កីឡាអន្តរជាតិ
អន្តរជាតិ
ទោះចាញ់២ក្នុងចំណោម៣ប្រកួតដំបូង តែ Man Utd នៅតែជឿជាក់ Mourinho
× លោក Jose Mourinho នៅតែទទួលបានការគាំទ្រពីក្លិប Manchester United ដដែលបើទោះជាដឹកនាំក្រុមចាញ់ Tottenham Hotspur ក្នុងលទ្ធផល ៣-០ កាលពីរាត្រីថ្ងៃទី២៧ ខែសីហា និងជាបរាជ័យ២លើកជាប់គ្នាក្នុងចំណោម៣ប្រកួតដំបូងក៏ដោយ។
ក្រុមរហស្សនាមបិសាចក្រហម បានស្គាល់រសជាតិចាញ់២ប្រកួតក្នុងចំណោម៣ប្រកួតដំបូងនៃក្របខណ្ឌ Premier League រដូវកាល ២០១៨-២០១៩ របស់ពួកគេជាលើកដំបូង ចាប់តាំងពីបរាជ័យបែបនេះកាលពីរដូវកាល១៩៩២-១៩៩៣មក ពោលគឺកាលពី២៦ឆ្នាំមុន។
សម្រាប់អ្នកចាត់ការសញ្ជាតិព័រទុយហ្គាល់ វ័យ៥៥ឆ្នាំ នេះក៏ជាប្រវត្តិដឹកនាំអាក្រក់បំផុតក្នុងអាជីពលើកដំបូងផងដែរក្រោយនាំ Man Utd ចាញ់ ២ប្រកួតក្នុងចំណោម៣ប្រកួតដំបូង។
បើតាមការផ្សាយរបស់ BBC បើទោះជាបរាជ័យយ៉ាងនេះក្តី ប៉ុន្តែមន្ត្រីជាន់ខ្ពស់នៅ Old Trafford នៅតែគាំទ្រ និងលើកទឹកចិត្តដោយនិយាយបញ្ចុះបញ្ចូល Mourinho ថានៅតែអាចបង្វែរស្ថានភាពអាក្រក់នេះឲ្យបានប្រសើរឡើងវិញជាក់ជាមិនខាន។
Mourinho នៅតែស្ថិតក្នុងទីលានដើម្បីអបអរក្រុម និងអ្នកគាំទ្របន្ទាប់ពីបរាជ័យក្នុងដីខ្លួនឯងធ្ងន់ធ្ងមិនធ្លាប់មានពីមុនមកក្រោមថ្វីជើងក្រុម Spurs និងបានសរសើរពួកគេនៅក្នុងបទសម្ភាសន៍តាមទូរទស្សន៍ទៀតផង។
ប៉ុន្តែនៅពេលអ្នកកាសែតសួរអំពីបញ្ហាតំបន់ពាររបស់ Man United នៅក្នុងសន្និសីទសារព័ត៌មាន អតីតអ្នកចាត់ការ Chelsea និង Real Madrid រូបនេះបែជាប្រត្តិកម្មដោយលើកម្រាមដៃ៣សួរទៅកាន់អ្នកកាសែតវិញថា៖ «តើអ្នកដឹកថាលទ្ធផល៣-០ ជាអ្វីទេ? តើអ្នកដឹងថាវាមានន័យដូចម្ដេចទេ? មានន័យថា Premier League ៣ដង។ ខ្ញុំបានឈ្នះពានរង្វាន់ Premier League តែឯងច្រើនជាងអ្នកចាត់ការ១៩នាក់ផ្សេងទៀតនៅពេលនេះ។ ៣សម្រាប់ខ្ញុំ និង២សម្រាប់ពួកគេ»។ លោកបានទាមទារឲ្យអ្នកកាសែតសួរសំណួរដោយផ្តល់ការគោរពចំពោះលោក ហើយក៏ងើបចេញពីកៅអីដើរចេញតែម្តង។
អ្នកចាត់ការរហស្សនាម Special One បានដឹកនាំម្ចាស់ជើងឯកលីគកំពូលអង់គ្លេស២០សម័យ នៅឆ្នាំ ២០១៦ ដោយជួយក្រុមឈ្នះពានរង្វាន់ League Cup និង Europa League ក្នុងរដូវកាលដំបូងនៅពេលដែលពួកគេបានបញ្ចប់ក្នុងចំណាត់ថ្នាក់ទី៦ នៅ Premier League៕
Tag:
បាល់ទាត់
Jose Mourinho
Manchester United
© រក្សាសិទ្ធិដោយ thmeythmey.com