរបុរសសង្គ្រាម និងក៏ចូលរួមរំលែកទុក្ខដល់ក្រុមគ្រួសារសពផងដែរ។
លោក ម៉ាខេន ត្រូវបានប្រជាជនអាមេរិកគោរពខ្លាំង និងចាត់ទុកជាវីរបុរសសង្គ្រាមផងដោយ លោកធ្លាប់បម្រើការងារក្នុងកងទ័ពជើងទឹក និងធ្លាប់ក្លាយជាឈ្លើយសឹកក្នុងសង្គ្រាមវៀតណាមដែរក្នុងឆ្នាំ ១៩៦៧។
ក្នុងប្រតិបត្តិការសឹកឆ្នាំ ១៩៦៧នោះ យន្តហោះលោក ម៉ាខេន ត្រូវបានកងទ័ពវៀតណាមខាងជើងបាញ់ទម្លាក់ ហើយក៏ត្រូវបានគេចាប់ខ្លួនជាឈ្លើយសឹកនិងធ្វើទារុណកម្មអស់រយៈពេលប្រហែលប្រាំឆ្នាំ។ លោក ត្រូវបានវៀតណាមខាងជើងដោះលែងក្នុងឆ្នាំ ១៩៧៣ ពេលមានការចុះកិច្ចព្រមព្រៀងក្រុងប៉ារីសដែលធានាឲ្យមានការដកទ័ពអាមេរិកចេញពីវៀតណាម។
ក្រោយបញ្ចប់ជីវភាពជាកងទ័ព លោក ម៉ាខេន បានក្លាយជាអ្នកច្បាប់ និងបន្តឈរឈ្មោះជាសមាជិកសភានៅរដ្ឋកំណើតខ្លួន អារីហ្សូណា។ ក្នុងឆ្នាំ ១៩៨២ លោកបានឈ្នះឆ្នោតក្លាយជាសមាជិកសភា ហើយក្រោយមកលោកបានក្លាយជាសមាជិកព្រឹទ្ធសភាដែលជាស្ថាប័ននយោបាយមួយដ៏មានឥទ្ធិពលនៅអាមេរិកថែមទៀត។
ដល់ឆ្នាំ ២០០០ លោក ម៉ាខេន បានចាប់ផ្តើមប្រកួតយកតំណែងប្រធានាធិបតី ប៉ុន្តែលោកចាញ់ការប្រកួតក្នុងបក្ស ដោយលោក ចច ដាបិលយូប៊ូស ក្លាយជាបេក្ខជនប្រធានាធិបតីបក្សសាធារណរដ្ឋវិញ។
ប្រាំបីឆ្នាំក្រោយមក លោក ម៉ាខេន បានចាប់ផ្តើមឈរឈ្មោះម្តងទៀត ដោយលោកយកឈ្នះលើបេក្ខជនក្នុងបក្សផ្សេងទៀត។ ប៉ុន្តែលោកនៅតែមិនអាចផ្តួលបេក្ខជនប្រធានាធិបតីបក្សប្រជាធិបតេយ្យលោក បារ៉ាក់ អូបាម៉ា ក្នុងការប្រកួតយកតំណែងប្រធានាធិបតីនេះឡើយ។
ចាប់ពីពេលនោះមកលោក ម៉ាខេន ត្រឡប់ទៅបន្តការងារជាសមាជិកព្រឹទ្ធ ហើយក៏បានបន្តធ្វើជាអ្នករិះគន់គោលនយោបាយការបរទេសរបស់លោក អូបាម៉ា ផងដែរ។
បន្ទាប់ពីចប់អាណត្តិលោក អូបាម៉ា លោក ម៉ាខេន ក៏បានក្លាយជាអ្នកនយោបាយដែលចាំទិតៀនលោក ដូណាល់ ត្រាំ ឥតសំចៃមាត់ទៀត។ លោកបានសម្រេចមិនគាំទ្រលោក ត្រាំ ជាបេក្ខជនប្រធានាធិបតីរបស់បក្សសាធារណរដ្ឋថែមទៀត ក្រោយមានលេចធ្លាយខ្សែអាត់សំឡេងដែលបង្ហាញថាលោក ត្រាំ ប្រើប្រាស់ពាក្យសម្តីអាសគ្រាមដាក់ស្ត្រីនោះ។
ក្រោយលោក ត្រាំ ជាប់ឆ្នោត និងស្បថចូលកាន់តំណែង លោក ម៉ាខេន ក៏ក្លាយជាអ្នករិះគន់គោលនយោបាយប្រធានាធិបតីអាមេរិកទៀត ហើយសមាជិកព្រឹទ្ធសភារូបនេះបន្តរិះគន់លោក ត្រាំ ទាំងដែលលោកបានធ្លាក់ខ្លួនឈឺក្រោយពិនិត្យរកឃើញថា មានជំងឺមហារីកខួរក្បាលក៏ដោយ។
លោក ម៉ាខេន មិនពេញចិត្តខ្លាំងចំពោះការគំរាមរបស់ ត្រាំ ចង់ចាកចេញពីបក្សសម្ព័ន្ធយោធាណាតូ និងចាត់ទុកថា សម្ព័ន្ធយោធានេះចាស់គំរឹល និងគ្មានប្រសិទ្ធភាព។ ប៉ុន្តែទោះជាបែបណាក៏ដោយ អ្នកទាំងពីរមានគំនិតស្របគ្នាលើរឿងបង្កើនការចំណាយយោធារបស់មន្ទីប៉ង់តាហ្កូន។