ជាតិ
នយោបាយជាតិ
ឥណ្ឌា នឹងជួយជួសជុលប្រាសាទព្រះវិហារ រូបពី AFP៖ លោកស្រី ស៊ុសម៉ា ស្វារ៉ាច រដ្ឋមន្ត្រីការបរទេសឥណ្ឌា
× ភ្នំពេញ៖ រដ្ឋមន្ត្រីការបរទេសឥណ្ឌាលោក ស្រី ស៊ុសម៉ា ស្វារ៉ាច និងរដ្ឋមន្ត្រីការបរទេសកម្ពុជា លោក ប្រាក់ សុខុន នឹងជួបគ្នា នៅចុងខែសីហានេះ ដើម្បីចុះហត្ថលេខាលើឯកសារដូចជា កិច្ចព្រមព្រៀង និងអនុស្សរណៈនៃការយោគយល់គ្នាមួយចំនួន(MoU)។ នេះបើតាមសេចក្ដីប្រកាសព័ត៌មាននៃក្រសួងការបរទេសកម្ពុជា នៅថ្ងៃទី២៤ ខែសីហា។
ក្រសួងការបរទេសកម្ពុជាបានបន្តថា លោក ស្រី ស៊ុសម៉ា ស្វារ៉ាច នឹងមកបំពេញទស្សកិច្ចផ្លូវការនៅកម្ពុជា ពីថ្ងៃទី២៨ដល់ថ្ងៃទី៣០ ខែសីហា ឆ្នាំ២០១៨។ ក្នុងអំឡុងទស្សនកិច្ចនេះ រដ្ឋមន្ត្រីការបរទេសឥណ្ឌា នឹងចូលជួបសម្ដែងការគួរសមជាមួយ ប្រធានព្រឹទ្ធសភា សម្ដេច សាយ ឈុំ បន្ទាប់មកជាមួយ សម្ដេច ហ៊ុន សែន នាយករដ្ឋមន្ត្រីកម្ពុជា។
រដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសឥណ្ឌា នឹងពិភាក្សាគ្នាអំពីបញ្ហាជាច្រើនទាក់ទងទៅនឹងកិច្ចសហប្រតិបត្តិការទ្វេភាគី រួមទាំងការផ្លាស់ប្តូរយោបល់គ្នាអំពីបញ្ហាតំបន់ និងអន្តរជាតិ។ នេះជាការបន្ថែមរបស់ក្រសួងការបរទេសកម្ពុជាដដែល។
តាមរយៈសេចក្ដីប្រកាសព័ត៌មាន ក្រសួងការបរទេសកម្ពុជា បានអះអាងថា ជំនួបនេះ នឹងមានការចុះហត្ថលេខាលើឯកសារចំនួន៣សំខាន់ៗ ដែលរួមមាន ទី១ កិច្ចព្រមព្រៀងរវាងអន្តររដ្ឋាភិបាលកម្ពុជា-ឥណ្ឌា សម្រាប់ការអភិរក្សនិងជួសជុលប្រាសាទព្រះវិហារ នៅស្រុកជាំក្សាន ខេត្តព្រះវិហារ, ទី២ អនុស្សរណៈយោគយល់គ្នា នៃកិច្ចសហប្រតិបត្តិការរវាងក្រសួងសុខាភិបាល និងកិច្ចការគ្រួសារ នៃរដ្ឋាភិបាលកម្ពុជា-ឥណ្ឌា ស្ដីពីកិច្ចសហប្រតិបត្តិការលើវិស័យ សុខភាព និងឱសថ, និងទី៣ អនុស្សរណៈយោគយល់គ្នា រវាងវិទ្យាស្ថានជាតិការទូតនិងទំនាក់ទំនងអន្តរជាតិ នៃក្រសួងការបរទេសកម្ពុជា និងវិទ្យាស្ថានការបរទេសនៃក្រសួងការបរទេសឥណ្ឌា។
ក្រសួងការបរទេសកម្ពុជា បានបញ្ជាក់ចុងក្រោយថា លោក ស្រី ស៊ុសម៉ា ស្វារ៉ាច គ្រោងទៅទស្សនាប្រាសាទបុរាណមួយចំនួន នៅខេត្តេសៀមរាប រួមទាំងគម្រោងជួសជុលប្រាសាទតាព្រហ្ម ដែលគាំទ្រដោយរដ្ឋាភិបាលឥណ្ឌា៕
Tag:
ប្រាក់ សុខុន
ស៊ុសម៉ា ស្វារ៉ាច
MoU
© រក្សាសិទ្ធិដោយ thmeythmey.com